¹ Bibyo Ishboshethi mwaana gwa Sauli helihuliche ugana Abneli gwaawa ya Hebloni, baboo mage magingile bugongole, Baisilaeli bose badidibuwe. ² A gugo mwaana gwa Sauli gubele na batu babili, bilume pambwa; na china lya gumwe gugitilwe Baana, na china lya gwa bubili Lekabu mwaana gwa Limoni, M'beelothi, gwa baana ba Benyamini; (bululi Beelothi babalilwe uba ba Benyamini; ³ na babo ba Babeelothi basinine ugya Githaimu, noo habasushama u bugenyi ndaa na lino.) ⁴ Nage Yonathani mwaana gwa Sauli gubele na mwaana mine gubele na ilema ya magulu. Gusibele na myaa gitano gya ubuswa, mwana gwa Sauli na Yonathani haguhiile Yezleeli, na managulu gumguhile na usina nage, haya helisinine wa abilo, gugo mwaana guhogonowe na ugwa, nuuba ilema. Na china lyage gugitilwe Mefiboshethi. ⁵ Na baya baana ba Limoni, M'beelitho, Lekabu na Baana, bagile bahiile m ndu gya Ishboshethi, mengo ma chuba buhuchi, hababele hulitucha m kunyiya meeno. ⁶ Bahiile m'bwingi na ndu nahi balihuenga uguha ngano, bamtele sumo m gumo; hnyuma Lekabu na Baana mshiwabo basinne. ⁷ Bibyo habagingile mnda giya ndu, helibele mlachwu wiingo yage, mnda yumba yage ya ulalila, bammulile na ummaga, bamgedile mswe, baguhile mswe gwage, bagile lwabo m ndila gya Alaba busugu bose. ⁸ Bamlushishe Daudi mswe gwa Ishboshethi uya Hebloni, bamsambile oolo, Loola, guno m mswe gwa Ishboshethi, mwaana gwa Sauli, amangu obe, gubele huenga luhuda lobe; Mlume gwamgidichiya buubi wa buubi mlumyanyi oolo bino lino, hegulu ha Sauli na hegulu ha ibushi yage. ⁹ Nage Daudi gubagaile Lekabu na Baana, mshiwabo, baana ba Limoni, M'beelothi, gubasambile, Bili Mlume na mwego, mine guusile luhuda lwanyi mnda tuhunago tose, ¹⁰ gumwe mtu helisambile, ugana, Loola, Sauli gwaawa, gulangileugana gwalusha mwano gusoga , nim'bwatile nimmagile, uyaSiklagi, noo alambwe andimmele yulu ya myano gyage. ¹¹ Bibyo, inangwa batu basone bammagile mtu gwa kiine mmingo yage, wi wii! Bino hano nishisimba maashi mage mnda maboo mabo, na um'bulula benywe mnda sii? ¹² Haho Daudi gubalagile bawalubaga bage, babahagile, babagedile maboo namagulu, babasundiye mibamba mwa ichiba uya Hebloni. Nabo baguhile mswe gwa Ishboshethi baguchiile mnda sinda lya Abneli uya Hebloni.