¹ Bibele hanyuma, Daudi gugiwatile Gathi na tusoi twage uhuma m maboo ma babo Bafilisti. ² Gulwile Moabu, gubalingilile na mgochi nabo bali balachu hasi; gulingilile migochi gibili gwa uhagwa, namgochi gumwechi gose gwa uusa mwego. Bamoabi bo nuuba bacha ba Daudi, balushishe mmaso. ³ Iyaka Daudi gummulile Hadadezeli mwaana gwa Lehobu, oolo lya Soba, helibele hugya uliengela iyaka uhyilila wage uya Uludi. ⁴ Daudi gumsapile bachinyi ba falasi uki na sambi njwii na basolokoto bene babele hugyata na magulu uki maumi mopi; Daudi guchigedile mii falasi chose cha tubilibili, alakini falasi cha tubilibili sambi guchishigile. ⁵ Na Bashami ba Dameski habachwile um'bwatilicha Hadadezeli, oolo lya Soba, Daudi gubahagile Bashami batu uki maumi mopi na bopi. ⁶ Daudi gubiile huo uya Shamu ga Dameski, na babo Bashami boo nuba bacha ba Daudi, balushishe mmaso. Nage Mlume gummele Daudi uhima o ose wine weligile. ⁷ Iyaka Daudi dusapile ngabo cha nolo chine cibele chichwalwe na bacha ba Hadadezeli, guchileshile Yelusalemu. ⁸ Iyaka uhuma Tebhathi na uhuma Belothai, mabuga ma Hadadezeli, Daudi guwatile mmubo gwingi abisa. ⁹ Na Tuo, oolo lya Hamathi, helihuliche ugana Daudi gwaalwa basolokoto bose ba Hadadezeli. ¹⁰ Tou gummilile Hadolamu mwanage wa Daudi ugya umtanya, na ummalila mihaa, wa ibalo gulwile na Hadadezeli, na ummima; yulu Hadadezeli gubele lulwa bita na Tou. Na mmuboo wage gulushishe bitundu bya lusuu, na bitundu gya nolo, na bitundu bya mmubo; ¹¹ biibi nabyo Daudi gibibiile bibagulwe yulu ya Mlume, hamwechi na lulo lusuu, na nolo, chine chibagulwena mioga gyose gyine gyelihimine; ¹² Na Edomu, na Moabu, na baana ba Amoni, na ba Bafiisti, na ba Ameleki, na byakole cha Haddezeli, mwaana gwa Lehobu, oolo lya Soba. ¹³ Bibyo Daudi gulihele china, mengo meligiwile ubalwa Baedomu wibetabeta ya Miinyu, batu uki umi na inana. ¹⁴ Gubiile basolokoto buusa huo uya Edomu; hawingi ha Edomu yose gubiile huo, na Baedomu bose babele bahilwe na Daudi. Nage Mlume gummele Daudi uhima o ose wine weligile. ¹⁵ Daudi guhyilile hegulu ha Isilaeli yose; nage Daudi gubaitile uonona na kiine batu bage bose. ¹⁶ Gugo Yoabu, mwaana gwa Seluya mine gubelehegulu ha basolokoto; na Yehoshafati, mwaana gwa Ahiludi, mine gubele hugola masugu ma mwechi, ¹⁷ na Sadoki, mwaana gwa Ahitubu, na Abimeleki, mwaana gwa Abiathali babele bibuli; na Shausha mgochi; ¹⁸ na Benaya, mwaana gwa Yehoyada, gubele hegulu ha Bakelethi na Bapelethi; nabo baana na Daudi nuuba bibuli.