¹ Na habele hudogoma na baya batu, bibuli na mmata gwa ihuilo nabasadukayo babacuilile. ² Banogey mitima yulu ya Pedelo naYohana babakikiche batu na ulisamba mwano gwa uchuwa wa Yesu uhuma ubabu. ³ Babawatile, bababiile mmihambo mpaka halwelo, yulu isibele igolo. ⁴ Haho, bengi hawingi habo ha bene bahuliche iya inywa bawashiche na lubalo lwabo babele nahi balumiana sambi chitano. ⁵ Halwelo baosabu na baulu, na bagochi basumbile Yelusalemu. ⁶ Anasi ibuli yata, na Kayafa nage, na Yohana na Iskanda, na baya bose babele babuswa nake ibuli yata. ⁷ Hababile hawingi bababudiche, wa uoma wa nanyi na wa china lya nanyi benywe mwagila bino? ⁸ Noo Pedelo, gulimkiluchu mtima guhaha, kubasambile, benywe baosobu babatu na baulu ba baisilaeli. ⁹ Nambo tubebuchiwa lino mwano gwa itu ibenju yelikililwe guya mtu itende, bielihonine, ¹⁰ Manywe benywe bose na batu bose ba Islaeli ugana wa china lya Yesu Kelesitu gwa Nazaleti, guya gwa mususulem na Abeca amchulile uhuma u babu, walilyo china guno mtu kuagimana umeso menyu guli poo. ¹¹ Gee noo liwe lilengiwe na bagubai, nalyo lisili l iwe lyata lya msunga. ¹² Na hasi uhona uhitila gunge gegese, yulu hashi linge china hasi hagulu liabahelwe balanga msenge lilingie beswe uhonya nalio. ¹³ habamonine Pedelo na Yohana bashi hudidibwa ubamana ii batu bashi lwenyi, bashi na malango bagagilwe, babamanine ugana babele hamwechi na Yesu. ¹⁴ Habamonine guya miine guhonine mkimanyu hamwechi nabo bashibele na inywa ya ugaa. ¹⁵ babasambile utoboe hambuka na uhuma mmiya ihichi, bahungile bo wabo. ¹⁶ Baganine tubaite ii bano batu? Yulu bili hululu u batu bose balihushama Yelusalemu bululi ino isaga ya yata yagilwa nabo, tushina asha wihanya. ¹⁷ Yulu ino inywa ishichwe udgalala u batu bose, tubaite batindicha bashidogome iyaka namtu gegese wa lino china. ¹⁸ Babagitile, na ubaa mbila bashidogome ata na bashigikie wa china lya Yesu. ¹⁹ Pedelo na Yohana bagaile na babasambilem ugana ii kiine u meso ma Abeca umulicha benywe uli umulicha Abeca, tuononywe benywe bene. ²⁰ Yulu beswe tushinalea udogoma bikoko biatumonine na bya tuhuliche. ²¹ Nabo habahuile ubaita bitindi iyaka babasulile, bashimonine ndila gya ubaonona, yulu ya batu, bululi batu bose babele hukinuna Abeca yulu ya biya bienebikilie. ²² Yulu ya guya mtu mine gukililwe iya isaga ya ukona bubele na miaa alibu maumi mana. ²³ na habasulilwe, bakile u batu bubo naubambila miano gyose kiabasambilwe nabibuli byata na baulu. ²⁴ Nabo habahuliche, bagululwile wa Abeca madi mabo wa mtima gumwechi, baganine, Abeca mine lungu, gogue noo Abeca, gogue naubumbile gulu na sii na bahali na byose biene bili mnda bahali. ²⁵ Gogue uganine wa mtima guhaha wanyua a setu Daudi, mkichi gobe, yulu yai miogagiaita milungano, na tubila tulihucheelecha bubi? ²⁶ Maolo ma ino ibaloo maliongola, na tulombwe tuhunga hamwechi inyume ya mlume na wa Kelesitu gwake. ²⁷ Yulu ii winene, Helode na Pontio Pilato hamwechi na mioga na batu ba Isilaeli, basumbile mgino mbuga yulu ya mkichi gobe mmaha Yesu goshininye mauta. ²⁸ Bululi baite byose biene uboo obe na mihungo gyobe giolilangile utula ala gigilie. ²⁹ Bino mlume ulole bitindicha biabo, utuhe beswe bacha bobe udogoma inywa yobe wa nangu udidibwa. ³⁰ Ubegolola obe uhonya, bisaga na biloya bigiliye wa china lya mkichi gobe mmaha Yesu. ³¹ Na habahuile usaba Abeca, iya ihana yabasumbile idigile, batu bagiluchiwe na mmtima guhaha balisambile inywa ya Abeca wa nangu udidibua. ³² Ihichi ya bene bawashiche babele na mtima gumwechi na malanga mamwechi, na hashi bele mtu kukanine itundo yeli nayo ii yage buchima, babele nabyose uwatilichana. ³³ Bajhilwa balisambile ushuhuda wa uchua wa Yesu wa uoma wingi, na keene chingi chibele hegulu habo bose. ³⁴ Nashibele mtu hawingi habo mine kubele na lilo lya itungu, yulu bose bene babele na malagala namadu babugudiche, na baletile bumona ulamana na bieligudiche. ³⁵ babubiile umagulu ma bahilwa, batu bose bahelwe ulamama na lilo lyage. ³⁶ Na Yusufu, gukitilwe na bahilwa balnaba, (mana gyake mwana gwa uhungia), Mlawi mtu gwa Kipulo. ³⁷ Gubele na lubala gulukudiche, gulelite bumona, gububiile mmagulu ma bahilwa.