¹ Benywe balumiana, bashi wetu na bamatata, pulichiwe, nalisambe umeso menyu. ² Habahuliche ugana gulihudogoma nabo lidi lya Iebulania bagililile ushama pii, guganine. ³ Nene na mmebulania, nibutilwe Talaso, mbuga gya Kilikia, nibeilwe mngino mbuga, umagulu ma Gamaliele, nigigiwe m'bindo gwa bamasetu wa hululu, mbele mtu gwa buosha umeso m'Abeca nahi biamli benywe lino. ⁴ Nibasusule batu ba Ndila gino ata ubahaka, nibahambile, nibatelile m'bihambo, balumiana na bauchana. ⁵ Nahi Ibuli yata biaile hushuhudia, na baulu ba balacha bose, bene bandihelwe nabo mikanda uhuma wabali nabahilile babuswa baya, nigile Damesiki, nabawate baya babele uya nabahile Yelusalemu bahambwe na uononwa. ⁶ Naho haho handibele hugia, nisibele huhia Damesiki, mengo mkunyia meno ubabwa lwenge lwingi luhumine hegulu, lundimiele ngubi chose. ⁷ Nikwile hasi, nihuliche lidi lilihusambila, Sauli, Sauli, yulu yai ulihususula? ⁸ Nimgaile, gogue wii nanyi mlume? Gusambile, nene noo Yesu Mnazaleti, mine golihususula gogue. ⁹ Baya babele hamwechi nanyi bamonine luya luenge, bashihuliche liyalidi lya guya mine gubele hundogomia. ¹⁰ Nikasema, naite ii, mlume? Mlume gusambile, gimana, ugingile Damesiki, namwano gwa byose byoli ganinywa ubigile. ¹¹ Na handibele nishihumona wa yulu ya ugema wa luya lunge, na ulombolelwa na maboo ma bene babele hamwechi nanyi, nigingile Damesiki. ¹² Bibyo gumwe mtu, Anania, guwilicha m'bindo, gushuhudiwe buumtu bwage na Bayahudi bose babele hushama uya. ¹³ Gunjuilile, gugimenehoka nanyi, kusambile, m'buswa Sauli, umone, nimginulile meso manyi moka maya mengo nimonine. ¹⁴ Guganine, Abeca a bamasetu usobola gogwe umane bieli hubenja, na ummone guya mine kiine, na uhulicha lidi liuhuma mmanywa age. ¹⁵ Yulu wabe shahidi gwake ubatu bose, wa biya biene biayamona na ubihuliche. ¹⁶ Bino, wasingila ii? Kimana, uchunjwe, ugogue bubi bobe, walilumbule china lyake. ¹⁷ Na handihuile ugiwila Yelusalemu, mengo mandibele husaba mnda ihuilo, mbele nahi mchiminye lwenyi. ¹⁸ Nimmonine Yesu, nage gusambile, Abilo, uhume Yelusalemu, bululi bashigitabicha ushuhuda obe yulu yanyi. ¹⁹ Na nene nimgaile, mlume, bagidi babo ugana nene nibele hubahamba m'bihambo baya bene balihuuwasha na ubahula mmasinagogi mose. ²⁰ Na mashi ma Sitefano mine guumonine hamageshilwe, na nene mbele mkimanyu hoko, nikitabiche, na uusa bichibabo byabo bene bammagile. ²¹ Nage kusambile, ligile lobe, yulu nene niuhila ugie koo u batu ba mioga. ²² Bammuliche mpaga iya inywa, bagodoile bose bakanine, mumunye mmino ibaloo, bululi gushilingie uba na mwego. ²³ Habele hugodoa na utela bilamba byabo na ugulula gulula ihuili hegulu. ²⁴ Guya ilume panbwa gubasambile Paulo gagingichiwe mnda mgumbo, kuganine gabuchiwe miano gyage wa uhulwa sangulo, bululi gumane yulu yai batu bagodoa biya. ²⁵ Na habahuile umamba migochi, Paulo gumsambile guya mmasobu gwa basolokoto gubele mkimanyu hoka nage, wii kiine wenyu ummula mtu mlumi nage gushi noo nonywa? ²⁶ Guya mmosobu gwa basolokoto, helihuliche bibyo gugile umsambila guya ilumepambwa, guganine, ulihubenja uita ii? yulu guno mtu ii mlumi. ²⁷ Ilumepambwa guchuile na um'bucha, sambile, wii mlumi? Paulo gugitabiche Ehe. Ilumepambwa kumgaile, nene nipashile bubuswa bubo wa ubugula wa bumona bwingi. Paulo guganine, na nene nili mlumi gwa ubuswa. ²⁹ Haho bene hubenja umpucha bachuile na umshiga. Na guya ilumepambwa gumonine boba, helimanine ugana ii mlumia, na yulu mmambwa. ³⁰ Lusugu lwage lwa mabili gubendiche umana wa hululu yulu yai guahilua na Bayahudi umeso ma bagechi ba milandu na uhambwa, guonguele bibuli byata na balacha lyose. Gum'biile Paulo hasi na um'bia umbele wabo.