¹ Bibele hanyuma na bibyo, Absalomu gulibiile lumima abilibili na falasi, batu maumi matano buuhinga abilo hambele hage. ² Iyaka Absalomu gubyuwile halwelo pee, na ugimana mibamba ndila gyugya u limbwa; hanyuma bibele, mtu ge gese mine gubele na inywa, ibele lingye uhiya wa oolo, yulu ya uononywa, Absalomu gubele humgita gugo mtu weli, na um'bucha, gogwe uli mtu gwa mbuga nai? Nage gabegana, Nene mcha gobe nili mtu gwa ilongo wilage ya Isilaeli. ³ Nage Absalomu nuusambila, Loola, binywa byobe m bsoga na bya kiine; alakini hashi mtu mine gulagilwe na oolo uuhulicha. ⁴ Iyaka Absalomu gubele hugana, Nambo nene nababiwa uba aluliya mnda gino sii, yulu mtu ge gese mine gwina inywa ao yaabo gachwe wandi, namme kiine gyage! ⁵ Iyaka bibele mtu ge gese halihiile umginamina, gugolole uboo wage, na um'bwata na ummumbatila. ⁶ Bibyo noo Absalomu byelibaitile ba Isilaeli bose, bene babele hugya wa oolo yulu ya uononywa; na bibyo Absalomu gubabidiche batu ba Isilaeli. ⁷ Na bibele hanyuma ha myaa gina, Absalomu gumsambile oolo, Ibumbu ino undeye nagye uhunya uibindila wanyi, wandi biile wa Mlume uya HHebloni. ⁸ Bululi nene mgichi gobenibiile ulibindila haya handibele hushama Geshuli mnda Shamu, niganine, nambo Mlume gwingiwicha Yelusalemu chigilwe, noo handimtangila Mlume. ⁹ Nage oolo gumsambile, Ugye na talala. Bibyo guchiwile, gugile Hebloni. ¹⁰ Alakini Absalomu guhilile badinji mnda bibushi byose bya Isilaeli ugana, Hano hoka hamwihulicha liidi lya asiba, haho noo hamwigana Absalomu gwahuhyilila uya Hebloni. ¹¹ Na batu sambi chibili bene bagitilwe uhuma uya Yelusalemu hamwechi na Absalomu, bagile mnda buhugi bwabo bashimanine inywa yo yose. ¹² Absalomu nage gutumine mtu umgita Ahithofeli Mgiloni, mmahanyi gwage Daudi, uhuma mnda mbuga gyage, noo Gilo, haya helibele hutangila lutangi lwa nyama, Mmonywa gwabo guchwile guomu; yulu batu bene bachwile na Absalomu babulile beengi. ¹³ Guya gutuminywe guhiile wa Daudi, guganine, Mitimagya batu ba Isilaeli gyahambana na Absalomu. ¹⁴ Haho Daudi gubasambile bagichi bage bose bene babele hamwechi nage uya Yelusalemu, Gimanywe, tusine bululi tusahusina hashi mtu hawingi hetu mine gwihogonowa mnda maboo ma Absalomu; bino, Iswe abilo, tuhume, gashitubange wa abilo, na utulushisha ugugila, na ugilwa gino mbuga na bwigi bwa ahilu. ¹⁵ Babo bagichi ba oolo bamsambile oolo, Lingamina, beswe bagichi bobe tusili lumima uita yo yose yine yolisobola mlumyetu oolo. ¹⁶ Bibyo oolo gugile na batu bose ba mndu gyage balamane nage. Oolo gushigile baachana umi, na bacha ba baachi bage, yulu ya uusa ndu. ¹⁷ Oolo gugile, na batu bose bamlamine; bashamine hacho haya Beth-melhaki. ¹⁸ Bagichi bage bose bahitile hoka nage; na Bakelethi bose, na Bapelethi bose, na Bagiti bose, batu sambi mtuba bene balamanine nage uhuma Gathi, bahitile u mbele wa oolo. ¹⁹ Bibyo oolo gumsambile Itai, Mbiti, Yulu yai gogwe ulihugya hamwechi netu? Giwila, ushame hamwechi na oolo; bululi gogwe uli mgenyi, iyaka uli mtu mine guchingilwe wihana yobe. ²⁰ Bululi wahiya mnakeshi ka yulu yqi nuudegye lino, na uuchunguluya uya na uya hmwechi netu na nene hano nilihugya wine wandiosha ugya? Gogwe giwila, ubagiwiche bashiwenyu; uleelela na winene biba hamwecho nobe. ²¹ Nage Itai gumgaile oolo guganine, Nahi bili Mlume na mwego, na mlumyanyi oolo byeli na mwego, chigilwe gyage ihana yo yose yine yelibi o oolo, mlumyanyi, uba n yulu ya uuwa, ao uba m wa yulu ya uhama, noo welibi na mcha gobe. ²² Bibyo Daudi gumsambile Itai, Bino, ugye udabuwe. Gudabuwe Itai, Mgiti na batu bage bose, na baana ba tulenge bose belibele nabo hamwechi. ²³ Na sii gyose gililile wa madi mata, nabo batu bose badabwile, oolo nage gee mine gudabwile luya luudi Kidloni, na babo bati bose badbwile, bagile ndila gya mlwanaganywa. ²⁴ Na loola, Sadoki nage guchwile, na Balawi bose hamechi nage, bali baliswale lindo lya malagano ma Abetcha; hanyuma balisulile liya lindo lya Abetcha; Abiathali nage guselile hegulu, na biya batu bose habahwile utobowa m mbuga. ²⁵ Nage oolo gumsambile Sadoki, Giwicha lindo lya Abetcha m mbuga; nambo nigitabichiwa u meeso ma Mlume na ungiwicha, na uumonya iyaka lili lindo, na bushamo bwage. ²⁶ Alakini gabegana nahi bino; Nene nishihuuhoda gogwe abisa; bino nene hano, na gangitile nahi byelihumona uba bisoga. ²⁷ Hanyuma oolo gumsambile Sadoki, ibuli, Lingamina, giwila u mbuga wa talala, na baana benyu babili hamwechi nenyu, Ahimaasi, mwaanobe, na Yonathani, mwaana gwa Abiathali. ²⁸ Lingamina, nene nihembela u byabu bya mlwanaganywa, ndaa na byipyila inywa ya upa mwano gwa uhuma wenyu. ²⁹ Haho Sadoki na Abiathali baliswalile lindo lya Abetcha, baligiwiche Yelusalemu; bashamine uya. ³⁰ Daudi gugile guselile ndila gya usela loono lwa Mizeituni, gulilile helibele husela loono; nage gubele mlibwile mswe gwage, guglile gushi na mikalabanda; na bato bose bene babele hamwechi nage baliwilile miswe gyabo, ge gese mumwechi gwabo, bachinine hegulu, balilile habachinine. ³¹ Gumwe mtu gumsambile Daudi ugana, Ahithofeli guli hamwechi na baya bene bahuchana na Absalomu; Daudi guganine, Ee Mlume, nihuutendelela, ugalule mmungo gwa Ahithofeli gube bunene. ³² Bibele, Daudi helihiile hegulu, haya Abetcha helitangilwe lutangi, loola, Hushaim Mwalki, guchwile umgaa na ichibabo yage isambubu, iyaka gwina bitete mswe mwage. ³³ Daudi gumsambile, Ubegyata u mbele hamwechi nanyi, ubi mchigo wandi; ³⁴ alakini ugiwile u mbuga, na umsambila Absalomu, Nibi mgicho gobe, Ee oolo, nahi biya byandibele mgichi gwa sobe utula aala, noo byandibi mgichi gobe hano bino; haho noo holinoga mihungo gya Ahithofeli yulu yanyi. ³⁵ Wi wii! Bashio Sadoki na Abiathali, bibuli, hamwechi nobe ubo? Bino bibi, inywa yo yose yine yolihulicha mnda ndu gya oolo, wibasambila Sadoki na Abiathali, bibuli. ³⁶ Lingamina, balinabo uya baana bobe babili, Ahimaasi, mwaana gwa Sadoki, na Yonathani, mwaana gwa Abiathali; na benywe mnda maboo mabo mwipilila mwno gwa inywa yo yose yine yamwihulicha. ³⁷ Haho Hushai, genda lya Daudi, gugingile mnda mbuga; nage Absalomu guhiile gugingile mnda Yelusalemu.