¹ Festo helihuile ugingila wisuba ya buliwali hanyuma ha masugu matatu gugile Yelusalemu uhuma Kaisalia. ² Ibuli yata na bata ba Bayahudi bamsambile mwano gwa Paulo, bamtendelela. ³ Na uumsaba iubu yulu yake, ugana gahane alagu gahiichiwe Yelusalemu, yulu babisame na uu mmaga mndila. ⁴ Feliki gubagaile Paulo gulihuuswa Kaisalia, nage mine gulihubenja uchwa uno hano hoka. ⁵ Gukanine, baya bene bina uosha hawingi henyu tugie nabo hamwechi bagie umshitaki, nambo hali inywa yoyose yibaya uli guya mtu. ⁶ Helihuile ushama wabo masugu inana ata umi, gugiwile Kaisalia, na chuba lyake lya mabili gushamine wisuba yage ya uonona, gumtile Paulo guchwe. ⁷ Helihuile, baya Bayahudi bene bachuile uhuma Yelusalemu baginene hoka nage, baletile mashitaki mengi magumu yulu yage, mabashioshiche um'bangisia. ⁸ Paulo gudogomine na ulidogomena, nene nishilubile inywa yulu ya m'bindo gwa Bayahudi, yulu ya ihuilo, ata yulu ya Kaisali. ⁹ Festo gubele hubenja ulibembelecha u Bayahudi gumgaile Paulo, gugaile, wi! ulihubenja ugya Yelusalemu uononywa u meso manyi yulu ya bibyo binywa? ¹⁰ Paulo kukanine, nene makimana hano umbele wa isuba ya uononwa ya Kaisali, noo hene hendilingie uononwa, nishim'balubile Bayahudi inywa, ata gogwe ugidi bibyo. ¹¹ Bino, nambo naluba, nambo nagila inywa ilingie uwa, nishihuhanya uwa, nambo kishi kiine ino inywa yabashitakila, hashi guimbia mmaboo mabo. Nihusaba ugia wa Kaisalia, gum'budiche Paulo ulihubenja uhia wa Kaisali! ¹² Bibyo Fesito helihwile udogoma na batu ba magogo, gugaile, Ulihubenja ugya wa Kaisli! bino wigya wa Kaisali. ¹³ Masugu wa masugu hamahuile uhita, Agilipa olo na Belmike bahiile Kaisalia, bamsambile Festo. ¹⁴ Na habashamine uya masugu mengi, Festo gumsambile olo mwano gwa Paulo, guganine, hano hali gumwe mtu gushigilwe na Feliki mmambwe. ¹⁵ Hene hebele Yelusalemu bibuli biata na baulu ba Bayahudi basambile mwano gwake, basabile nammonone. ¹⁶ Nibagaile gishi mishaminyi gya Baloma ummana mtu bunene, guya mtu mine gushitakiwa gushinamonana nabene ba mshitaki meso wa meso, na uhewa ihana ya ulidogomena yulu ya ushitakiwa wage. ¹⁷ Na hubasambile hano nishisingile, chuba lyage lya mabili nishamine wisuba ya uonona na umgisha guya mtu. ¹⁸ Na baya bene bamshitakile habakimene bashileshile inywa yoyose ibi, nahi biambile hulanga. ¹⁹ Baletile binge bya ubucha yulu ya inyumbia yabo boo bene, nayulu ya mwano gwa guya nake Yesu, mine guhuile uwa, nine Paulo guomenenye udogoma yulu ya mwego gwake. ²⁰ Na nene nimonine uyuma wa uenga umana wa hululu ya iyo inywa, nim'budiche nambo gulihubenja ugya Yelusalemu uononwa yulu ya bibyo. ²¹ Paulo gusabile, gabiwe mmaboo na Kaisalia gaononywe nage, nilagile gauswa mpaga biandimmila wa Kaisalia. ²² Agilipa gumsambile Festo, nene na nene nabahubenja umulicha gugo mtu. Gumkanine wimulicha mmeshi. ²³ Heluelo Agilipa guchuile hamwechi na Belnike bachale bya menga mailu bagingile ihana ya uhulicha milandu, hamwechi na baosobu ba basolokoto na bata ba mbuga, Festo gulisambe Paulo guhilwe wabali. ²⁴ Festo guganine, olo Agilipo, na benywe bose bene bali hqmwechi netu, mlihummona guno mtu, mine ilongo yose ya Bayahudi uya Yelusalemu ata na hano balihuusaba nabawatiliche, balihugodoa mdodo ugana guno gushilingie uba na mwego. ²⁵ Wandi nene nisamona ugana guogila ibalo yage gulingie gahague, na gee mine gubendiche gaononwe na Kaisalia, nibele hubenja umsula na uumila wage. ²⁶ Na nene nishi na mwano gwake gwa hululu gwa umgolela mlume. Wa bibyo nam'bia hano umbele wenyu, na asa umbele obe gogue, olo Agilipa, yulu guhuhua ubuchiwa-buchiwa nabe na inywa ya umgolela. ²⁷ Yulu nihumona hashi inywa ilina abachi ya nene umilila mmambwa, wa nangu umonya mashitaki maya mene magashitakiwa.