¹ Bibyo bilongo byose bya Isilaeli bimgilile Daudi uya Hebloni, badogomine nage, baganine, Loola, beswe tuli uda lyobe na nyama gyobe. ² Hala mganda, haya Sauli helibele hegulu hetu, gigwe noo ubele hubagolwela Isileli utobowa hambuga, na ugingila mnda, Nage Mlumeguusambile, Gogwe wibalisha batu banyi Isilaeli, gogwe ubi mmata mnda Isilaeli. ³ Bibyo baulu bose ba Isilaeli bagileuli oolo uya Hebloni, nage oolo Daudi guhulichane nabo uya Hebloni u meeso ma Mlume; bamshininye Daudi mauta gabe oolo hegulu ha Isilaeli. ⁴ Daudi gusibele na myaa maumi matatu gya ubuswa helitulile uhyilila, guhyilile myaa maumi mana. ⁵ Uya Hebloni guhyilile myaa njwii na myachi mtuba; na uya Yelusalemu guhyilile myaa maumi matatu na gitatu hegulu ha Isilaeli ha Isilaeli yose. ⁶ Hanyuma oolo na batu bage gagile Yelusalemu yulu ya ulwa na Bayebusi, bashami ba giya sii; babo noo bamsambile Daudi, ugana, Usahubahunya ba bihobu, na bitende, pande ushigingila mno; bibyo babele hulanga ugana Daudi gushinaosha uginga mo. ⁷ Alakini Daudi gulwile mahuo gya Sayuni; gigyo noo mbuga gya Daudi. ⁸ Nage Daudi guganine lulo lusugu, Guyagwibalwa Bayebusi, na gasele u mvule gwa maadi, na ubahaga bitande na bihobu, byine luhuda lwa Daudi lubele huonywa. Wa ino ibalo batu basugana, Hali bihobu na bitende bishinaosha ugingila mndu. ⁹ Bibyo Daudi gushamine mnda lilyo huo, guligitile mbuga gya Daudi. Hanyuma Daudi gugubae uhuma Milo mnda. ¹⁰ Nage Daudi gugililile uba mmata; bululi Mlume, Abetcha a bilume pambwa, gubele hamwechi nage. ¹¹ Hanyuma Hilamu, oolo lya Tilo, guhilile batu ui Daudi, gummilile na miamba, na babachi ba wino, na bagubai; nabo bamgubaile Daundu ndu. ¹² Daudi gumanine ugana Mlume gwabiya uoma gabe oolo hegulu ha Isilaeli, na buolo bwage gwabuginina hegulu ha batu bage Isilaeli. ¹³ Nage Daudi gugililile uligihila baachi na baacha ba baachi bage uya Yelusalemu hanyuma ha uhuma Hebloni; babutilwe baana bengi wa Daudi bawalubaga na misiha. ¹⁴ Na mano noo machina mabene babutilwe uya Yelusalemu; Shamua, na Shobabu, na Natnani, na Sulemani, ¹⁵ na Ibhali, na Elishua; na Nefegi, na Yafia; ¹⁶ na Alishama, na Eliada, na Elifeleti. ¹⁷ Na babo Bafilisti habahuliche ugana bamshininye Daudi mauta yulu gabe oolo lya Isilaeli, Bafilisti bose bagile ummenga Daudi; nage Daudi guhuliche mwano, gusalile, gugile, u mahuo. ¹⁸ Bibyo Bafilisti babele bachube na usaliya wihongelela ya Balefai. ¹⁹ Bibyo Daudi gubudiche wa Mlume, uganine,Wi wii! Nagye u Bafilisti? Wibabiya mnda maboo manyi? Nage Mlume gumsambile Daudi, Sela; bululi chigilwe mibabiya Bafilisti mnda maboo mobe. ²⁰ Bibyo Daudi guhiile Baal-pelasimu, nageDaudi gubalwile uya; guganine, Mlume gwatulibiya bee tumangu twanyi u mbele wanyi, nahi maadi ma pila. Bibyo guhagitile ha iya ihana Baal-pelasimu. ²¹ Nabo bigishigile miishi gyabo uya, na Daudi na batu bage bagitelile koo. ²² Alakini Bafilisti bachwile iyaka lwendo lwa bubili, balisambaliche mnda ihongelela ya Balefai. ²³ Nage Daudi helibudiche wa Mlume, na Mlume guganine, Ushigye, uchunguluwe umyuma wabo, wabachwile u mbele wa miti gya mihela-hela. ²⁴ Hanyuma habibi, holihuliche madi mugya u masongo ma mihela-hela, haho noo gogwe waita abilo; bululi haho noo Mlume hene heligya u mbele obe galwe na basolokoto ba Bafiisti. ²⁵ Noo byeliitile Daudi, byoka biya nahi Mlume byelimlagila; Nage gubalwile Bafilisti uhuma Geba ndaa na Gezeli.