¹ Nage Daudi halihyile uhita liya songo lya loono, loola, Siba, mcha gwa Mifeboshethi, gum'bangile, napunda chibili cha chiganjwe, nahegulu hacho mikati sambi chibili cha ngano, na byaama bya sambi bya zabibu by bigumu, na biguma sambi bya mengo ma kamo, na ibila ya ibugu. ² Oolo gumsambile Siba, M byai bibi? Siba guganine, Punda m cha ilongo ya oolo bachichine; na mkati na biguma noo biliwa bya babo bawalubaga; na ibugu noo yuganabanywe babo bene balihuwa na yuuma mlwanaganywa. ³ Oolo guganine, Na mwaana gwa mlumyobe guli uhi? Siba gumsambile oolo, Lingamina, guli mshame m Yelusalemu; yulu gwagana, Lino ndu gya Isilaeli gyingiwidicha buolo bwa tata. ⁴ Haho oolo gumsambile Siba, Loola, byose byine bibele bitundu bya Mefiboshethi m byobe. Siba guganine, Nene naginama; na nahewe ugitabichiwa u meeso mobe, Ee mlumyanyi, oolo. ⁵ Bibyo oolo Daudi halihiile Bahulimu, loola, uchwile uhuma uya gumwe mtu gwa ilongo ya Sauli, china lyage Shimei, mwaana gwa Gela; gugimanine, gulogile helibele hugyata. ⁶ Iyaka gumtelele Daudi mawe, na bagichi bose ba oolo Daudi; na batu bose na bilume pambwa byose babeleho uboo wage wa ulume na uboo wage wa uachi. ⁷ Na Shimei helilogole, guganine bino, Hita lobe! Hita lobe! Gogwe mtu gwa maashi! Gogwe mtu ushilingye! ⁸ Mlume gwagiwicha hegulu hobe maashi mose ma ndu gya Sauli mine golihyilile ha ihana yage; nage Mlume gwabiya buolo mnda uboo wa Absalomu mwanobe; hanyuma, lingamina, gogwe waguhwa mnda usona obe gogwe mine, wa ibalo usili mtu gwa maashi. ⁹ Bibyo Abishai mwaana gwa Seluya, gumsambile oolo, Yulu yai ano awa a aube ali humloga mlumyanyi? Na nadabuwe, ibumbu ino, naguhunye mswe gwage. ¹⁰ Oolo guganine, Nili nai nanyu, benywe baana ba Seluya? Wa ibalo gee gwaloga, na wa ibalo Mlume gumsambile, Umloge Daudi, bino, m nanyi mine gwigana, Yulu yai waita bino? ¹¹ Daudi gumsambile Abishai, na bagichi bage bose, Lingaminywe, gugu mwananyi, mine guhumine mnda lubunda lwanyi, gulihuenga mwego gwanyi; ushi uhima abisa gugu M'benjamini gulihusimba upaga hano? Mlewe galoge, wa ibalo Mlume noo gumlagile. ¹² Hange Mlume gwilingamina bisone byine byamanga, nage Mlume gwigiwicha misa wa ibalo ya undoga wage lino. ¹³ Bibyo bagilile m ndila Daudi na batu bage; Shimei nage gugililile m lubachu mwa luya loono, wa umshenena, na gulihugililila, uloga, naumtelela mawe, na ugulula ihwili hegulu. ¹⁴ Nage oolo nabatu bage bose bene babelehamwechi nage bahiile, baimine abisa; nage gulitudiche uya. ¹⁵ Absalomu, na babo batu bose ba Isilaeli, bahiileYelusalemu, nage Ahithofeli gubele hamwechi nage. ¹⁶ Bibele Hushai, Mwalki, genda lya Daudi, helimmyile Absalomu, Hushai gumsambile Absalomu, na gahame oolo, gahame oolo. ¹⁷ Nage Absalomu gumsambile Hushai, Wi wii! Gino noo misa gyobe uli genda lyobe? Yulu yai usachwa na genda lyobe? ¹⁸ Hushai gumsambile Absalomu, Pande, Bishi bibyo; Alakini guya Mlume mine gumsobole, na bano batu, na batu bose ba Isilaeli, nene nibi gwage, na hamwechi nage nishama. ¹⁹ Na iyaka, M nanyi mine gwandilingye umgilila migilo? Bishiningye ugila u mbele wa mwanobe? Nahi byandugilile u mbele wa sobe, noo byandibi u mbele obe. ²⁰ Hanyuma Absalomu gumsambile Ahithofeli, Bino, lusha lango lyobe, twiite wii. ²¹ Nage Ahithofeli gumsambile Absalomu, Gingila gogwe u baachi ba sobe, baya bene belishigile yulu ya uusa ndu; na Baisilaeli bose bihulicha ugana wachigililwa abisa yulu ya sobe; haho noo hamobiwa uoma abisa maboo ma bene bali hamwechi nobe. ²² Bibyo bamgandile Absalomu hema hegulu ha butato bwa ndu; nage Absalomu gugingile u baachi ba sage u meeso ma Isilaeli yose. ²³ Na lango lyage Ahithofeli, lyelibele huhana maya masugu, libele nahi mtu gulihubucha wa Abetcha; noo byalibele longo lyose lya Ahithofeli, wa Daudi na wa Absalomu.