¹ Bibele hanyuma, oolo lya baana ba Amoli gee nuuwa, mwaanage Hanuni gee nuhyilila ha ihana yage. ² nage Daudi guganine, Nimmitila bisoga Hanuni, mwaana gwa Nahasi, naho sage byelingitile nene bisoga. Haho Daudi guhilile mmungyo mnda uboo wa bagichi bage, yulu ya ummocha mtima yulu ya myano gya sage. Bagile bagichi ba Daudi mnda sii gya baana ba Amoni. ³ Alakini bahela ba baana ba Amoni bamsambile Hanuni, mlumyabo, Wi wii! Wamona ugana Daudi gwamnyemya sobe wa uhila uli bahungya? Wi wii! Daudi gusabahila bagichi bage oli yulu ya ugilola mbuga, na ugidinda, na ugichimya? ⁴ Bibyo Hanuni gubaguhile baya bagichi ba Daudi gubabegile isunyi ya alembe abo, gubagedila bichwalaganywa byabo m'bwingi, ndaa na umatao, gubalediche baligile lwabo. ⁵ Batu habamsambile Daudi gugo mwano, guhilile batu ubagaa; bululi babo batu babele badambe mmee abisa. Oolo guganine, Hembwe haho Yeliko, ndaa na byimena alembe enyu, noo mwabegiwila. ⁶ Na baana ba Amoni habamonine ugana bisili bya uonywa wa Daudi, baana ba Amoni bahilile na ubahiga Bashami na Bethlehobu, na Bashami ba Soba, basolokoto uki maumi mopi, na oolo lya Maaka gee mine na batu uki, na batu ba Tobu batu uki umi na chibili. ⁷ Nage Daudi helihuliche mwano gumtumine Yoabu, na basolokoto bose na bilume pambwa. ⁸ Baana ba Amoni bagimene, babiile mihamba gya bita ha bugingililo bwa limbwa; na Bashami ba Soba, na ba Lehobu, na batu ba Tobu, na batu ba Maaka, babele boo buchima mnda mabala. ⁹ Bibyo Yoabu helimonine ugana yenyi ya bita isile u mbele wage na unyuma, gusobole bamwe m ba basobole bose ba Isilaeli, gubabiile hegulu ha Bashami; ¹⁰ gubabiile mitima giomu batu bene bashigele mnda uboo wa Abishai, mshiwabo, gubaluliye hegulu ha baana ba Amoni. ¹¹ Yoabu guganine, Nambo Bashami bahuba na uoma abisa wandi, haho gogwe wimbwatilicha, alakini baana ba Amoni bahuba nauoma abisa oli, haho neneniichwa uuwatilicha gogwe. ¹² Ube na uoma, tulibiya mitima gyata, wa yulu ya batu batu, na wa yulu ya mabuga ma Abetcha etu; nage Mlume gaite byine bili bisoga u meeso mage. ¹³ Bibyo Yoabu na batu bene babele hamwechi nage bashenine ulwa na Bashami; nabo Bashami basinine u mbele wage. ¹⁴ Na baana baAmoni habamonine ugana Bashami basina, basinine nabo u mbele wa Abishai, bagingile m mbuga. Haho Yoabu gugiwile uhuma u baana ba Amoni, guhiile Yelusalemu. ¹⁵ Na Bashami habalimonine ugana baiswa u mbele wa Isilaeli, basumbile. ¹⁶ Nage Hadadezeli guhilile batu na ubalusha Bashami bene babele m'bwala mwa Luudi; nabo bachwile Helamu, nage Shobabi, ilume pambwa ya basolokoto ba Hadadezeli, gubagolwele. ¹⁷ Halisambilwe Daudi, gusumbiche Isilaeli yose, gudabwile Yolodani, guhiile Helamu. Nabo Bashami balibiile pinda biswa gya Daudi, balwile nage. ¹⁸ Bashami basinine u mbele wa Isilaeli; nage Daudi gubhagile hawingi ha Bashami, batu ba tubilibili sambi njwii, na bachinyi ba falasi uki maumi mana, nage gummagile guya Shobabu, ilume pambwa ya basolokoto babo, nage guwilile uya. ¹⁹ Na maoolo mose mene mabele humudagila Hadadezeli habalimonine uga baiswa u mbele wa Isilaeli, baitile talala na Isilaeli, babagilile migilo, Bibyo Bashami bamonina booba ubawatilicha baana ba Amoni iyaka.