¹ Na habele, ubutulilo bwa mwaa guhya, mengo masuhuma maoolo na ugya u bita, Daudi gummilile Yoabu, na bagichi bage hamwechi nage, na Isilaeli yose; babachiminye abisa baana ba Amoni, Bagichunguluwe Laba. Alakini Daudi gee mine gushamine Yelusalemu. ² Hamahiile mengo maigolo, Daudi gubyuwile wiingo, gugyatile hegulu ha butato bwa ndu gya oolo; nanhelibele hegulu ha butato gumonine mmachana gulihulisuwa; nage gugo mmachana gubele hungwe abisa, gwa ubenjiwa na meeso. ³ Nage Daudi guhilile, gubudiche mwano gwa guya mmachana. Gumwe mtu guganine, Wi wii! Gugu gushi Beth-sheba, msiha gwa Eliamu, mmachi gwa Ulia, Mmiti? ⁴ Haho Daudi guhilile batu, gumguhile; nage gugingile wage; nage gulalile nage; (bululi guya mmachana gusibele mmahachu uhwa bunyenye bwage); hanyuma guya mmachana gugiwile u ndu gyage. ⁵ Guya mmachana guswalile gumo; guhilile mwano na umsambile Daudi, ugana, Nisili na bushito. ⁶ Haho Daudi guhilile mwano wa Yoabu, guganine, upilile Ulia, Mmiti, Nage Yoabu gummilile Ulia wa Daudi. ⁷ Ulia heligile wa Daudi, Daudi gum'budiche mwano gwa Yoabu, na mwana gwa batu, na mwano gwa bita. ⁸ Daudi gusambile Ulia, Bino ugye u ndu gyobe, ulisuwe magulu mobe. Haho Ulia guhumine mnda ndu gya oolo, na binga lya biliwa bimlamine Ulia hanyuma, byine bihumine wa oolo. ⁹ Alakini Ulia gulalile ha mchango gwa ndu gya oolo, hamwechi na bagichi bose ba mlumyage, na gushigileu ndu gyage. ¹⁰ Batu habamsambile Daudi ugana, Ulia gushigile u ndu gyage, Daudi gumsambile Ulia, Wi wii! Usachwa uhuma lwendo? Yuluyai usagya u ndu gyobe? ¹¹ Nage Ulia gumsambile Daudi, Lindo, na Isilaeli, na Yuda, bali bashame m'bitulatula; na mlumyanyi Yoabu, na bagichi ba mlumyanyi, beli bagimiye bitulatula bya hululu u mgala; na nene nagye u ndu gyanyi, uya na unywa, na ulala na mmachanyi? Byoli na mwego, na nahi bili luhuda lobe na mwego, nene nishihisha iyo ihisho. ¹² Haho Daudi gumsambile Ulia, Shama iyaka hano lino, na mmeshi niulecha uligile lobe. Bibyo Uia gushamine Yelusalemu luya lusugu, na lusugu lwa bubili lwage. ¹³ Nage Daudi gumgitile, gulile na unywa u mbele wage; nage gummochiche; ndaa na mengo maigolo guhumine nuugya ulala wingo yage hamwechi na bagichi ba mlumyage, alakini gushigile u ndu gyage. ¹⁴ Na haluhiile lwelo, Daudi gumgolele Yoabu mkanda, guguhilile m muboo wa Ulia. ¹⁵ Gugolile mnda gugo mkanda, ugana, Wam'biya Ulia u mnelewineuli bati na bita bya bigumu, hanyuma wagiwile, wamshige, yulu bamlwe, na gaawe. ¹⁶ Bibyo Yoabu helibele huchunguluwa mbuga, gum'biile Ulia ha ihana yine ibele bilume pambwa. ¹⁷ Batu ba mmbuga bachwile, na ulwa na Yoabu; na bamwe batu, bagichi ba Daudi, bagwile, Ulia Mmiti nage guwile. ¹⁸ Bibyo Yoabu guhilile na umma Daudi mwano gose gya bita; ¹⁹ Gumlagile guya mine guhililwe, ugana, Holihwa umma Daudi mwano gose gwa bita, ²⁰ nambo sungu cha oolo chilama, gabe usambila, Yulu yai mugishenene giya mbuga yulu ya ugilwa? Wi wii! Mushimanine ugana bitela migwi gyabo hma wibambacha? ²¹ M nanyi gummagile Ahimeleki, mwaana gwa Yelu-beshethi? Wi wii! Gushi mmachana mine gumtelele liwe lya uhelela lya pelo uhuma hegulu ha ibambacha? Ndaa na byeliwile uya Theseshi? Yulu yai ushenena ibambacha biya? Bibyo gigana, Mgichi gobe Ulia Mmiti, gwaawa nage. ²² Bibyo guya mine gutuminywe gugile, guhiile na ummonya Daudi byose byelimtumine Yoabu. ²³ Guya mine gutuminywe gumsambile Daudi, Babo batu batuhimine, batutobwele hambuga ha ndaa na mgala, tuhimene nabo ndaa na ubugingililo bwa limbwa. ²⁴ Bashi ba migwii batutelele beswe, bagichi bobe, uhuma hegulu ha ibambacha; na bamwe bagichi ba oolo baawa, na Ulia, Mmiti mgichi gobe gwaawa nage. ²⁵ Bibyo Daudi gumsambile guya mine gutuminywe, Bino, wamsambile Yoabu bino binywa, Ino ikoko ishibe isone u meeso mobe, bululi ahilu asum'ya gugu nahi byaamsum'ya gugu; ugililile uita uoma bita byobe yulu ya mbuga wagigishe; na gogwe ummoche mtima, ²⁶ Na guya mmachi gwa Ulia helihuliche mwano gwa ugana Ulia mlumyage gwaawa, gubiile mlumyage malilo. ²⁷ Na mengo mahahwile maya malilo, Daudi guhilile mtu, gumguhile, gum'biile mndu gyage; nage nuuba mmachage, gum'butile mwaana. Alakini iyo ikoko yeligilile Daudi imchigiliche Mlume.