¹ Bibyo Pedelo na Yohana babele hungia w'ihuilo, mengo ma mpuku lubanga. ² Na gumwe mtu kubele itende ya ubutililwa kubele husua nabatu, gubele hubiwa masugu mose ha mchangu gwa uhuilo chima lago ubenda, yulu gabe husaba lutangi ubatu bugingila m'ihuilo. ³ Gugo mtu helimonine Pedelo na Yohana ugingila m'ihulo kubasabile gahewe lutangi. ⁴ Pedelo, kumlolile meso, hamwechi na Yohana, guganine, tulole beswe. ⁵ Gubalolile, guhembile bamme itu. ⁶ Haho Pedelo gumganine, nene nishi na bumona, na nolo, yine yandi nayo noo yandiuha. Wa china lya Yesu Kelesitu gwa Nazaleti, gimana ugie. ⁷ Gumpuatile uboo ulume, kumkimye, biohi biake nabiundo bya magulu bibiilwe uoma. ⁸ Kukimene abilo, gutilile ugyata, gukingile mnda mw'ihuilo hamwechi nabo, gukile na ugulwa naumtona Abeca. ⁹ Batu bose bammonine gulihukyata naumtona Abeca. ¹⁰ Bammonine, ugana noo guya gubele hushama na usaba ha mchango ubendo gw'ihuilo; bagagilwe na ugigilwa na bigilie weli. ¹¹ Hebele hubaumbatila Pedelo naYohana, batu baboongwele abilo uliya lagalo ligitilwe lugala lya Sulemani; bagakilwe. ¹² Bibyo Pedelo hemonine biya kubagaile baya batu, benywe baisilaeli, yulu yai mulihugakilwa na bino, yulu yai mulihutulola beswe. ¹³ Abeca a Ibulahimu a Isaka na Yakobo, Abeca a bamasetu, amkinuna mgichi gwake Yesu, guya mine benywe mumanene na ummanya u meso ma Pilato, helibehe huhano uonona wage gusulwe. ¹⁴ Bibyo benywe mumaninye guya mmaha, guya gwa kiine, mubendiche musulilwe mmagi. ¹⁵ Mummagile mmata gwa mwego, guya mine Abeca amchulile uhuma ubabo na beswe tumonine nameso. ¹⁶ Na uwasha wa china lyake lyammilta guno mtu uba na uoma gwa muli humona nauummana; na uwasha uya uli mnda mwake gee wamma guno uhona uwilile mbele gyenyu benywe bose. ¹⁷ Bino, babuswa, nigidi mugilile biya wa nangu umana, nahi tulombwe twenyu biatukilile. ¹⁸ Abeca alisambile ala guno mwano utunywa twa bambwa bose ugana Kelesitu gwisusulwa bino guaiwilicha iyo. ¹⁹ Libechiwe, na ugiwila, yulu bubi bwenyu buleelelwe, na machwe mengo ma uhola wa mtima ulamanana uba wa mlume. ²⁰ Yulu gammile Kelesitu Yesu gwamubulwe utula ala. ²¹ Bululi bibenjwe bamkea hegulu na bichwe bitu byose uba bahia, maganinwe na Abeca utunywa twa bambua bake bahaha utula ubutulilo bwa ibaloo. ²² Yulu Musa winene kuganine, mlume Abeca gwimginulila mbwa, m'bashiwenyu, nahi nene, mummuliche gee ubinywa byose bielidogoma nenyu. ²³ Na bibi mtu gegese mine gushimmulicha gukombwa guibagulwa na uhakwa na batu bake. ²⁴ Ehe, bambwa bose utula Samweli nabange bene bachuile hanyuma hake, bose badogomine mwano gwa mano masuku. ²⁵ benywe musili baana ba bambwa na bamalagano naya, nene malagene Abeca na bamasenyu, gusambile Ibulahimu, wa ibushi yobe tubila tosetwa mno m'ibaloo twihelelechiwa. ²⁶ Abeca, hehuile umpulula mkichi gwake Yesu, guelitilile uhila wenyu, na ubaheleleha benywe na umbagula kila gumwechi gwenyu na bubi bwake.