¹ Bibyo Daudi gumsambile Mlume binywa bya luno lwimbo, luya lusugu lummogonone Mlume mnda maboo ma tumangu twage tose, na mnda uboo wa Sauli; ² guganine, Mlume noo huo lyanyi, na businino bwanyi, na uhogonowa wanyi, ehe, wanyi; ³ Abetcha a huolyanyi, nimmudagile gee; Ngabo gyanyi, na lwiga lwa uhogonowa wanyi, ndu gyanyi gya gilahu, na businino bwanyi; Mmogononyi gwanyi, wapogonona na anene. ⁴ Nimgita Mlume gulingye utonywa; Bibyo nihogonowa na tumangu twanyi. ⁵ Bululi mabimbi ma luubu manyunguluwe, Mtupuo gwa usona gumbiile booba. ⁶ Migochi gya usinda ginyunguluwe; Magochi maluubu ginjwilile. ⁷ Mnda asusu anyi nimgitile Mlume, Ehe, Nimgabile Abetcha anyi; Nage guhuliche liidinlyanyi m lubunga lwage; Lilo lyanyi ligingile m matu mage. ⁸ Haho sii gidigile na udanda, Mishingi gya gulu gilugile-lugile, Na udigila, wa ibalo gubele mchigililwe. ⁹ Mii guselile uhuma mmihyembe gyage, Aahya uhuma mnda anywa age alile; Maala malaminywe nao. ¹⁰ Guginaminye gulu gusalile;Habele na mdoo gwingi hasi na magulu mage. ¹¹ Guselile hegulu ha kelubi na uguluwa; Ehe, gumoneye hegulu ha bihwahwa bya mnaga. ¹² Guitile mdoo nuuha hema lyage lya umchunguluwa, Lukongwe lwa maadi, matimba meengi ma ha gulu. ¹³ Uhuma u lwenge lwine lubele u mbele wage, Maala ma aahya malaminywe. ¹⁴ Mlume gutelekuba uhuma ha gulu, Nage Gwa hegulu gugabile na liidi lyage. ¹⁵ Gutele migwii, gubasalile, Ehenyu-henyu, nage gubasalile. ¹⁶ Haho noo hamoneye midabwa gya bahali, Mishingi gya lungu gibisulwe, Bululi bwa uambila wage Mlume, Wa uhemena wa luhula lwa mmihyembe gyage. ¹⁷ Guhilile huma hegulu, gumbwatile; Gupogonone mnda maadi mengi; ¹⁸ Gupogonone na tumangu twanyi twinetuli nauoma, Na baya bene bali hukonywa; Bululi babele na uoma upima nene. ¹⁹ Banjwilile masugu ma tuhunago twanyi; Alakini Mlume gubele msego gwanyi. ²⁰ Gupogonone gupilile henehali naihana; Guponinye yulu gumenjiche. ²¹ Mlume gungilile ulamana na kiine gyage; Ulamana na uhahalawa maboo manyi gupele. ²² Bululi nigyutile madila ma Mlume, Na nishiabengile Abetcha anyi. ²³ Bululi uonona wage ose ubele hambele hanyi; Na yulu ya mwano gwa alago age, nishialeile. ²⁴ Nene nibele m'bwilile weli; Nilibagule na usona wanyi. ²⁵ Bibyo Mlume gundipile ulamana na kiine gyanyi; Ulamana na uhahala wa maboo manyi u mbele wage. ²⁶ Wa mine gwina yano, ubi na yano; Wa mtu gwa m'bwilile wilimonya uba m'bwilile; ²⁷ Wage guya gulihahacha wilimonya weli uba mmaha; Na wa mmugi wilimonya gwa buhuli-huli. ²⁸ Na batu bene balihumonenywe gogwe wibahogonona; Alakini meeso mobe mali hegulu ha bene bali na anene, ubasache. ²⁹ Bululi gogwe uli yaa yanyi, Ee Mlume; Na Mlume gwindamyila mnda mdoo gwanyi. ³⁰ Yulu ya uwatilicha obe nilihubalama basolokoto; Wa uwatilicha wa Abetcha anyi naitowa ubambacha. ³¹ Abetcha madilamage m mawilile; Ulaga wa Mlume wacheelechiwa; Gee noo ngabo gyabo, Bose bene balihumsinina. ³² Bululi m nanyi guli Abetcha, nambo gushi Mlume? M nanyi guli businino, nambo gushi Abetcha etu ka? ³³ Abetcha noo businino bwanyi mine guli na uoma; Nage gusubalombwela ba bawilile ndila gyage. ³⁴ Gusumaita magulu manyi nahi ma sunyu; Na ungimiya haihana yanyi ya hegulu. ³⁵ Gwagigya maboo manyi bita; Naata maboo manyi malihuhinga buta bwa mmobo. ³⁶ Gogwe wapa ngabo gya uhogonowa obe; Na ulisacha obe wanginuna. ³⁷ Wabyitila bichuli-chuliby mwego matamba manyi, Na magulu manyi mashi shebutuwe. ³⁸ Nabalaminina ba tumangu twanyi, na utuchimya; Na nishigiwile u nyuma nda na byabasungichiwe. ³⁹ Nene nibasingichena ubahula-hula bashioshe ugimana; Ehe, bagwile hasi ha magulu manyi. ⁴⁰ Bululi upambile mchingo gwa uomagwa bita; Waasadicha boo hasi hanyi bene bang'ongele. ⁴¹ Ehe, tumangu twanyi wabaita bateye kungu, Yuly nabachinge koo bene bali hukonywa, ⁴² Balolile, alakini hashi gubahogonona; Bamgitile Mlume, alakini gushibagaile. ⁴³ Haho nibaswagile nahi ihwili ya bitete, Nibaswagilenaho biswaswa bya mndila, nibasalile mwaa. ⁴⁴ Gogwe wapogonona na uhimana wa batu banyi; Wambisa nabe mswe gwa mioga; Batu bandishigidi bingilile migilo. ⁴⁵ Bagenyi binjwila na ulisacha; Wa uhulicha mwano gwanyi ka, Haho biinyemya. ⁴⁶ Bagenyi nabo bidanda, Buhuma mnda mahuo mabo bali hudanda. ⁴⁷ Mlume noo guli na mwego; Na gatonywe huo lyanyi; Na gatonywe Abetcha a huo lyanyi lya uhogonowa wanyi; ⁴⁸ Ehe, Abetcha ene asungiwidicha buubi wa buubiu tumangu twanyi, Naubasacha batu hasi hanyi. ⁴⁹ Na uutobola hambuga na nahume u tumangu twanyi; Ehe, wanginuna hegulu ha bene baliginune hegulu hanyi; Waponya na mtu gwa anene ⁵⁰ Bino Mlume, niutona hawingi ha mioga, Na nene niligimbila china lyobe. ⁵¹ Gwamma oolo lyage uhogonowa waata; Gwammitila bya yano mshinyiwa mauta gwage, Daudi na ibushi yage, ndaa na milumbu.