¹ Ibuli yata ikanine, bino biaganywa noo bya bili? ² Sitefano guganine, "Bashi wetu na bamatata, pulichwe, Abeca a bugengeda amtobuele setu Ibulahimu, hebele u Mesopotamia, hambele ha ushama Halani; ³ gubasambile, Huma m'ibaloo yobe na m'babuswa nobe, na ugie wiiya ibaloo yandi umonya. ⁴ Bibyo guhumine m'ibalo ya Bakaldeyo, gushamine Halani, kuhumine uya hanyuma ha sage uwa, Abeca am'bulule mpaka ino ibaloo yamli hushama mwaili. ⁵ Gushimmele buhiama ata bwaubiya yahi ya ugulu, gumgaile ugana guimma iya ibaloo iba ihana yage na ibushi yage hambele gushi naba na mwana. ⁶ Abeca amganine bino, ubushi yobe babi bagenyi m'ibaloo ya bange batu, nabo bibaita uba bacha babo, na bibagila bibe mina uki china. ⁷ Na guya mmoga gwibaita benywe uba bacha nene nibaonona, Abeca akaninek hanyuma ha haho bihuma, biitambila nene ino ihana. ⁸ Gummele alago a kumbi, haho Ibulahimu kubutile Isaka, gummilile ukumbi ha masuku inana. Isaka kubutile Yakobo. Yakobo kubushile baya ui na bopi noo bamasetulu. ⁹ Baya bamasetulu bamonene Yusufu buwa, bandiche ga kie Misili, Abeca habele hamwechi nage. ¹⁰ Gumuminye mtususu twage tose, gummele iulina lwengu u meso ma Falao, olo lya Misili, nage nuubiya gatabale Misili na ndu gyake gyose. ¹¹ Hanyuma hachuile ndala ibaloo yose na Kanani, tususu tuingi, na basetulu bashipashile biliwa bingi. ¹² Yakobo helihuliche ugana Misili uli bilia bingi, gubahilile bamasetu lundo lutangi. ¹³ Na lwendo lwa bubili Yusufu gulimaninye ubashiwabo, babusu ba Yusufu imaninywe na Falao. ¹⁴ Yusufu guhilile bashiwabo ugya umkita sage Yakobo, nailongo yago yose batu maumi njwi na batano. ¹⁵ Yakobo kusalileMisili, guwile gee na bamasetu. ¹⁶ Bakuhilwe mpaka Shekemu bachiilwe mliya sinda, liya likulilwe na Ibulahimu wa biba bya bumona u baana ba Hamoli ubo Shekemu. ¹⁷ Mengo ma aya alago ahelwe Ibulahimu naAbeca hamahiile, baya batu babulile wa uhita uya Misili, ¹⁸ haginuile linge olo lya Misili lishibele limmane Yusufu. ¹⁹ Gugu kwakilile bibe abila etu, ubahisha bidogu bamasetu, na ubatela bana ba tulenge yulu bashibe na mwego. ²⁰ Mamo mengo Musa noo ubusua, nage gubele na yenyi ibenju, kubeilwe miechi gitatu mndu mwasake. ²¹ Helitelilwe, msiha gwa Farao gumtolile naum'bea nahi mwanage. ²² Musa gukikiwe lwengu lose lwa Bamisili gubele ndogomi gwa binywa na ubikilanywa. ²³ Miaa gike gya ubusua gibele maumi mana, kulihuliche mnda mwage kagie ubalola bashiwabo Baislaeli. ²⁴ Gumonine gumwe Misilaeli gulihukililwa bibe, gumligilwele guya kubele humonenywa, gummulile guya Mmisili. ²⁵ Kulangile ugana bashiwabo bimana Abeca abaha mmonya wa uboo wake, ata bibyo bashimanine. ²⁶ Lusugu lwa bubili lwake kubangile bamwe Baislaeli bali hugumana, kutondile ubalungia umwechi gukanine, benywe balume, benywe mulibabuswa, yulu yai mulihuhulana? ²⁷ Guya mine kumlubile minage gumlungile ko kumganine, mnanyi gubiya nmata na mkechi gwetu gwa milandu? ²⁸ Wiwii ulitaka upaka nene nahi biawaga guya Mmisili mnaakeshi? ²⁹ Musa kusinine yulu ya iyo inywa, na ushama mgenyi m'ibaloo ya Bamidiani, kubutile bana babili ubo. ³⁰ Na hagiwilile miaa maumi mana, malaika gwa mlume gumtabuele m'lwanaganywa lwa lono Sinai mlulindi lwahia, wiilindi. ³¹ Musa helimonine kugakilwe na uya umona biya, helihiile haka yulu galole, lidilia mlume limhuilile. ³² Mene noo Abeca a bamasobe, Abeca a Ibulahimu, na Abeca a Isaka na Abeca a Yakobo, Musa kudandile, gushioshiche ulola. ³³ Mlume gumsambile, chula mikalabanda umagulu mobe, yulu hano holi mgimanyu ii sii kihaha. ³⁴ Wiinene namona asusu a batu banyi bali mmisili, nahulicha luhanga lwabo na nene nasalanabahunye. hana nuhila ugie Misili. ³⁵ Musa guya kubahaninye, bakaninem mnani gubiya mmata na mkechi kwetu gwa milandu? noo kutuminywe na Abeca uba mmata na mmonya, wa uboo wa guya malaika nine gumtobuele u iya ilindi ya ahia. ³⁶ Gugo Musa noo kubahuminye, gugilile biloya na bisaga m'sii gya ba Misili, na ubahali lya shamu, na mlwanaganywa miaa mauni mana. ³⁷ Geka gugo Musa noo gubasambile Baisilaeli, mlume Abeca enyu gwiginulila mbwa hawingi ha bashiwenyu, nene mumuliche gee. ³⁸ Gee noo gubele mlubunga mluanaganywa hamwechi na guya malaika guelidogomine nage ulono Sinai, iyaka hamwechi na bamasetu, noo guhelwe binywa bya mwego na utuha. ³⁹ Mtu gugo bamasetu bashibendiche ummyemia, bamlungile ko, na wa mitima gyabo bakiwile Misili. ⁴⁰ Bamsambile Haluni, tulongeche tubeca, tuine twitulombuela, yulu gugo Musa kutuhuminye m'sii gya Misili, tushigidi byakaiswa ulwono. ⁴¹ Balongicha mwana ng'ombe luya lusuku, bachuile na utambikila guya mmishi, baseelele mgilo gwa maboo mabo. ⁴² Abeca abagalulile na ubalea batambikile ihichi ya hekulum nahibiabele bigalwe ubitabobya bambwa, wii mutambikile nene tambiko lya nyama, miaa naumi nana mlwanaganywa, benywe ndu g'Isilaeli? ⁴³ Benywe musualile itul ya Maleki, na tumbala mbala twa Abeca enyu Lefani, Miishi gyamulongiche yulu mugitambikile, nene miimpulula mgie kwa uhita Babeli. ⁴⁴ Iya itula ya ushahidi ibele hamwechi na bamasetu mlwonagnywa, nahi bielilagile guya mine gudogomine na Musa, gagubae na mlingilisho gueli monine. ⁴⁵ Nahi biya bamasetu biababele hulungishana itula baigingiche hamwechi na Yoshua mgiya sii gia giya mioga, Abeca abachingile u meso ma bamasetu, mpaka masugu ma Daudi. ⁴⁶ Guya gugitabichiwe u meso maAbeca, nage gusabile gahe Abeca a Yakobo bushao. ⁴⁷ Wa bibyo Sulemani mwanage gugubaile ndu. ⁴⁸ Yulu gee mine guli hegulu gushibashama mndu giagigubawe na maboo, nahi bidogomnine mbwa, ⁴⁹ Gulu iyati yanyi mine lungu, na sii noo hubiila magulu manyi, nda nai gwimwingubaila? Mlume gwakana. ⁵⁰ Na iy'ihana nai yamndilihodicha? Ati iy'uboo wanyi ukilile bino byose? ⁵¹ Benywe ba maoshi magumu mushihubenja uhugululwa, mitima gyenyu kishikile kumbi ata matu, masugu mose mulihummanya mtima guhaha, mahi bigilile bamasenyu, na benywe abi byoka biya. ⁵² Mmanyi hawingi ha bambwa mine gushisusulwe na bamasenyu? Nabo babahagile baya bene babuile mwano gwa uchwa wage guya gwuina kiine, bino benywe musili hummanana mumagile, ⁵³ Benywe mugaile m'bindo wa alago a malaika mushibaagile. ⁵⁴ Bibyo, habahuliche bibyo binywa baudilwe mitima bammitile bugigu. ⁵⁵ Yulu gee gubele iyiluchu mtima guhaha, guchengeteye meso make hekulu, gumonine bugengeda bw'Abeca na Yesu mkimanyu uboo ulume w'Abeca. ⁵⁶ Guganine lola namona gulu lyabugua na mwano gw'Adamu mkimanyu uboo ulume w'Abeca. ⁵⁷ Batele bigelegele wa lidi lyata, na bachibile matu mabo, bamkuilile wa langa limwechi. ⁵⁸ Bamtobwele hambuga ha mbuga, bamtele mawe. Ne mashahidi babiile bichibabo ha magulu na gumwe mmwalubaka gubele hugiswa Sauli. ⁵⁹ Bamtele Sitefano mawe, nage nusaba, guganine mlume Yesu, gaa mtima gwanyi. ⁶⁰ Gubangile machwi, gulilile wa lidi yata,mlume ushibaba bunobubi. hehuile udogoma bino gulalila. Sauli bugele humona bibenju wa uhagua wa Sitefano.