¹ Bibele hanyuma ha bibyo, Daudi gubudiche wa Mlume, ugana, Wi wii! Mnagya u mbuga gyo gyose gya Yuda? Mlume gumsmbile, Ehe, Ubegya. Daudi guganine, Nagye u mbuga nai? Guganine Hebloni. ² Haho Daudi gushinine na ugya uya, hamwechi na baachi babili, Ahinoamu gwa Yezleeli, na Abigaili, mmachi gwa Nabali, gwa Kalmeli. ³ Daudi nage gubasediche batu bge benebabele hamwechi nage, mtu ge gese na batu ba mndu gyage; bashamine mnda mbuga gya Hebloni. ⁴ Bibyo batu ba Yuda bagile, bamshinyinye Daudi mauta uya, gabe oolo hegulu ha ndu gya Yuda. Bamsambile Daudi baganine, Batu ba Yabesh-gileadi noo bamchiile Sauli. ⁵ Daudi gutumine batu u batu ba Yabesh-gileadi, na ubasambila, Bino benywe Muhalilwe mihaa na Mlume, bululi gwamgilila mlumyenyu bya ino yano, noo Sauli, gwamuchiile, ⁶ Mlume nage bino gamgilile bya yanona winene; na nene nimma iyo yano, yulu mwaita iyo ihisho. ⁷ Bino hano, maboo menyu m mabiwe uoma, benywe mube bilume pambwa; yulu Sauli, mlumyenyu, guwile, iyaka ndu gya Yuda gwashinya nene mauta nabe oolo lyabo. ⁸ Bibyo Abneli, mwaana gwa Neli, mmata gwa basolokoto ba Sauli, gubele mguhile Ishboshethi, mwaana gwa Sauli, na umdabula naummila Mahanaimu; ⁹ Gum'biile uba oolo uya Gileadi, na Baasheli, na Yezleeli, na Eflaimu, na Benyamini, na hegulu ha Isilaeli yose. ¹⁰ (Gugo Ishboshethi, mwaana gwa Sauli, myaa gyage gya ubuswa gibele maumi mana helitulile uhyilila hegulu ha Isilaeli, guhyilile myaa gibili.) Alakini ndu gya Yuda balamanine na Daudi. ¹¹ Na mengo mahyilile Daudi Hebloni hegulu ha ndu gya Yuda mabele myaa njwii n myechi mtuba. ¹² Bibyo Abneli, mwaana gwa Neli, na bagichi ba Ishboshethi, mwaana gwa Sauli bahumine Mahanaimu nuugya Gibeoni. ¹³ Gugo Yoabu nage, mwaana gwa Seluya, na bagichi ba Daudi, bagile, basambanine nabo hoka na ichiba ya Gibeoni; bashamine hasi, baba lulu luubi lwa ichiba, na baba lulu luubi lwa ichiba. ¹⁴ Abneli gumsambile Yoabu, Ibumbu ino bano bawalubaga bagimane na uina u mbele wetu. Yoabu guganine, Ehe! na bagimane. ¹⁵ Haho bagimanine, bagiile luubi lwa bubili wa lubalo lwabo batu umi na babili ba ilongo ya Benyamini, na ba Ishboshethi, mwaana gwa Sauli na batu umi na babili ba bagichi ba Daudi. ¹⁶ Baumbatilane, mtu ge gese gum'bwatile gunge nage u mswe gwage, na ubiya ahilu age mlubachu mwa gunge nage; bagwile hamwechi; na iya ihana igitilwe Helkath-hasulimu, haho m nda Gibeoni. ¹⁷ Biya bita bibele bigumu abisa luya lusugu. Nage Abneli guhiminywe, na batu ba Isilaeli, u mbele wa bagichi ba Daudi. ¹⁸ Na baana batatu ba Seluya babele haho, Yoabu, na abishai, na Asaheli bugele mmuhu u magulu nahi sunyu, ¹⁹ Nage Asaheli gumlamine Abneli; na mnda uya ugya wage gushihugulwile ugya uboo wa ulume ata uboo wa uachi helibele humlama Abneli. ²⁰ Haho Abneli gulolile u nyuma wage, guganine, M gogwe, Asaheli? Gumgaile, M nene, ²¹ Bibyo Abneli gumsambile, Ebuwa uboo obe wa ulume ao uboo obe wa uachi, um'bwate gumwe mmwalubaga, utuguhe tulume gele.twage. Alakini Asaheli gushigitabidiche uebuwa na uleya umlama. ²² Abneli gumsambile lwendo lwa bubili, Ebuwa, leya undama nene; yulu yai nuuhule ndaa nuugwisha hasi? Haya nabaosha wii uginuna yenyi yanyi u mbele wa Yoabu, mshiwenyu? ²³ Alakini guhaninye uebuwa; wa bibyo Abneli gumtele songo gya sumo lyage mgumo, liya sumo litobowe ndaa na unyuma mgongo; nage gugwile haho, guwile hoka haho, heligwile Asahelina uuwa, bagimanine. ²⁴ Alakini Yoabu na Abishai bamlamine Abmeli; na chuba lichindile haya habahyile loono lwa Ama, luli hulolana na Gia, mnda ndila gya mgala gya Gibeoni. ²⁵ Nabo baana ba Benyamini basumbile hamwechi u nyuma wa Abneli, babele mgomagumwechi, bagimanine hegulu ha loono. ²⁶ Bibyo gugo Abneli gumgitile Yoabu, guganine, Wi wii! Ahilu ubayebatu basugu mose? Wi wii! Ushigidi ugama isula yage bibi bululu? Bino bibi ndaa na mengo nai ushibasambile batu baleye ubalama bashiwabo? ²⁷ Nage Yoabu guganine, Bili Abetcha na mwego, nambo usaba dogoma, mndi halwelo babagya lwabo, bashibalame mshiwabo ge gese. ²⁸ Haho Yoabu gugilile asiba, na batu bose bagimanine, bashibalame Isilaeli iyaka, na bashilwile bita iyaka. ²⁹ Abneli gugile na bato bage busugo buya bose hawingi ha ha liya Alaba; badabwile Yolodani, bahitili hawingi ha Bithloni gyose, bahiile Mahanaimu. ³⁰ Yoabu gugiwile nage umlama Abneli; na helihwile ubasumbicha bato bose hamwechi, na babo bagichi ba Daudi bahungwilwe na batu umi na yahabula hamwechi na Asaheli. ³¹ Alakini bagichi ba Daudi babele bahubalwa batu ba Benyamini, na batu ba Abneli, na byabawile batu sambi chitatu na maumi mtuba. ³² Nabo bamswalile Asaheli, bamchiile mnda sinda lya sage, lyine libele uya Bethlehemu, Yoabu na batu bage bagyatile busugu bose, bubayelele uya Hebloni.