¹ Iya ichundo haihuile, Paulo gubagitile bagigiwa naubaha mtima. na ulagana nabo hanyuma guchuile na ugia Makedonia. ² Nage helihuile uhita chiya ngubi ubahungia wa binywa bingi, guhiile ubayunani. ³ Hehuile uchama ubo miechi gitatu, Bayahudi bamkilile bya bahali, helimonine bibyo gulangile gagiwile guhitile Makedonia. ⁴ Batu balomene nage m'ba, Sopatalo gua Beloya, mwana gwa Pilo, na Alistalko na Sekundo, batu ba Tesalonika; na Gayo mtu gwa Delebe, na Timoteo, na Tikiko na Tolofimo batu ba Asia. ⁵ Babo batu bahuile ubangua balihutuhemba uya Toloa. ⁶ Na beswe tuhitile ndila gya bahali uhuma Filipi chuba lya mikati gishigibiwe mshimi hanyuma ha masuku matano tubabangile Toloa. tushamine haya masuku njui. ⁷ Na lusugu lwa lutangi lwa yinga, hatusumbile yulu ya uhua mkati, Paulo gubasambile gulihulanga ugya lusugu lwa mabili lwake, nage gugililile ulisamba mpaga mkundu gya busugu. ⁸ Habele na matatu mengi mmiya yumba ya hekulu mwatubele basumbile. ⁹ Gumwe mmwa lubaga china lyake Eutiko, kubele mshame udilisha, guwatilwe na tulo tuingi, Paulo heligililile ulisamba, gulemenywe na tulo tuingi guguile uhuma hegulu uyumba ya butatu, gutolilwe mmube. ¹⁰ Paulo gusalile hasi, guligololile hegulu hage na umumbatila, gubasambila, nangu uiswa alugi guile na mwego. ¹¹ Hanyuma gugiwile iyaka hegulu guhuile mkati, gulile, gugililile ulisamba mwano mpaga halwelo, nage nuuligila. ¹² Bamtile guya mmwalubaga, guli poo, buhungilwe wa mmungio gwata. ¹³ Bibyo beswe tubangilwe uchina m'bwato mbele gya Paulo, tusibele alibu na Aso, gulangile umchinya Paulo ubo, yulu noo bielilagile, gee gubendiche ugita na magulu. ¹⁴ Helitubangile uya Aso, tumehiminye, hanyuma tuhiile Miletene. ¹⁵ Na beswe tuchinine bwato uhuma ubo, na lusugu lwa mabili lwake tubele alibu na uhia Kio, lusugu lwa matatu tuhuile Samo,tushamine Tologilio, lusugu lwa mana tuhiile Mileta. ¹⁶ Yulu Paulo gubendiche uhita Efeso m'bwato, gashichwe usinga mshi gya Asia, yulu gubele abilo, gulihubenja uhia Yelusalemu, nambo biewechegana. ¹⁷ Haya Mileto Paulo guhile batu ugya Efeso gubagitile bautu ba lubunga. ¹⁸ Habahiile weli, gubasambile, benywe bene mugidi utula lusugu lutangi hano Asia biandibele uno wenyu mengo mose. ¹⁹ Biandi humkilila mlume wa holelelo giose, na wa biosochi, na w'utonjwa upatile uhuma ubahahudi wa buhulihuli. ²⁰ Yulu nishilichibile ubasambila mwano gogose ilingie ubawatilicha, bululi nimgikiche wa hululu na ndu wa ndu. ²¹ Nibasambile Bayahudi na Bayunani ndila gya umgilila Abeca, na um'bwasha mlumietu Yesu Kelesitu. ²² Bino, lolwe, namona nagya Yeusalemu uu nilimmambwe mnda mtima, na nishibigidi byene bienjuile ubo. ²³ Wa mtima Guhaha mbuga wa mbuga gulihudogoma ugana uhambwa na asusu bilihupenda. ²⁴ Bino niehihubagala mwego gwanyi uba itundu ya ibenju wandi nahi biya uhua lwendo lwanyi na mkilo guya gwandihelwe na mlume Yesu, ulisamba mwano gubenju gwa keene gya Abeca. ²⁵ Lolwe, nene nigidi ugana benywe bose bene bandisambile yulu ya buolo bwa Abeca, nigile ubo na ubo mushimona yenyi yanyi iyaka. ²⁶ Wa bibyo nilihumsambila lino chuba, nene nishi na abachi a mashi ma mtu gegese. ²⁷ Yulu nishibumbile milomo nangu umsambila mwano gwa lwendo lose lw'Abeca. ²⁸ Muyeshe benywe bene, naiyo ihichi yose nayo, yine yam'bia mtima guhaha benywe uba bolochi waili, muoshe ululisha lubunga lwake Abeca, yeligulile wa mashi mage gemine. ²⁹ nigidi bibenju hanyuma ha uhuma wanyi nene milunga gya buhuchi giegingila wanyu, bashiimonena ihichi kene. ³⁰ Na hawingi henyu benywe bene higinwa batu, bobihudogoma binywa bisone, na bababule bagikiwa na babalame boo. ³¹ Wa bibyo muyeshe, mwengeleche ugana miaa gitatu, busugu na chuba, mishileile ummonya mtu gegese wa biosochi. ³² Wabino na m'bia mmaboo m'Abeca na inywa ya keeme chage, inaosha ubagubaa na uuma buhiana hamwechi nabo bose bene bahahachiwe. ³³ Nishibendiche bumona,nalo, ata bisanjwa bya mtu. ³⁴ Benywe bene mugidi ugana wa maboo manyi mano magilile yulu ya biambele hubenja na wa baya babele hamwechi nanyi. ³⁵ Wa biose nimmoninye mlingilisho gubenju wa ugila mgilo na uwatilisho gubenju wa ugila mgilo na uwatilicha tulema, na ubiengelecha binywa bya mlume Yesu, bieliganine geemine, luhanga luhana ulilwa uhewa. ³⁶ Helihuile udogoma bibyo gubungile machui na usaba hamwechi nabo bose. ³⁷ Balilile bose abisa, bamguilile Paulo mioshi, na umumbatila-umbatila. ³⁸ Bammonine konywa yulu iya inywa yedogomine, ugana bashimmona iyaka yenyi yage, bamshindiche mpoga ubwato.