¹ Paulo gubalolile meso batu ba balacha, kuganine, babuswa, nene wa mtima hululu abisa nilimshame bisoga umeso m'Abeca ata lino. ² Ibuli yata Anania gubasambile baya babele bagimanyu hoka nage bammule wanywa age. ³ Paulo gumsambile gogue Abeca iuhula, ibambacha ili ishinyiwe luhemba. gogwe ulimshame ukonona nahi bilihugana m'bindo, na gogue wagana nahulwe inyume ya m'bindo? ⁴ Baya babele bakimanyu hoka bamkanine, wi! Waituwa ibuli yata y'Abeca? ⁵ Paulo kukanine, nisamana, babuswa ugana gee ii ibuli yata, yulu m'bigolwe, nangu udogomena mmata gwa batu bobe. ⁶ Paulo helimanine lumwe lubi ii Msadukayo na lunge lubi ii Mfalisayo, gusediche lidi lyake iya mbalacha, babuswa, nene nili Falisayo mwana gwa Felisayo, nene nilihuononwa yulu ya maudagilo ma uchuwa wa ubabu. ⁷ Helihuile udogoma bibyo hawingi ha Bafalisayu na Basadukayo hachuile biumano na sumbilo uhalingana. ⁸ Bululi Basadukayo basugana hashi uchulwa hoshi malaika na hashi mtima, Bafalisayo basuwashi byose biliho. ⁹ Habele mdodo guingi, bange bagochi ba lubi lwa Bafalisayo bakimene, bamdogomene Paulo bakanine, tushihumona bubi bobose mnda mwa guno mtu, nambo mtima au malaika gwa dogoma nage hali ibalo nai? ¹⁰ hachuile yumana yata, guya ilumepambwa gumonine boba Paulo gunachwa uhagua, gusambile basolokoto basale na umsapa wa uoma mmaboo nabo na ugingicha mnda mgumbo. ¹¹ Baya busuku mlume gugimene hoka na Paulo, gugamine, ubena mtima gwata, yulu biolilisambile miano gyanyi Yelusalemu, bilingie byoka biya ukielisambe u Baloma nao. ¹² Habuyele, Bayahudi bahulichenye, balihambile balihambile wa alago bashiiya na bashinywa mpaka ba mmage Paulo. ¹³ Na baya batu bene babele balagana biya babele uhima maumi mana. ¹⁴ Na bagile u bibuli byata naubaulu, bakanine tualihamba walago, tushitondi ata itu mpaga tummage Paulo. ¹⁵ Bino benywe hamwechi nabaulu ba balacha musambile ilumepambwa gammile uno wamli, mugane mulihubenja umana mwano bibenju abisa, na beswe tuimmembela undila na ummaga gushinahia. ¹⁶ Mmuabo na Paulo guhuliche mwano gwa uhunga wabo, gukile na ukingila mnda mgumbo na uumma Paulo mwano. ¹⁷ Paulo gugitile gumwe mmosobu gwa basolokoto guganine, mguhe guno mmwalubaka ummile wa ilumepambwa, yulu guina inywa ya umsambila. ¹⁸ Haho gumguhile, gummulile wa ilumepambwa, gumganine,Paulo, guya mmambwa, guangita guabenja nuuhieche guno mmualubaka guina inywa ya uusambila. ¹⁹ Guya ilumepambwa gum'buatile uboo nukia nage wibamba, na um'bucha wa menjwa, wina inywa nai yoli hubenja unganina? ²⁰ Gubanine, Bayahudi bahunga uusaba ummile Paulo mmeshi, um'bie umbele wa balacha, nuhi balihubenja uhulicha mwano gwake wa hululu. ²¹ Bino gokue ushigitabiche, yulu batu maumi mana na bilaha bali huumungila, balihamba wa ulagana bashiye na bashinywe mpaga byabimmaga, nabo bino balilongomanya, balihulolila ugitabwa obe. ²² Guya ilumepambwa gumleile guya mmualubaga galigile lwake, gumlakile, nangu usambila mtu gegese ugana wasambila bibyo. ²³ Gubagitile baosobu babili ba basolokoto kuganine, mubangie basolokoto sambi chibili biikia Kaisalia, na basolokoto maumi njui bachinyi Bafalishi, na ba masumo sambi chibili, ha saa chitatu cha busuku. ²⁴ Gubasambile babiye na nyama bamchinye Paulo, bamiechi poo wa liwali Feliki. ²⁵ Gugolile mkanda bino: ²⁶ Kalaudio Lisia wa liwali mgengada Feliki salamwa! ²⁷ Mtu gugo gwawaswa na Bayahudi, baba alibu ummaga, nakia na ichichi ya basolokoto nuumo nya, handahulicha mwano guugana gee ii mlumi. ²⁸ Na nene handibendiche umana iya inywa yaba mshitakila, niimsachiche umbele wa balacha. ²⁹ Nimonine ugana bamshataki yulu ya ubuchana bululu mbindo gwabo, bosamshitaki wa ibalo yoyose ilingie uhakua au uhambwa. ³⁰ Na handisambile ugana hebi aluki yulu ya guno mtu, noo yulu nammilo oli, nabasambila beya bene ba mshitaki, bachwe ulisamba mwano gwake obe, Salamua. ³¹ Haha baya basolokoto bamkuhile Paulo nahi biaba sambilwe, bammilile busugu busugu Antiokia. ³² Haluelo babaleile baya bachinyi ba Mafalasi bagie nage, nabo bagiwile lwabo mnda mkumbo. ³³ Na baya habahiile Kaisalia, na uuma liwali guya mkanda, na um'bia Paulo umbele wage. ³⁴ Nage helihuile usoma, gum'budiche, gogue wii mtu gwa mbuga nai? Helihuile usambilwe ii mtu gwa Kilikia. ³⁵ Gukanine, nihulicha gogue mengo michua baya bene bushitaki, gubasambile gauswe mndo gya buolo gya Helode.