¹ Habele oolo gubele hushama mnda ndu gyage, haya Mlume heli mshaminye, gashidegiwe na tumangu twage twine tubele tumchunguluwe ngubi chose, ² oolo gumsambile Nathani, mbuwa, Lingamina bino, nene nilimshame mnda ndu gya miamba, alakini lindo lya Abetcha lilihushama mnda mapasiya. ³ Nathani gumsambile oolo, Bino itaga byose byolihulanga mnda mtima gobe; yulu Mlume guli hamwechi nobe. ⁴ Haho boka bubo busugu, inywa ya Mlume imchwilile Nathani ugana, ⁵ Ugye umsambile mgichi gwanyi, Daudi, Mlume gwagana bino, Wi wii! Gogwe wingubaila ndu, nashame mnda mwagyo? ⁶ Bululi nene nishishamine mnda ndu, utula lusuguluya lwandibahuminye baana ba Isilaeli mnda sii gya Misili, ndaa na lino, alakini nishamine mnda hema na bushamo. ⁷ Bihana byose byandigile na baana na Isilaeli bose, Wi wii! Nidogomne inywa yo yose na mtu ge gese gwa tululiya twa Isilaeli, gwandilagile ubalisha batu banyi Isilaeli, niganine, Yulu yai mushigubaile ndu gya miamba? ⁸ Bino, hano, umsambile Daudi mgichi gwanyi, bino binywa, Mlume gwa bilume pambwa gwagana bino, Niuguhila mnda liha lya myoo, ubele hulamana na myoo, yulu uba mmata hegulu ha batu banyi, hegulu ha Isilaeli. ⁹ nene nibele hamwechi nobe use oligile, na ubachinga koo ba tumangu tobe tose u mbele obe; nene niuitila chinalyobe uba lyata, nahi machina ma baata bene bali mnda ino ibaloo. ¹⁰ Iyaka Nibasungila Isilaeli batu banyi ihana, nene nibauna, baoshe usha mnd ihanayabo boo bene, bashihunyiwe iyaka; ata baana ba bagugichu bashimsusula iyaka, nahi haya habutulilo; ¹¹ ehe, nahi bibele masugu maya mandisambile ba tululiya, babe hegulu ha batu banyi Isilaeli; nene niuita ulituche u mbele wa tumangu tobe tose. Iyaka Mlume gulihuusambia ugana, Mlume gwiugubaila ndu. ¹² Gogwe masugu mobe hamiwilila, wilala na bamasobe, niginuna lubuto lobe hanyuma hobe, mine gwihuma mnda lubunda lobe, nene nibuita bugimanyu buolo bobe. ¹³ Gee noo gwigubaa ndu gya china lyanyi, nayo isuba ya buolo bwage niyiita igimanyu milumbu, ¹⁴ Nene nibi sage, nage gubi mwananyi; gabeita bisone nimmula na ati a bumtu na wa bihulo bisuhulwa baana. ¹⁵ Alakini yano yanyi ishimmuma, nahi biya byandihuminye wa Sauli, gwandihuminye u mbele obe. ¹⁶ Na ndu gyobe, na buolo bobe, byigimiwa milumbu u mbele obe. Nayo isuba yobe yiiswa igimanyu milumbu. ¹⁷ Wa binywa bibyo byose na wa malo mamo mose, noo bidogomine Nathali uli Daudi. ¹⁸ Bibyo Daudi, oolo, gugingile, gushamine u mbele wa Mlume, guganine, Nene ni nanyi, Mlume, Abetcha, na ndu gyanyi m yii, na unjwishe ndaa na hano? ¹⁹ Iyaka ino ikoko ibele icho u meeso mobe, Ee Mlume, Abetcha; na ulushe mwano gwa ndu gyanyi, mcha gobe, wa myaa gingigyine gyichwa hanyuma; na bibyo nahi bya batu, Ee Mlume, Abetcha. ²⁰ Na nene, Daudi, nuusambile iyaka ii ya uhima? Nambo gogwe wammana mgichi gobe, Ee Mlume Abetcha. ²¹ Wa yulu ya iyo inywa yobe, na wa mtima gobe gogwe mine, wagila bwa byata bibyo byose, yulu umlumbulule mcha gobe. ²² Wa bibyo,gogwe noo mmata, Ee Mlume Abetcha, bululi hashi gunge nahi gogwe, na hashi ange Abetcha alakini m gogwe ka, wa ulamana na byatuhuliche na matu metu. ²³ Iyala m mmoga nai m miino ibaloo nahi batu bobe, nahi Isilaeli, gwine gweligile uguhogonona yulu yage, babe batu bage gee mine, guliitile china, na ugila bikoko bya byata wa yulu yenyu, na bikoko bya umonya booba wa yulu ya sii gyobe, u mbele wa batu bobe, bolihogonone uhuma Misili babe bobe,, uhuma mnda mioga gya utambikila miishi gyabo. ²⁴ Gogwe uligimiile miima batu bobe Isilaeli, babe batu bobe milumbu; na gogwe, Mlume, uli Abetcha abo. ²⁵ Bino hano, Ee Mlume Abetcha, iya inywa yoliganine yulu ya mwano gwa mcha gobe, na yulu ya mwano gwa ndu gyobe, uigimiye milumbu, wagile nahi byoliganine. ²⁶ China lyobe na litonywe milumbu, ugana, Mlume gwa bilume pambwa noo Abetcha hegulu ha Isilaeli; na ndu gya mcha gobe, Daudi, lyigimana u mbele obe milumbu. ²⁷ Bululi gogwe, Mlume gwa bilume pambwa, Abetcha a Isilaeli wakununila nene, mcha gobe, ugana, Niugubaila ndu; wa bibyo nene, mcha gobe, namona bisoga mnda mtima gwanyi nuusabe luno lusabo. ²⁸ Na bino, Ee Mlume Abetcha, gogwe, noo Abetcha, na binywa byobe noo winene, na gogwe umlagile mcha gobe ino ikoko isoga. ²⁹ bino hano, ube mmochu, wagihalile mihaa ndu gya mcha gobe, gibe gigimanyu milumbu u mbele obe; bululi gogwe, Ee Mlume Abetcha, ubidogomine na wa mihaa gyobe ndu gya mcha gobe na guhalilwe mihaa milumbu.