¹ Haho Mlume gumtumine Nathani gagye wa Daudi. Nage gumgilile, na umsambila, Habele nabatu babili mnda gimwe mbuga; gumwe gubebe mona na gunge gubele mbuchu. ² Guya mona gubele na myoo, na ng'ombe chigni abisa. ³ guya mbuchu gushibele na atu, alakini gubele na mwaana gumwechi gwa mmoo, mchibe, gweligulile na nugubeya; guonone hamwechi nage, na hamwechi na baana bage; gubele huya hamwechi nage, na ulala myaali mwage, gubele weli nahi msiha gwage. ⁴ Bibyo gumwe mgyata adila guhiile wa guya mona, nage guleile uguha gumwe mmoo gwage ao gimwe ng'ombe gyage, yulu ya ummiila guya mgyata madila mine gumyiile, alakini gumsapile mbuchu mwaana mmoo gwage, gummiile guya mgyata madila mine gumyile. ⁵ Haho sungu cha Daudi chilamine abisa yulu ya guya mtu; Daudi gumsambile Nathani, Bili Mlume na mwego, gugo mtu mine gugilile iyo ikoko, cigilwe gyage gulingye uwa. ⁶ nage gwimgiwidicha mwaanammoo nyendo china, bululi gwaita iyo inywa, na yulu gushibele na yano. ⁷ Bibyo Nathani gumsambile Daudi, Gogwe noo guya mtu. MLume, Abetcha a Isilaeli agana bino, Niushininye mauta ube oolo hegulu ha Isilaeli, niuhogonone nauboo wa Sauli; ⁸ nene niuhele ndu gya mlumyobe, na baacha ba mlumyobe m yaali yobe; niuhele ndu gya Isilaeli na ndu gya Yuda; na nambo bibyo byisuba bichoo, nabaulibiila binge bibya. ⁹ Yulu yai wainenuna inywa ya Mlume, na uita bya bisone u meeso mage? Wammula Ulia, Mmiti, wa ahilu, gogwe wamguha mmachage gabe mmachobe, gogwe ummagile na ahilu a baana ba Amoni. ¹⁰ Bino, hano ahilu ashihuma mnda ndu gyobe, yulu wanenuna, wamguha mmachi gwa Ulia, Mmiti, uba mmachobe. ¹¹ Mlume gwagana bino, Lingamine, nichwisha usona mnda ndu gyobe, nene nibaguha baachi bobe u mbele wa meeso mobe, na umma bo m'binji nobe, nage gwilala na baachi bobe lyanga abele. ¹² Bululi gogwe ugilile iya ikoko wa bubisa; alakini nene niita iyo ikoko u mbele wa Isilaeli yose na u mbele wa chuba tondo hudendwa. ¹³ Daudi gumsambile Nathani, Nammitila Mlume buubi. Nathani gumsambile Daudi, Mlume nage gwabuhunya buubi bobe; ushiwa. ¹⁴ Alakini, bululi bwa iyo igilanywa wabaha ba tumangu twa Mlume ihana yata ya usebulula, mwaana gushibuswa obe chigilwe gyage gwiiwa. ¹⁵ Nage Nathani gugimanine na ugya u ndu gyage. Bibyo Mlume gummulile guya mwaana mine mmachi gwa Ulia gwelibutile Daudi gusuminywe abisa. ¹⁶ Bibyo Daudi gumsabile Abetcha yulu yagugo mwaana; Daudi guhambile nangu uya, gugingile, gulalile busugu bose basi. ¹⁷ Nagyo miungu gya ndu gyage bagile, bagimanine hoka nage, yulu bamginune haya habitete; alakini gushigitabiche, na gushilile iliwa hamwechi nabo. ¹⁸ Haluhiile lusugu lwa njwii, guya mwaana guwile. Nabo bagichi ba Daudi bamonine booba umsambila ugana mwaana gwahuwa, yulu baganine, Lingaminywe, guya mwaana helibele gwili na mwego, tudogomone nage, gushituhuliche madi metu; bino gushigililile ulisusula, hatwimsambila ugana mwaana gwahuwa? ¹⁹ Alakini helimonine bagichi bage balihudogoma wa tulangolango, Daudi gumanine ugana mwaana gwahuwa; bibyo Daudi gubabudiche bagichi bage, Wi wii!Mwaana gwahuwa? Nabo baganine, Gwahuwa. ²⁰ Haho Daudi guchuwile haya hasi guligogile, gulishininye mauta, gugalule bichwalaganywa byge; gugingile mnda ndu gya Mlume, gutonine; hanyuma gugile u ndu gyage, na helibenjiche bammiile liwa, nage gulile. ²¹ Bagichi bage bamsambile, M yikoko nai ino yawahisha? Uhambile na ulila yulu ya mwaana, gwalibele na mwego; alakini mwaana hene heliwile, ugimanine na ulile iliwa. ²² Guganine, Mwaana helibele na mwego, nuhambile, nililile; yulu niganine, M nanyi gumanine ugana Mlume gwimbonena misa, mwaana gahame? ²³ Alakini bino gwaawa nahambile iyaka ii? Wi wii! Ninaosha umgiwicha iyaka? Nene noo nigya weli alakini gee gushigiwila wandi. ²⁴ Nage Daudi gummungiche Bath-sheba mmachage, gugingile weli gulalile nage; nage gubutile mwaana, gumgitile china lyage Sulemani. Nage Mlume gummundile; ²⁵ Mlume guhiile inywa mnda uboo wa Nathani, mbuwa, nage gumgitile china lyage Yedidia, yulu ya Mlume. ²⁶ Yoabu gulwile na Laba gya baana ba Amoni, gugiwatile mbuga gya buolo. ²⁷ Yoabugutumine batu bagye wa Daudi, guganine, Nalwa na Laba, na nagiwata gigyo mbuga gya maadi. ²⁸ Bino hano, sumbicha batu bene bashigele, bagichunguluwe mbuga, na ugiguha; nashichwe nene ugiguha mbuga, gyo nugiswa wa china lyanyi. ²⁹ Bibyo Daudi gusumbiche batu bose bagile Laba, gulwile nabo, gugiwatile. ³⁰ Hanyuma gumsapile oolo lyabo akusukusu uhuma u mswe gwage; na bushito bwao bubele talanta gya nolo, nao abele na mawe ma uguchiwa bumona bwiingi mnda mwao; guchwiiwe o Daudi u mswe gwage. Gutangile kole cha gigyo mbuga, chiingi abisa. ³¹ Nage gubahuminye batu bene babelemo, gubabiile u mgilo gwa ugasha mbao, na pigi gya bigela, na matemo ma bigela, gubagidiche migilo gya uchigya biliki; noo byeliitile mabuga mose ma baana ba Amoni. Hanyuma Daudi gugiwile na batu bose Yelusalemu.