¹ Bino noo bunywa bya isula bya Daudi, Daudi mwaana gwa Yese, gwagana, Gwagana gugu mtu mine guginuninywe hegulu, Gee, mshinyiwa mauta gwa Abetcha gwa Yakobo, Mtungi gwa ng'imbo cha Isilaeli gwa uunjwa; ² Luhuda lwa Mlume ludogomine mnda mwanyi, Na inywa yage ubele u lulimi lwanyi. ³ Abetcha a Isiaeli, guganine, Huo lya Isilaeli lisambile, Mmyilichi gwa batu wa kiine, Gabehyilila wa bubyemu bwa Abetcha, ⁴ Gubi nahi lwenge lwa halwelo chuba halisutobowa, Lwelo lwine lushi na matimba. Lisunagya byanyi bya bibisi u bitete, Wa ugema hanyuma ha mbula; ⁵ Wi wii! Noo bishi ndu gyanyi u meeso a Mlume? Bululi bubiile nanyi malagano ma milumbu; Mali malamane mnda byose, m magimanyu. Yulu m yuhogonowa wanyi ose, na usimba wanyi ose. ⁶ Alakini gushibanagya batu ba buhuli-huli; Babi nahi miigwa gwa mgala gwa utelwa, Gwine gushibasolwa na uboo, ⁷ Mtu mine gwiguuda gugo, Na gaabe na igele na mti gwa sumo m muboo, Nabo bichigiwa hoka haho wa aahya. ⁸ Mano noo machina ma bilume pambwa bene balibele nabo Daudi; Yashibeamu gwa Mhakmoni, mmela gwa baata ba basolokoto; gugo guginune temo lyage hegulu ha batu sambi inana bene bahagilwe hamwechi. ⁹ Nahanyuma hage habele Eleazali, mwaana gwa Dodai, Gwahohi, gumwe gwa baya ba bilume pa,bwa batatu bene babele hamwechi na Daudi; hababatuwile Bafilisti bene babele basumbile uya yulu ya ulwa na Isilaeli babele bagibe lwabo. ¹⁰ gugo guginywine, gubahulile Bafilisti ata na uboo wage uimine, na uboo wage uchibatilane na ahilu; nage Mlume guitile uhogonowa wata luya lusugu; nabo batu bagiwile u nyuma wage yulu yauwata kole ka. ¹¹ Na hanyuma hage habele Shama, mwaana gwa Agee, Mmalali; nabo Bafilisti babele basumbile uya Lehi, habele na lubala lwa lugiluchu na abage; nabo batu babasinine Bafilisti; ¹² alakini gugo gugimanine m'bwingi mwa lulo lubala, na gululwilile, gubahagile Bafilisti; nage Mlume gulushishe uhogonowa waata. ¹³ Iyaka, gwa butatu hawingi ha baya maumi matatu bene babele baata basalile, bagile uli Daudi mengo ma usola ndaa na u mgumbo gwa Adulamu, na basolokoto ba Bafilisti babele bagiiye bitula mnda ihongelela ya Balefai. ¹⁴ Nage Daudi maya mengo gubele u mahuo, na basolokoto ba Bafilisti maya mengo babele Bethlehemu. ¹⁵ Daudi gusimbile, guganine, Nambo mtu gwabanywisha maadi ma ishima ya Bethlehemu, yine ibele hoka na limbwa! ¹⁶ Bibyo baya ba bilume pambwa batatu badungile basolokoto ba Bafilisti, batahile maadi uhuma mnda iya ishima ya Bethlehemu, yileili hoka na limbwa, bamaguhile na umlushisha Daudi; alakini gee gushigitabuwe umanywa, gumagesile u mbele wa Mlume. ¹⁷ Guganine, Pande, Mlume, nishigila bibyo; wi wii! Mashi mano maashi ma babo batu bene babiile bichuli-chuli yabo bya mwego mmahonasonga? wa bibyo gushigitabiche umanywa. Bibyo noo byabaitile biya bilume pambwa bitatu. ¹⁸ Iyaka, Abishai, mshiwabo na Yoabu, mwaana gwa Seluya, gubele mmela gwa baya batatu. Gugo guginune sumo lyage hegulu ha batu sambi chitatu, gubahagilegubele na china hawingiha baya batatu. ¹⁹ Wi wii! Gugo gushibele na punda chisoga hawingi ha baya batatu? Wa bibyo gubiilwe uba mmele gwabo; alakini gushitulile hambele ha baya batatu. ²⁰ Iyaka Benaya, mwaana gwa Yehoyada, mtu ilume pambwa gwa Kabseeli mine gubele hugila bikoko bya byata; guhagile matambwe mabili ma Moabu, iyaka guhagile tambwe m'bwingi niina mengo ma imundimundi; ²¹ gugo nage gummagile Mmisili, mtu gwa mlahu; nage gugo Mmisili gubele na sumo mmuboo wage; alakini gee gumsalile na igingo, gumsapile guya Mmisili sumo m muboo wage, gummagile na sumo lyage gee mine. ²² Bibyo noo byeliitile Benaya, mwaana gwa Yahoyada, gubele na china hawingi ha biya bilume pambwa bitatu. ²³ Gubele na bunyemu uhima baya maumi matatu, alakini gushibele gwa mtangi hawingi ha baya batatu, Nage Daudi gum'biile hegulu ha balochi bage. ²⁴ Asaheli, mshiwabo na Yoabu, gubele gumwe gwa baya maumi matatu; na Elhanani, mwaana gwa Dodo, gwa Bethlehemu; ²⁵ Na Shama, Mmalodi, na Elika, Mmalodi; ²⁶ Na Helesi, Mpeloni, na Ila, mwaana gwa Ikeshi, Mtekoi; ²⁷ Na Abiezeli, Mwanathothi, na Sibekai, Mhushahi. ²⁸ na Salmoni, Mwahohi, na Mahatai, Mnetofathi; ²⁹ na Heledi, mwaana gwa Baana, Mnetofathi, na Itai, mwaana gwa Libai, gwa Gibea gwa baana ba Benyamini; ³⁰ na Benaya, Mpilathoni, na Hulai, gwa bichiba bya Gaashi; ³¹ na Abieli, Mwalbathi, na Azmawethi, Mmbalhumi; ³² na Eliabu, Mshaalboni, na baana ba Yasheni; na Yonathani, ³³ mwaana gwa Shama, Mmalali, na Ahiamu, mwaana gwa Shalali, Mmalali; ³⁴ na Elifeleti, mwaana gwa Ahasbai, na Hefeli, Mmaakathi; na Eliamu, mwaana gwa Ahithofeli, Mgiloni; ³⁵ Hezlo, Mkalmeli, na Paalai, Mmalbi; ³⁶ na Igali, mwaana gwa Nathani, gwa Soba, na Bani, Mgadi; ³⁷ na Seleki, Mmamoni, na Nahalai, Mbeelothi, bene babele baswachi ba tulume gela twa Yoabu, mwaana gwa Seluya; ³⁸ na Ila, Mmithli, na Galebu, Mmithli; ³⁹ na Ulia, Mmiti, lubalo lwabo bose lubele batu maumi matatu na njwii.