¹ Bibyo habele na bita masugu mengi hwingi ha ndu gya Sauli na ndu gya Daudi; Daudi gugililile na ulisengemenya, alakini ndu gya Sauli gigililile udidibuwa. ² Nage Daudi gubutile baana uya Hebloni; bubele bwage bwa butangi gubele Amnoni, gwa Ahinoamu gwa Yezleeli; ³ nagwa bubili gwage Daudi, gwa Abigaili mmachage Nabali gwa Kalmeli; na gwa butatu Absalomu, mwaana gwa Maaka msiha gwa Talmai, oolo lya Geshuli, ⁴ na gwa buna Adoniya, mwaana gwa Hagithi; na gwa butano Shefatia, mwaana gwa Abitali; ⁵ na gwa mtuba Ithleamu, gwa Egla, mmachi gwa Daudi. Bano noo babutilwe wa Daudi uya Hebloni. ⁶ Bibele, mengo habibele bita hawingi ha ndu gya Sauli na ndu gya Daudi, Abneli guliomenenye mnda ndu gya Sauli. ⁷ Bibyo Sauli gubele na mmachage gwa mcha, china lyage gugitilwe Lispa, msiha gwa Aya; Ishboshethi gum'budiche Abneli, Yulu yai wagingila uli mmachi mcha gwa tata? ⁸ Haho Abneli guchigililwe na binywa bya Ishboshethi, guganine, Wi wii! Nene nili mswe gwa aawa, guli gwa Yuda? Ndaa na lino bino nilihummitila bya yano ndu Sauli sobe; na bashiwenyu, na magenda mage, nashiugitile gogwe uboo wa Daudi; gogwe ndaa na bino wambiya mmabachi lino yulu ya gugu mmachana. ⁹ Abetcha na ammitile Abneli bibyo, na uhima, nambo nisahummitila Daudi nahi Mlume byalimlahile pa; ¹⁰ Ubuhiticha buolo uhuma mndu gya Sauli, na wigimiya isuba ya Daudi hegulu ha Isilaeli, na hegulu ha Yuda, utula Dani ndaa na Beel-sheba. ¹¹ Na gushioshiche umgaa Abneli iyaka, yulu gumonine booba. ¹² Bibyo Abneli gutumine batu uli Daudi wine wilibele,guganine, Sii gino m gya nanyi? Ita malagano nanyi, na loola, uboo wanyi ubi hamechi nobe, yulu ya ubalusha ba Isilaeli bose oli. ¹³ Daudi guganine, Bisoga, niita malagano nobe, alakini nina itu imwechi yandisaba oli, nayo noo ino; Ushimona yenyi yenyi, nambo ushinandushisha Mikali, msiha gwa Sauli, haya hene holichwa uumona yanyi yanyi. ¹⁴ Bibyo Daudi gutumine batu wa Ishboshethi, mwaana gwa Sauli, ugana, Upe mmachanyi Mikali, gwandigindile na bibambi sambi bya buchi bwa ubulumyana bya Bafilisti. ¹⁵ Haho Ishboshethi gutumina batu, gumsapile Paltieli, mwaanagwa Laishi, mlumegwa guya mmachana, ¹⁶ Guya mlumyage gulamane nage, gugile nalila, gumlamine ndaa na Buhulimu. Bibyo Abneli gumsambile, Bino giwila, Nage gugiwile. ¹⁷ Bibyo Abneli guhungile mmungo na baulu ba Isilaeli, guganine, Haala niundile Daudi gamyilile; ¹⁸ bino, hano, m'beita bibyo; yulu Mlume gwamlumbula Daudi, ugana, wa uboo wa mgichi gwanyi, Daudi, nibahogonona batu banyi Isilaeli mnda maboo ma Bafikisti, na mnda maboo matumangu twabo tose. ¹⁹ Iyaka Abneli gudogomone m matu mwa Banyamini; hanyuma Abneli gugile yulu ya udogoma m matu mwa Daudi uya Hebloni binywa byose byine bimoneye uba bisoga u meeso ma Isilaeli, na u meeso ma ndu gyose gya Benyamini. ²⁰ Haho Abneli gumgilile Daudi uya Hebloni, na batu maumi mabili hamwechi nage. Daudi guhyiche biliwa bya saso yulu ya Abneli, na bato bose bene babele hamwechi nage. ²¹ Hanyuma Abneli gumsambile Daudi, Nigimana na ugya lwanyi; nene nimmongwela mlumyanyi oolo Isilaeli yose, yulu baita malagano nobe, wahyililemhegulu ha bose bene bali huunda luhuda lobe. Daudi gummele Abneli luhusa; Nage gugile lwage wa talala. ²² Na loola, bagichi ba Daudi hamwechi na Yoabu bahumine u bita, balushiche kole chingi hamwechi nabo; lakini Abneli gushibele Habloni wa Daudi; yulu gusibele hwahumma luhusa, nage gwahuhwa ugya wage wa talala. ²³ Bibyo Yoabu, na basolokoto losebabele hamwechi nage, habahiile, batu bamsambile Yoabu, gabanine, Abneli, mwaana gwa Neli, guchwile wa oolo, nage gwamma luhusa, nage gwagya wage wa talala. ²⁴ Bibyo Yoabu gumgilile oolo, guganine, Waita wii? Loola, Abneli gwachwa oli, yulu yai wamma luhusa nagegwahuhwa ugiwila wage? ²⁵ Gogwe ugidi Abneli, mwaana gwa Neli, ugana guchwile yulu ya uubicha, yulu gaanane byoli, gamane byolihuita. ²⁶ Nage Yoabu halihumine uli Daudi, guhilile batu ummenga Abneli, bamgiwiche uhuma wishima ya Sila; alakini Daudi gushibile na mwano. ²⁷ Haho Abneli heligiwile Hebloni, Yoabu gumguhile hibamba ndaa na m'bwingi mwa limbwa yulu gadogome nage wa menjwa; uya gumtele sumo mgumo, gee nuuwa; wa yulu ya maashi ma Asaheli, mshiwabo. ²⁸ Na hamyuma Daudi helihuliche, guganine, Nene na buolo bwanyi tushi na abachi u mnele wa Mlume, wa ibalo ya maashi maAbneli, mwaana gwa Neli. ²⁹ na mamgesele Yoabu mpala mswe mwage, na ndu gyose gya sage, iyaka gigyo ndugya Yoabu gisihulwe na mtu mine gulihuhumwa na maashi ao uwaswa na bushondo, ao wa ugyata na lubango, ao mine gwihagwa na ahilu au gwusaba biliwa. ³⁰ Bibyo Yoabu, na Abishai mshiwabo, noo bammagile Abneli, wa ibalo yage noo guhagile Asaheli mshiwabo uya Gibeoni u bita. ³¹ Hanyuma Daudi gumsambile Yoabu, nabatu bose bene babele hamwechi nage, Gulwe bichwalaganywa byenyu, mwachwale bisanjwa madagala, mwamlilile Abneli. Nage oolo Daudi gulamine mtando. ³² Bamchiile Abneli uya Hebloni; nage oolo gugabuwe na liidi lyage gumlilile uya u sinda lya Abneli, nabo batu bose balilile. ³³ Haho oolo bubiile malilo yulu ya Abneli, guganine, Bilingye Abneli uwa lubu lwine lusuwa mmugi? ³⁴ Maboo mobe masahambwa, Na ata magulu mobe basahambwa tumangila; Bisugwa mtu u mbelewa baana ba usona, noo byawagwa. Na batu bose bagililile ulila. ³⁵ Bachwile batu bose umtongelela Daudi gaye iliwa, milibele mengo ma mchuba; alakini Daudi gulahile pa, guganine Abetcha gangitile bibyo, na uhima, nabetonda mkati, ao inge yo yose hambele ha chuba uchinda. ³⁶ Balingamine batu bose, bibele bisoga u meeso mabo; nahi babibele bisoga u meeso mabo byose byine byeliitile oolo. ³⁷ Batu bose bamanine, na Isilaeli yose, luya lusugu, ugana mashi malanga ma oolo ugana Abneli, mwaana gwa Neli. ³⁸ Hanyuma oolo gubasambile bagichi bage, Mushigidi ugana mmata gumwechi, nage m mtu mmata gwagwa lino mnda Isilaeli? ³⁹ Na nene lino nadidibuwa, inangwa ninashinyiwa mauta nabe oolo; na babo batu, baana ba Seluya, m bagumu wandi nene; Mlume gamme usona ulamana na usona wage.