¹ Hanyuma ha bibyo, Absalomu, mwaanagwa Dudi, gubele na kachage gwa itimba isoga, china lyage gugitilwe Tamali, na Amnoni, mwaana gwa Daudi, gummundile. ² Amnoni gumyowile, uhiya nausumwa, wa yulu ya kachage Tamali, yulu gugo msiha gwilibele inyundu, Amnoni gumonine m bigumu umgilila igilanywa yo yose. ³ Alakini Amnoni gubele na genda lyage, china lyage Yonadabu, mwaana gwa Shama, mshiwabo na Daudi; nage Yonadabu gubele mtu gwa bweenge abisa. ⁴ Nage gumsambile, Yulu yai, Ee mwaana oolo, wagonda bino lusugu wa lusugu? Ushihubenja uusambila? Amnoni gumsambile, Nilihummunda Tamali, kachge gwa mshiwetu, Absalomu. ⁵ Yonadbu gumsambile, Lala wiingo yobe uliite msumwa na sobe helichwa uulola, wamsambile, ummile kachanyi, Tamali, gachwe, nihuutendelela, gaape mkati naye, gapiile iliwa u meeso manyi naimone, naiye yuhuma m muboo wage. ⁶ Haho Amnoni gulalile, guliitile msumwa; na oolo helichwile umlola, Amnoni gumsambile oolo Ummile kachanyi, Tamali, gachwe, nihuutendelela, ganongeche mikati gibili u meeso manyi, naaye yuhuma m muboo wage. ⁷ Bibyo Daudi gutumine mtu gagye u ndu gya Tamali, guganine, Ugye hano hoka u ndu gya Amnoni, nyumyobe, umlongeche iliwa. ⁸ Tamali gugile u ndu gya mshiwabo Amnoni; nage gubele mlachu. Guguhile buusu, gubupondile, gubulongiche mikati u meeso mage, gugichelile mikati. ⁹ Guguhile yaangilo, gugisheninye u mbele wage, alakini guhaninye uuya, Nage Amnoni guganine, Hunyiwe batu bose wandi. Bagiile mtu ge gese wage. ¹⁰ Amnoni gumsambile Tamali, Mdaga upa iliwa u yumba yanyi, naiye yuhuma mnda uboo obe. Bibyo Tamali guguhile mikati gyelilongiche, gugilushiiishe ul Amnoni mshiwabo m'ya m yumba. ¹¹ Nage helihwile ugilusha hoka nage, yulu gagiye, Amnoni gum'bwatile, gumsambile, Chuuno ulale nanyi, mshiwetu. ¹² Nage Talami gumgaile, Pande, bishi bibyo, mshiwetu, ushindogye wa uoma; yulu ishinagiliya iyo mnda Isilaeli; Ushigichi bubo buhugi. ¹³ Nene niahila uhi abule anyi? Na gogwe ubi nahi gumwe gwa bahugi mnda Isilaeli. Bibo hano, ibumbu ino, udogome na oolo gushiuhaninya ung'onda. ¹⁴ Alakini gee gushigitabuwe uhulicha liidi lyage; nage byelibele na uoma uhima Tamali, gumdogiche wa uoma, gulalile nage. ¹⁵ Hanyuma Amnoni gummonywine, uonywa wa wata abisa; bululi uonywe welimmonyine ubele wata uhima luundo lwelimmundile hatangi. Amnoni gumsambile, Gimana, nuugye. ¹⁶ Alakini Tamali gumsambile, Bishi bibyo, bululi ugugila uno upunya m wata uhima uya wine wawangita. Alakini Amnoni guhaninye ummulicha. ¹⁷ Bibyo gumgitile mgichi gwage mine gubele humgilila, guganine, Mmunye gugo mmachana wandi, wabugale iibi u nyuma obe. ¹⁸ Nage gubele mchwale kanjo lya lilahu; yulu noo bichwalaganywa bibele huchwala misiha gya oolo beene babele binyundu. Bibyo mgichi gwage gumtobole hambuga, gubugale iibi u nyuma wage. ¹⁹ Nage Tamali gulibiile mto mswe mwage, gugulile liya kanjo lyage lya lilahu lyelibele mchale, gubiile maboo mage u mswe gwage nuugya nalila ndila gyose wa liidi lyata. ²⁰ Gugo Absalomu mshiwabo gumsambile, Wi wii! Gwaba nobe Amnoni mshiwenyu? Bino hano leya shama pii, kachanyi, m mshiwenyu; ushiibiye mnda mtima ino ikoko. Bibyo Tamali gushamine gee buchima u ndu gya nyumyage Absalomu. ²¹ Na oolo Daudi helibihulichi bibyo binywa byose, guchigililwe abisa. ²² Alakini Absalomu gushidogomine na Amnoni uba wa saso na ata uba wa sungu; Bululi Absalomu gummonywine Amnoni wa umdogya kachage Tamali. ²³ Bibele hanyuma ha myaa gibili gigima, Absalomu gubele na bagechi ba masoo ma myoo uya Baal-hasoni gibele luubi lwa Eflaimu; nage Absalomu gubagitile baana bose na oolo. ²⁴ Absalomu gugile uli oolo, guganine, Loola, bino, nene mcha gobe mine gulihugeda maso mamyoo; mndi bino oolo na gachwe, ibumbu ino, na bagichi bage hamwechi nanyi nene mcha gobe. ²⁵ Oolo gumsambile Absalomu, bishi bibyo, mwananyi, tushigye beswe bose, tushichwe uunyemena, Gumtendelele abisa; gushigitabiche ugya, alakini gummalile mihaa. ²⁶ Haho Absalomu guganine, Nambo ushi huchwa, ibumbu ino, umleye Amnoni mshiwetu gagye netu. ²⁷ Oolo gumsambile, Yulu yai gagye nobe? Alakini Absalomu gumtendelele abisa, nage gumsambile Amnoni na baana bose ba oolo bagye nage. ²⁸ Hanyuma Absalomu gubasambile bagichi bage, guganine, Lingaminywe bino, mtimagwage Amnoni hagwiseelela abisa na malwa; na nene handimsambila, mmulweAmnoni, haho mmagwe, mushimone booba, gushi nene gwimsambila? M'be na uoma, lihewe mitima. ²⁹ Haho bagichi ba Absalomu bammitile Amnoni nahi bibasambile Absalomu. Bibyo baana bose ba oolo, bagile mtu ge gese u ndu gyage, basinine. ³⁰ Bibele, hababele mndila, mwano gummyile Daudi, ugana, Absalomu gwabahaga baana bose ba oolo, na hashi hashigachu ata gumwe gwabo. ³¹ Haho oolo gugimanine, gugulile bichwalaganywa byage, gulalile hasi; nabobagichi bage bose bagimanine hoka nage, bina bichwalaganywa byabo bya bigulibu. ³² Yonadabu gugaile, mwaana gwa Shama, mshiwabo gwa Daudi guganine, Gashilange mlumyanyi ugana babahaga bawalubaga bose, baana ba oolo; m Amnoni gee buchima ka mine gwaawa; chigilwe iyo ilangilwe mnda mswe gwa Absalomu itula luya lusugu ludogichiwe kachage Tamali. ³³ Bino hano mlumyanyi oolo gashiibiye ino inywa mnda mtima, ulanga ugana baana bose ba oolo baawa, yulu m Amnoni gee buchima ka mine gwahagwa. ³⁴ Alakini Absalomu gusinine. Na guya mmwalubga gubele mmushi gwage guginune meeso mage, gumonine, na loola, hali batu beengi balihuchwa m ndilaluubi lwa loono u nyuma wage. ³⁵ Nage Yonadadu gumsambile oolo, Loola, baana ba oolo balihuchwa; nahi nene mcha gobe byandagana, noo byabili. ³⁶ Habhwile udogoma, loola, baana ba oolo bahiile, nabo basediche madi mabo na ulila; oolo nage gulilile, na bagichi bage bose, liilo lyata abisa. ³⁷ Alakini Absalomu gusinine, gugileuli Talmai, mwaana gwa Amihuli, oolo lya Geshuli, Nage Daudi gumlilile mwanage masugu mose. ³⁸ Haho Absalomu helisinine, gugileGesguli, gushamine uya mengo ma myaa gitatu. ³⁹ Oolo Daudi gusimbile ugya uli Absalomu gwahungiwa yulu ya mwano gwa Amnoni, yulu guhwile uuwa.