¹ Iyaka sungu cha Mlume chilamine hegulu ya Isilaeli, gubiile Daudi maanga yulu yabo, guganine, Ugye, Ubabale ba Isilaeli na Yuda. ² Bibyo oolo gumsambile Yoabu, mmela gwa bilume pambwa bya basolokoto, bene babele hamwechi nage, Bino uchunguluwe hawimgi ha mioga gyose gya Isilaeli utula Dani mndaa na Beel-sheba, mubabale batu, naushe umana lubalo lwa babo batu. ³ Nage Yoabu gumsambile oolo, Mlume, Abetcha obe, na gabagolwele batu, lubalo lwabo lwahuba lo lose, nyendo sambi, iyaka meeso ma mlumyanyi oolo na mabamone; alakini yulu yai ino inywa ishinagitabichiwa na oolo mlumyanyi? ⁴ Alakini inywa ya oolo ibele igumu uli Yoabu, na uli bilume pambwa bya basolokoto u meeso ma oolo, ugya ubala batu ba Isilaeli. ⁵ BadabwileYolodani, bagimiile bitulauya Aloeli luubi lwa uboo wa ulume wa mbuga gibele hawingi ha ihongelela ya Gadi ndaa na Yazeli; ⁶ hanyuma bahiile Gileadi, na sii gya Bahiti uya Kadeshi; hanyuma bahiile Dani, na uhuma Dani bachunguluwile ndaa na Sidoni, ⁷ bahiile u mahuo ma Tilo, na u mabuga mose ma Bahivi, na ma Bakanaani; iyaka uhuma luubi lwa uboo ulume wa Yuda uya Beel-sheba. ⁸ Nabo habahwile uchunguluwa sii gyose, bahiile Yelusalemu isula ya myechi yahabula na masugu maumi mopi. ⁹ Nage Yoabu gummele oolo lubalo lose kwa batu; nabo babele ba Isilaeli bilume pambwa bene bali huhulula tuhilu sambi uki inana (800,000) ; nabo ba Yuda babele batu sambi chitano uki (500,000). ¹⁰ Haho mtima gwa daudi gumdidibuwe abisa hanyuma ha ubabala babo batu. Nage Daudi gumsambile Mlume,Naluba abisa wa biya byandagila; alakini bino, Eee Mlume, ibumbu ino uuhunye koo usona wa mgichi gobe; yulu nagiwa wa buhoso abisa; ¹¹ Na Daudi helibyuwile halwelo, inywa ya Mlume imchwilile mbuwa Gadi, mmonyi gwage Daudi, ugana, ¹² Ugye wadogome na Daudi, Mlume gwagana bino, Nuubila bikoko bitatu; hawingi ha bibyo usobe imwechi, nuugile iyo. ¹³ Haho Gadi gugile uli Daudi, gumganine, gumsambile, Bino, myaa njwii gya ndala gichwe mnda sii gyobe? Ao myechi gitatu wabehusina u mbele wa tumangu tobe, na bali huulaminina? Ao masugu matatu haabi bisumi mnda sii gyobe? Hunga mmungo bino hano, uengeleche, m yinywa nai yandimgiwidicha guya mine gwatuma. ¹⁴ Nage Daudi gumsambile Gadi, Nahugingila mnda adugwa abisa; bino hano na tugwe mnda uboo wa Mlume; bululi uleelella wage m wingi; na nashigwe mnda maboo ma batu. ¹⁵ Haho Mlume gulushishe bisumi u Isilaeli utula lwelo ndaa na mengo mene maganinywe; nabo bawile batu utula Dani ndaa na Beel-sheba uki maumi njwii. ¹⁶ Alakini gugo malaika heligololile uboo wage ulosha Yelusalemu yulu gagigugiche, Mlume gulibediche yulu ya buya buubi, gumsambile guya malaika mine gulihubahaga batu, Byahwa, bino ubelebecha uboo obe. Nage guya malaika ma Mlume gusibele hoka na lagala lya uhulila lya Alauna, Myebusi. ¹⁷ Daudi, helimmonine guya malaika mine guli hubahula batu, gudogome na Mlume, guganine, Loola, m nene mine gwaluba, m nene mine gwahubagana; alakini gino myoo, gyaiya ii?Uboo obe na ube hegulu hanyi, na hegulu ha ndu gya tata. ¹⁸ Lulo lusugu Gadi gugile uli Daudi, gumsambile, Bino! Gogwe ugye, umgimiila Mlume butambikilo mnda lagala lya Alauna, Myebusi. ¹⁹ Haho Daudi gugileulamana na inywa ya Gadi, nahi biya Mlume byelimsambile. ²⁰ Gugo Alauna gulolile, gummonine oolo nabagichi bage balihumchwila; Alauna gutobowe, guginamine u mbele wa oolo uginyiya yenyi ndaa nahasi. ²¹ Alauna guganine, Mlumyanyi oolo gulihumchwila mcha gwage wa ibalo nai? Nage Daudi guganine, Bululi naligule lino lagala, yulu namgimyile Mlume butambikilo, yulu bisumi bichibilwe u batu. ²² Alauna gumsambile Daudi, Mlumyanyi oolo na gaiguhe, gatangile bya bisoga u meeso mage; loola, ng'ombe chino yulu ya lutangi lwa uchigya, iyaka bitundu bya uhulila, na bitundu bya ng'ombe, biliho u kunyi, ²³ Bitundu bino byose, Ee oolo, neneAlauna nuuha gogwe oolo. Hanyuma Alauna gumsambile oolo, Mlume Abetcha obe, na uugitabiche. ²⁴ Alakini oolo gumsambile Alauna, Nangu, bishi bibyo; alakini winene nibigula oli wa ulamana na ugulwa wabyo; na nishimtangila Mlume Abetcha anyi, lutangi lwa uchigya lwandishi mmanane bumona. Bibyo Daudi guligulile liya lagala lya uhulila na chiya ng'ombe wa shekeli maumi matano ma lusuu. ²⁵ Nage Daudi gugimiye butambikilo uya, gutambikile lutangi lwa uchigya na lutangi lwa talala. Haho Mlume gugileelele sii, na bisumi bichibilwe mnda Isilaeli.