¹ Hanyuma ha masuku matano, Anania Ibuli yata, gusalile na bamwe aulu hamwechi nage na mdogomi gimwechi, Teltulo, nabo bamsambile Feliki miano gya Paulo. ² Paulo heligitilwe, Teltulo gutulile umshitki, guganine, yulu yobu tuli na talala, Feliki mgengeda, na yulu ya malanga mobe bigilwa bibe bidongiwa mguno mmoga gwetu. ³ Wa buswachi bose tulihubigaa byose biolihutuitila. ⁴ Nishihubenja uimia, nihuiusaba utuhuliche u binywa biicho wa keene chobe. ⁵ Yulu tuammona guno mtu m'bi, mtuchigua mmonywa u ayahudi bose m'ibaloo, iyaka gye noo msue gwa inyumbya ya Banazolayo. ⁶ Iyaka gutondile ubindula mpindo gwa ihuilo, tum'bwatile (tubendiche ummonona wa mpindo gwetu, ⁷ Haho elumepambwa Lisia guhiile, gumsapile mmaboo metu wa uuma, ⁸ gubasambile baya bene bamshitakile bachwe oli.). Gogue mine wa um'bucha bucha wipata mwano gwa byose biene biatuli humshitakila beswe. ⁹ Bayahudi nabo bamshitaki bakana bibyo noo byabili. ¹⁰ Na liwali heliginulile Paulo uboo, gudogome, Paulo gugaile, yulu gogue ulimgechi gwa milandu gwa guno mmoga wa miaa gingi, nilihulidogomena nene miine wa mtima gwa saso. ¹¹ Yulu unamana ugana mashinahita masugu umi na mopi tangu nachine ugya Yelusalemu yulu ya utambikila. ¹² Bana batu bashimonine m'ihuilo, nihubila paa na mtu, ata uita aluki msumbilo, nishimmisha yoyose msinagogi ata mnda mbuga. ¹³ Na bashi naosha ubisosobola u meso mobe biose biabalihunyinga nene. ¹⁴ Wa ino inywa nalibecha oli ugana wa giya ndila giabali huhita inyumbia, noo biandi humtambikila Abeca a bamasetu, na ubiwasha byose biene bili bilingane na m'bindo na byose bigolilwe mmigolo gya bambwa. ¹⁵ Nina maudakilo wa Abeca, ata babo nabo balihumalolela, ugana ubi uchulwa wa babu ba kiine na babii nabo. ¹⁶ Na nene nilihulialobecha u ino inywa na uba na malanga mashi na abachi u meso m'Abeca na u meso ma batu masugu mose. ¹⁷ Hanyuma ha miaa gingi ni huile na ubahilila batu ba mmoga gwanyi lutangi na biuhana. ¹⁸ Bambonine m'ihuilo nilihugila yulu ya bio, uu niligogolwe, nanishibele namsumbilo wala alugi, na habeleho bamwe Bayahudi bahuma Asia. ¹⁹ Biesuba bibenjo babo nabo uba hano umbele giobe na bashitaki, nambo bali na inywa yoyose yuu yanyi. ²⁰ Nambo bishi biya batu baganine, ii bubi nai buabalibamone wandi handikimene hambele ha balacha. ²¹ Ii iyulu ya inywa imwechi tu, handililila nimgimanyu hawingi habo, naugana, yulu ya uchulwa a babu noo ilihugita naononywe umbele gienyu lino. ²² Feliki gutindiyem bululu gubele mmane mwano gwa giya ndila wa hululu abisa, kuganine, ilumepambwa Lisia helichua noo handigeda milangu gyenyu. ²³ Gumsambile guya mmsobu gwa basolokoto geti Paulo gauswe, gobe ha ihana ya uenenywa na magenda mage nangu mtu gubachibila bum'buatilicha. ²⁴ Hanyuma ha mamwe masugu, Feliki guchuile hamwechi na Dulusila mmachage gubele myahudi, gutumine mtu umkita Paulo gammuliche mwano gwa uwasha guli wa Kelisitu Yesu. ²⁵ Paulo guilibele hulisamba langa liake yulu ya kiine, na uba na lingililo, na uonona wine wichua, Feliki gumonine boba gukanine giwila ukie ushama nambo nibi na ihana niugita iyaka. ²⁶ Hamwechi na bibyo, guudagile gwihewa bumona na Paulo, gumgitile nyendo chingi udogoma nage. ²⁷ Hawilile mina giopi, Feliki gumgaile Polkio Festo gobe liwali badala gyage, Feliki gubendiche ubaitila Bayahudi bisoga gumshigile Paulo mmambwe.