¹ Gumwe mtu china lyake Anania, hamwechi na mmachake Safila gukudiche bibia. ² Kubisile wa bubisa iba ya bumona bwake, na mmachake kumanine, guleshile iba imwechi ya bumona umagulu na bahilwa. ³ Pedelo gukanine, Anania, yulu yai ihingili yagilucha mtima gobe usambila mtima guhaha lulimi, na wa bubisa wabisa iba ya bumona bwawakucha lugala? Hobele nobio, ati bibele byobe? Na habihuile ⁴ ukuchiwa, bumona atibubele bobe? biaka wii na ubiya inywa mnda mtima kobe? Usamsambila mtu lulimi, wabicha Abeca. ⁵ Anania helihuliche bibyo binywa kee nugua, na uwa. Boba bwingi bugengile batu bose bene babuliche biya. Bawalubaga bachuile, na ummamba msanda na umtobola hambuga, na umchia. ⁷ Nahi hanyuma bihindi bitatu bya chuba mmachage nage gukingile, gushi na mwano gwa biene byagilya. ⁸ Pedelo gum'budiche, sambile, mugudiche liya lagala ubuya bumona/ gugaile, ehe, nabo. ⁹ Pedelo gumsambile, biliwii muahulichana umtondo mtima gwa mlume? lola magulu mabo bene bamchia mlumiobe mali hamchango, na gokwe buiguha na uusuala hambuka. ¹⁰ Wa usabutua gukuile umagulo nuwa, baya bawalubaga bokingile na um'banga kuahuwa; bamsualile hambuga, bamchiile hamwechi na mlumiake. Boba bwingi bugingile mlumbuga lose na ubatu bose bene bahuliche mwano. ¹² Na uhitila maboo ma bahilwa bigilie bisaga na bilaya bingi u batu, nabo bose babele na langa limwechi ha lagala lya Sulemani. ¹³ hawingi ha bose hoshibe ata gumwechi gushididibuile na ulamana nabo, batu bose babahele bahilua bunyemu. ¹⁴ Na bene bawashiche bagilile ubula wa mlume, balumiana na baachana bengi. ¹⁵ Na mmadila ma mata babele hubabiya basumwa mibamba mwa ndila ubyata, na mikeka yulu Pedelo g'Abeca, ata ichulichuli yage iude gegese gwabo. ¹⁶ Na bihichi bya batu ba mmabuga na mibamba mwa Yelusalemu basambene, bachuile na basumwa, na basumwa ba miishi, boose bahomine. ¹⁷ Ibuli yata na bose babele hamwechi nake, (babo noo babinyumbia bya basadukayo) bagiluchu buwa. ¹⁸ babawatile bahilua na ubabiya mmihambo. ¹⁹ Malaika na mlume gubukulile mchango gwa ihambo mpusuku, gubatobole, nukana, ²⁰ Giwe na ugimana m'ihuilo mubasambile batu binywa byose bya guno mwego. ²¹ Ibuli yata ichuile na bene babele hamwechi nage, basumbile batu na balacha na baulu bose ba bana baisilaeli batu wii hambo yulu babaguhe bahilwa. ²² Habahuile bakichi hashibamonine mya mmiihambo, bagiwile na uhana mwano. ²³ Balisambile, ihambo tuibanga ihambwe kolongecho na balochi bagimanyu hambele ha mchongo, hatuabugula, tusabanga mtu mndu. ²⁴ Bibyo solokoto gw'ihuilo na bata bubili huba huliche biya, bawatilwe na mashaka yulu yabo ino iki ibi wii. ²⁵ Gumwe mtu guchuile ubaha mwano ugana, baya batu bamwahamba mmihambo bali m'ihuilo, bagimanyu balihugigya batu. ²⁶ haho guya solokoto gukile hamwechi na baya bakichi, babaleshile ushi wa ugya nababula yulu basinine batu bashibate mawe. ²⁷ Hababaleshile, babashaminye m'balacha ibuli yata ibabudiche. ²⁸ Kukanine, ati tumsammbile wa uoma, mushigigie wa china lilio? Bino lolwe, mwahugilucha Yelusalemu na lugikia lwenyu, na mulihubenja ululuishicha mashi ma guya mtu hekulu hetu. ²⁹ Pedelo nabahiwa bagaile, badogomine, bilingie unyemia w'Abeca uli ubatu. ³⁰ Abeca a bamasetu amchulile Yesu, gwamuhakile benywe gwamusundie umti. ³¹ Gugo mtu Abeca amginune wa uboo wage wa ulume, gobe mmata nammonya, gabahe baisilaeli mtima gwa ulibecha, na uleelelwa bubi. ³² Na beswe tumonine bibyo bihisho, hamwechi namtima guhaha guine gubahele Abeca bose bene bali humnyemia. ³³ Nabo habahuliche bibyo baudilwe mitima gyabo, bahungile babahake. ³⁴ Gumwe mtu Falisayo, china lyake Gamalieli mgigia gwa m'bindo, gwa mnyemiwe na batu bose, gukimine m'balacha, gubasambile bahilwa batoboe hambuga wa mengo macho. ³⁵ Gubasambile, benywe balumiana ba Isilaeli mpe lwenge lulume biamli hubenja ukila bano batu. ³⁶ Yulu hambele ha mano masuku hachuile tenda, gulimoninye ugana gee mtu mmata, batu alibu uki china bamlamine, nage guhakilwe na bose bene bam'buashiche, basaliye na uchimina. ³⁷ hanyuma ha gugo hachuile Yuda Galilaya maya masuku na ugolwa machina, gubulile batu bengi, byoka biya nage guchimine na bose bam'bashishe basaliye bose. ³⁸ bino nihumdambila, mlilole na babo batu, balewe yulu guno mmungo na guno mkilo nambo gwahuma u batu, guibelea. ³⁹ Nambo gwahuma w'Abeca mushinaosha ugubela, mushiohue umonea mulihulwa na Abeca. ⁴⁰ Bagitabiche binywa byake, nabo hababagitile bahilwa, babahulile, na ubakanina bashigane wa china lya Yesu, hanyuma babaleile bakie wabo. ⁴¹ Nabo batoboile mliya balacha, baseelele yulu babalilwe uba balingie umuna abule yulu ya china lya Yesu. ⁴² Na kila lusugu mnda ihuilo nammadu mabo, bashi leile ugigia na ulisamba miano gwa Yesu ugana noo Kelesitu.