¹ Masuku maya hachuile asusu ata u lubunga lubele uya Yelusalemu, bose basalie m'ibaloo ya Bayahudi na basamalia, ila babo bahilua. ² Batu basobolwa bachiule Sitefano, na ubaya lilo lyata. ³ Sauli gususule lubunga, gugingile ndu wa ndu na ubabula balumiana na baachana na ubatela mmihambo. ⁴ Na baya bene basalie bagile ubo na ubo balisambile inywa. ⁵ Filipo gusalile mmbuga gya Samalia, gulisambile mwano gwa Kelesitu. ⁶ Na sumbile wa langa limwechi bahuliche biya binywa bisogo minywe na Filipo habahuliche na ubimona bisaga bielibele hugila. ⁷ Yulu miha gibahumine bengi babele bawaswe nagio, balilile wa madi mata, na batu bengi babilebe, na bitende, bahomine. ⁸ Habele saso lyata mgi ya mbuga. ⁹ Na gumwe mtu china lyake Simoni, utula gubele huita lugangagana mgia mbuga, gubagakiche batu ba monoga gwa Basamalia, uguma gee i mtu mmata. ¹⁰ Baya sammuliche utula mwanalela na mmosobu, baganine, guno mtu ii uosha wa Abeca, guya mmata. ¹¹ Bammuliche, yulu gubagagiche masugu mengi na lugangaganga lwake. ¹² Habam'buashiche, gulisambile mwano gubenju gwa bwolo bw'Abeca, na china lya Yesu Kelesitu, bachundilwe, baluminana na baachana. ¹³ Simoni nage mine guwasiche kuchundilwe, gulungene na Filipo, gugagilwe na bisagina biloya biata bibelehugilya. ¹⁴ Na bahilwa babele Yelusalemu, habahuliche ugana Samalia gwiwasha inywa y'Abeca, babahulile Pedelo na Yohana. ¹⁵ Bibyo habasalile, babasabile bagae mtima guhaha. ¹⁶ Yulu gushibele nabasalila ata gumwechi gwabo ila babele bachunjwe ka wa china lya mlume Yesu. ¹⁷ Haho babiile mabao mabo hegulu habo, nabo bagaile mtima guhaha. ¹⁸ Simoni helimonine batu bahewa mtima guhaha wa ubiilwa maboo na bahilwa, gubendiche ubaho bumona guganine. ¹⁹ Pewe na nene uno uosha, yulu gegese mine guandibiila maboo manyi, gagae mtima guhaha. ²⁰ Bibyo Pedelo gumsambile, bumona bobe na ugie nabo kohamwechi nobe, ulihulanga ugana karama gw'Abeca gisuhewa wa ugula. ²¹ Ushi na iba m'buno bukichi, yulu mtima kobe gushi gugo lobu umeso m'Abeca. ²² Bina, libeche bubi bobe, umsabe mlume,hange unaleelelwa langa lilio lya mtima gobe. ²³ Yulu nilihuumona wina mtongo nahi bulembe, naiyaka ulimmihambo ya bubi. ²⁴ Simoni gugaile, gudokomine, musabile benywe wa mlume, bishigilie ata imwechi ubyena bya mwakana. ²⁵ Pedelo na Yohana habahuile ushuhudia na ulisamba inywa ya mlume bagiwile Yelusalemu, balisambila mwano mmabuga mengi ma Basamalia. ²⁶ Malaika ma mlume gudokomine na Filipo, gumsambile, kimana na ukie lubi lwa ihindagala ya mmanda mpaga giya ndila gususala uhuma Yelusalemu ugia Gaza, nalo noo luanaganywa. ²⁷ Nage guhumine, gukile, lola gumanine mtu gwa Etiopia, gushi lungua na bauchana, mtu mmata hasiha kandoke mmachi gwa olo lya Etiopia, kubiilwe ulola bitundu bwake bose, nage gubele hugia Yelusalemu utambikila. ²⁸ Hebele hugiwila, mshame wabilibili age gulihusoma itabo ya mbua Isaya. ²⁹ Mtima gumsambile Filipo, shena alibu na ao abilibili, ulamane nau. ³⁰ Filipo gugile abilo, kummliche gulihusom itabo ya mbua Isaya, guganine, wi wii ulihumona byoli husoma? ³¹ Gugamine niosha wii umana na nishi na mtu gusambila? Gum'bembeleche Filipo gachine na ushama hamwechi nage. ³² Na ihambo ya kiya migolo giebele husoma noo giine, gulombwelwe nahi mmoo guli hugia ushinjiwa, na nahi mwana mmoo byeli pii hambele ha mkechi gwa masoo, byoka bibyo gee gushihuununa anywa age. ³³ Yulu ya ulisacha wage uononywa wagu uhumiwe, mnanyi guisambila ibushi yage? Yulu mwego gwake guhunyiwa m'ibaloo. ³⁴ Guya gushilungwa na baachana gumgaile Filipo, guganine, nuusaba, mbua guno gulihugana bino binywa umwano gwa nanyi, ii mwano gwake gemine au gunge mtu? ³⁵ Filipo gumsambile, gutulile u koka guya mkolo, gulisambile mwano gubenju gwa Yesu. ³⁶ Habele hugililila mndila, bahuile hamwe hene habele madi, guya gushi lungwa na baachana guganine, lula madi noo mama, iyii ilihugita nashi chunjwe? ³⁷ Filipo gukanine, wahuwasha wa mtima gobe gose byegiliya. Gumkaile, guokomine, nawasha ugana Yesu Kelesitu noo mwana gw'Abeca. ³⁸ Gukanine, abilibili agimane, basalile bose babili mmadi, Filipo na guya gushi lungwa na baachana, Filipo gumchundile. ³⁹ Habahuile udabua mmadi, mtima gwa mlume gumgulule Filipo ugia ko, guya gushilungua na baachana gushimmonine iyaka, bibyo gugile lwake na saso. ⁴⁰ Bibyo Filipo gumoneye Azoto, na hebele huhita gulisambile mwano mmabuga mose na byelihiile Kaisale.