¹ Haho Yoabu, mwaana gwa Seluya, gumanine ugana mtima gwa oolo gushihuunda Absalomu. ² Yoabu gutume batu ugya Tekoa, gulushishe uya mmachana gwina lwenyi, gumsambile, Nuhuutendelela, uliite nahi ulimshame u malilo, uchwale bichwalaganywa bya buwilwa, ubumbu ino, naushilishinye mauta, alakini ulibiya nahi mmachana mine gwina malilo ma masugu mengi yulu ya guma mine guwile; ³ hanyuma wagingile wa oolo wamsambile bino binywa. Bibyo Yoabu gubiile binywa m manywa. ⁴ Nage guya mmachana gwa Tekoa helodogomone na oolo, gugwile m machwi hasi, gumginamine, guganine, Mbwatiliche, Ee oolo. ⁵ Oolo gum'budiche, Uli wii? Nage gumgaile, Chigilwe nene nili m'bwilwa, niwililwe na mlumyanyi. ⁶ Nene mcha gobe nibele na baana babili, na babo babili bagubanine ulubala, na hashibele na mtu gwa ubasunga, alakini gumwe gummulile gunge nage, nuumaga. ⁷ Loola, ilongo yose yanginywina nene mgichi gobe, baganine, Mlushe guya mine guhulile mshiwabo, yulu gahagwe yulu ya mwego gwa mshiwabo mine gwelihagile, ndaa na ugugicha na bhyana bwage nabo; bibyo noo byabichimya aala lyanyi lyine lishigalile, bamshimshigile mlumyanyi china na ata na isunga mgino sii. ⁸ Oolo gumsmbile gugo mmachana, Ugye u ndu gyobe, nene niuhilila mwano. ⁹ Haho gugo mmachana gwa Tekoa gumsambile oolo, Na buubi bube hegulu hanyi, Ee mlumyanyi, nahegulu ha ndu gya tata usona ose uno; na wa oolo na wisuba yage ya buolo hashibe na abachi. ¹⁰ Oolo guganine, Ge gese mine gwiusambila inywa, wamlushe wandi, nage gushiuuda itaka. ¹¹ Guya mmachana gumgaile, Ibumbu ino, oolo na gammengeleche Mlume, Abetcha obe, yulu guya gugiwidicha buubi wa buubi bwa maashi gashigililile ugugicha, bashichwe umgugicha mwananyi. Nage guganine, Bili Mlume na mwego, lushigwa hasi ata luchuli lumwechi lwa mwanobe. ¹² Mmachana guganine, Umleche mgichi gobe, ibumbu ino, nadogome inywa imwechi wa mlumyanyi oolo; Guganine, Bino ubegena. ¹³ Mmachana guganine, Yulu yai gogwe wabalangila bikoko nahi bibyo batu ba Abetcha? Bululi bwai udogoma ino inywa oolo gushi humlusha iyaka guya mine gwelichingile. ¹⁴ Bululi tulingye uuwa beswe, beswe tuli nahi maadi mene mageseye hasi, mene mashinaoshiwa ugochwa iyaka; na ata Abetcha gushibahunya mwego alakini guswengelecha lango, uganaguya mine guchingilwe gashibe msinyi wage. ¹⁵ Na bino byandichwile nene ugana ino inywa na mlumyanyi oolo, myulu batu bambabula; nene, mgicho gobe, nabegana, Nene niigana bino wa oolo, hange bibi oolo gwungitila nahi usimba wanyi nene mcha gwage. ¹⁶ Yulu oolo gwahulicha, yulu gammogonone mcha gwage m muboo wa guya mtu mine gulihusimba ungugicha nene na mwananyi nage uhuma mnda buhyana bwa Abetcha. ¹⁷ Bibyo nene mgichi gobe niganine, Inywa ya mlumyanyi oolo na ibe ya uhocha mtima; bululi nahi malaika ma Abetcha noo byeli mlumyanyi oolo, ubagula bya misa na bya bigugichu; naga Mlume, Abetcha obe na abe hamwechi nobe. ¹⁸ Haho oolo gugaile, gumsambile guya mmachana, ushimbise, ibumbu ino, inywa yo yose yine yandiubucha. Na mmachana guganine, Na gabegana bino mlumyanyi oolo. ¹⁹ Oolo guganine, Wi wii! Ushi uboo wa Yoabu wine uli hamwechi nobe u bibyo byose?Mmachana gugaile, guganine, Nahi bili mtima gobe na mwego, mlumyanyi, oolo, hashi mtu gunaosha ugaluwa uboo wa ulume ao uboo wa uachi, uhanya inywa yo yose yagadogoma mlumyanyi oolo; yulu mcha gobe Yoabu noo gwasambila, na ubibiya binywa mnda anywa a mgichi gobe. ²⁰ mchagobe Yoabu gwita bibyo yulu ya ugalula yenyi ya ino ihisho; na mlumyanyi gwinalo lwenyi, nahi lwenyi lwa malaika ma Abetcha, ndaa na gamane bikoko byose bya ino ibaloo. ²¹ Bibyo oolo gumsambile Yoabu, Lingamina bino, nalaanga bino; ugye, umgiwiche iyaka guya mmwalubaga Absalomu. ²² Nage Yoabu gugwile mmachwi ndaa na hasi, gumginamine, gummalile oolo mihaa, Yoabu guganine, Lino, nene mcha gobe namana ugana nahewa keene u meeo naoolo, mlumyanyi, yulu oolo gwammitila mcha gwage usimba wage. ²³ Bibyo Yoabu ggimanine, gugile Geshuli, gumlushishe Absalomu uya Yelusalemu. ²⁴ Nage oolo guganine, Gagalwile u ndu gyage, gashimone yenyi yanyi. Haho Absalomu gugiwile u ndu gyage, gushimmonine oolo yenyi. ²⁵ Bibyo mnda Isilaeliyose hashibele mtu mine gubele tutonywa buhungwe bwage nahi Absalomu; utula yaasa asa ya ugulu ndaa na ulubombo lwa mswe gwage hashibele na abachi o ose. ²⁶ Nage helibegilwe mswe, (bibyo isula ya mwaa go gose gubele hubegwa; na wa yulu ya njuli chibele chilahu na cha bushito weli, wa bibyo gubegilwe) njuli chage chilingililwe bushito bwacho shekeli sambi chibili (kilo chopi) u bushito bwa oolo. ²⁷ Hanyuma Babutilwe baana wa Absalomu bawalubaga batatu na msiha gumwechi, china lyago gugitilwe Tamali nage gubele na yenyi isoga. ²⁸ Absalomu gushamine myaa gibili mnda Yelusalemu; gushimmonine oolo yenyi yage. ²⁹ Bibyo Absalomu gutumine mtu umgita Yoabu, gammile wa oolo, alakini gee guhaninye ugya weli; guhilile mtu lwendo lwa bubili, alakini guhaninye ugya. ³⁰ Wa bibyo gusambile bagichi bage, Loolwe, lubala lwa Yoabululi hoka na lubala lwanyi, nage gwina byunaganywa uya; mugye ubichigya na aahya. Haho magichi ba Absalomu baluchigiche na aahya luya lubala. ³¹ Haho gugimanine Yoabu, na uhiya u ndu gyage Absalomu, gumsambile, yulu yai bagichi bobe bachigya lubala lwanyi na aahya? ³² Absalomu gumgaile Yoabu, Lingamina, nihilile mtu oli, ugana, Uchwe wandi, yulu upile wa oolo ugana, Yulu yai nichwile uhuma Gashuli? Byisuba lingye nene nisuba ushama uya ndaa na bino; na nambo wahuba usona hegulu hanyi na gaapage. ³³ Bibyo Yoabu gugile wa oolo, gumsambile bibyo, nage halimgitileAbsalomu, gee guchwile wa oolo, guginamine m machwi ndaa na hasi u mbele wa oolo; nage oolo gummumbatile Absalomu.