¹ hatuhuile ushigana nabo tugile m'bahali, tuhiile kasi wa tanga limwechi, na chuba lige lya bubili tuhiile lodo na uhuma haya tuhiile Patala. ² hatupatile bwatu budabwa mpaga Foinike tuchimine na tuchuile. ³ Na batumonine Kipulo tuishigile uboo uachi, tugile mpaga shamu tusalile Tito, yulu ubo noo wisache buetu michigo gyake. ⁴ Hatuhuile ubamona bagigiwa tushamine ubo masugu njui, nabo bamsambile Paulo wa uoma wa mtima gashigiatile Yelusalemu. ⁵ Na hatuwiliche maya masugu tuchuile na uligila lucha, batu bose hamwechi na baacha uligile lwehe, batu bose hamwechi na baacha babo na babo, batushindiche mpaga hembuga, tubungile machwi um'beya na usaba. ⁶ Hatuhuile ulagana nabo tuchimine bwato nabo bakiwile umadu mabo. ⁷ Na batuhuile lwendo lwetu uhuma Tito tuhuile Tolemai, tuataninye babusu tushamine haya lusugu lumwechi. ⁸ Halwelo hage tuchuile, tuhiile Kaisalia, tugingile mmbuga gya Filipo, mlisambi gwa mwano gubenju, guya gubele hamwechi na baya njui, tushamine wage. ⁹ Gugo mtu gubele na bawa misiba bana, bachi nagonjwa, babele hubuwa. ¹⁰ Tusibele twahushamu uya masugu mengi, gumwe mbua china lyage Agabo gusalile uhuma ubayahudi. ¹¹ Helituhiile guguhile mchingo gwa Paulo, gulihambile umagulu na umaboo, gukanine, mtima guhaha gwakana bino, bibyo noo biene Bayahudi ba Yelusalemu biabimmamba mtu mine na guno mchingo,na guibiwa mmaboo ma bamioga. ¹² Hatuhuliche bibyo, beswe na batu ba haya tumtangelele gashisele ugya Yelusalemu. ¹³ Haho Paulo gugaile, muli huita ii, ulila na umoga mtima? Bululi nene wa uhima uhambwa, nilimiima ugya uhagua Yelusalemu yulu ya china lya mlume Yesu. ¹⁴ helihaminye langa lyetu, tushamine pii, tukanine, ubenja wa mlume na ugilie. ¹⁵ Hanyuma ha maya masugu guguhile tuhuaba tuetu tuselile ugya Yelusalemu. ¹⁶ Bamwe bagigiwa ba Kaisalia batulamene netu, bachuile na mnasoni, mtu gwa Kipulo, mgigiwa guala na mndi wage noo watuishama. ¹⁷ Hatuhiile Yelusalemu baya babusua batugaile wa saso. ¹⁸ Ata lusugu lwa mabili lwage Paulo gugile nehe wa Yakobo,na baulu bose bebeleo. ¹⁹ Hanyuma ha ubatanya, gubasambile miana giose gumwechi gumwechi Abeca biagilile uba mioga uumkilo gwake. ²⁰ Nabo habahuliche baginune Abeca,bamsambile mshiwetu, wamona bili Bayahudi babawasha biabali ukichingi, nabo bose bina buwa bwingi yulu ya m'bindo. ²¹ Nabo basambilwe miano gyobe, ugana ulihugigya Bayahudi bose bene balihushema u bamioga baleane na bya Musa, bashibahile baana babo ukumbi na nangu uluma mishaminyi guala. ²² Bino tuite wii? Winene bihulicha gogue wachua. ²³ Bino ugile ino inywa yatulihusambila, tuli na batu bana bene bali bahambwe na buhango. ²⁴ Ubaguhe babo batu na uligogole hamwechi naabo, na ubalipila babege miswe gyabo, batu bose bamane ugana guya mwano gwabasambile yulu yobe mlulimi, bululi gogue ulihugila bibenju na ugilila m'bindo. ²⁵ Wa yulu ya mwano gwa Bamioga bene bawashishe, tugolile na ubaha mmano gwa boo ulibagula na biene bilihutambikilwa umiishi na mashi na nyama giunyongwa ashi na lusengu. ²⁶ Hoka haho Paulo gubaguhile baya balumiana, na chuba lyake lya mabili gugile uligogola hamwechi nabo, gugingile m'ihuilo, gulisambile mwano gwa ueilicha chuba lya mgogwe, ata nalutangi luhananywe yulu ya kila gumwe gabo. ²⁷ Maya masugu njui hamabele alibu uwilila, baya hudi bene bahumine Asia bammonine ne mnda mu'ihuilo, babosongamanye batu bose, boo noo um'bwata. ²⁸ Bagodoile, na udogoma, benywe balumiana ba Isilaeli, mutu watiliche. Guna noo mtu gulihugigia batu bose na bihana byose inyume ya mmog gwetu na m'bindo ha ino ihana. Iyaka gwahuha bayunani gwabgingicha mnda m'ihuilo na guabiya sehu ino ihana ya ihaha. ²⁹ Yulu bammonine Tolofino, mmefeso, hamwechi nage mmbuga, mine gwabalangile ugana Paulo gumbingiche m'ihuilo. ³⁰ Mbuga gose gigingile asalulu, batu basumbile abilo abilo, bampuatile Paulo, bam'bulile, bamtobalile hambuka ha ihilo na michango noo uhambwa. ³¹ Na hababele huenga ndile gwimaga, mwano gummiile ilume pambua ya basolokoto uganu Yelusalemu mwagila alugi mbuga gyose. ³² Haho guguhile basolokoto na boosobu babo, gugile abilo ubaya batu, nabo habammonine ilumepambwo na basolokoto bake baloile ummula Paulo. ³³ Hanyuma ilumepambwe guhile, gumpuatile Paulo gugamine kahambwa wa tumangila tubili, gubudiche, mmanyi gugu? Iyoka gwaita ii? ³⁴ Bange hawingi ha sumbilo bagodoile baganine bino, na bange bino. Haha hebele gushi na mwano gwa hululu yulu ya guya mdodo, kubambile bamkingiche mnda mkumbo. ³⁵ Na Paulo helihuile umpambako basolokoto bamtundule yulu ya uoma wa sumbilo. ³⁶ Yulu ihichi yata batu imlamine, bagodoile, na ugana mmunyiwe gugu. ³⁷ Nage helihuile uhiichiwa mnda mkumbo, Paulo gumsambile ilumepambwa, unabenja nuu sambile inywa? Nage gumgaile we! Ugidi Iyunani? ³⁸ Gogue ushi guya mmisili nabele na mano masugu buitile batu ukichina uba na mmonywa, bagitilwe bahagi, gubagolwele mgala. ³⁹ Paulo kuganine, nene ni mtu gwa Iyahudi, mtu gwa Talaso, mbuka gya Kilikia, mshami gwa mbuka gishi gya tulema. Nusaba, undeye nadogome na bano batu. ⁴⁰ Bino, helimmele uhulichina, Paulo gugimene umpambago, gubaginunine uboo wage baya bene mbuka na habele pii abisa, kudogomine nabo mlidi lya Iebulania, kuganine.