¹ Hanyuma Daudi guganine, Wi wii! Hashigele gumwe mtu mnda ndu gya Sauli, yulu namgilile bisoga yulu ya Yonathani? ² Habele na gumwe mgichi gwa Sauli, china lyage Siba, bamgitile gagye uli Daudi; na oolo gum'budiche, Gogwe noo Siba? Nage gumgaile noo Nene, mcha gobe noo gee. ³ Oolo guganine, Wi wii! Hashi ata bino mtu gwa ndu gya Sauli, naoshe umgilila misa gya Abetcha? Siba gumsambile oolo, Yonathani gwina mwaana ata bino, gwina ilema ya ugulu. ⁴ Oolo gumsambile, Guli uhi? Siba gumsambile oolo, Loola, guli mnda ndu gya Makili, mwaana gwa Amieli, uya Lo-debali. ⁵ Haho oolo Daudi guhilile batu, gummuminye mnda ndu gya Makali, mwaana gwa Amieli, uya Lo-debali. ⁶ Bibyo Mefiboshethi, mwaana gwa Yonathani, mwaanagwa Sauli gugile wa Daudi, gugwile m machwi, guginamine. Daudi guganine, Mefiboshethi! Nage gugitabuwile, Nene guno, mcha gobe! ⁷ Daudu gumsambile, Ushimone booba, yulu hashi dugwa niugilile misa; yulu ya sobe Yonathani, nene niugiwidicha mabala mose ma Sauli, sobe; na gogwe wiilamiliwa u mesa manyi masugu mose. ⁸ Guginamine, guganine, Nene mcha gobe nili ii, ndaa na umlingamine awa a aube nahi nene? ⁹ Haho oolo gumgitile Siba, mcha gwa Sauli, gumsambile, Bitundu byose byine bibele bya Sauli na bya ndu gyage namma mwaana gwa mlumyobe. ¹⁰ Na gogwe wimlimina gigyo sii, gogwe, na baana bobe, na bacha bobe; gogwe wimlushisha mwaana gwa mlumyobe biguma byage, gabe na biliwa gaaye; alakini Mefiboshethi mwaana gwa mlumyobe, gwiiya iliwa u mesa manyi masugo mose. Bino gugoSiba gubele na baana umi na batano na bagichi maumi mopi. ¹¹ Bibyo Siba gumsambile oolo, Nene mcha gobe, niita bibyo byosenahi mlumyanyi, oolo, byawasambila. Na wa yulu ya mwano gwa Mefiboshethi, oologuganine, Gwiiya u mesa manyi, naho gumwe gwa baana ba oolo. ¹² Gugo Mifiboshethi gubele na mwalubaga china lyageMika, na Nabatu bose bene babele mnda ndu gya Siba babele bacha na Mefiboshethi. ¹³ Bibyo Mefiboshethi gushamine Yelusalemu; yulu gubele huya liwa masugu mose u mesa ma oolo; nage gubele na ilema ya magulu mose mopi.