¹ Nilingie ulitona, inangua bishibibenju, bino nigila malo uginyunywa wa Mlume Yesu. ² Nimgidi gumwe ntu gumwechi wa KIisto, iyalibu miaa umi na giina, (nambo gubele mnda m'bili nishigidi, nambo gubele hambuga ha m'bili nishigidi, Abetcha agidi) gugo ntu gugululwe mpaaka gululwe mpaka gulu lya butatu. ³ Na nene nigidi gugo ntu, (nambo gubele mnda m'bili nishigidi, nambo gubele hambuga nam'bili nishigidi, Abetcha akidi). ⁴ Ugana gugululwe mpaga laladiso, guhuliche binywa bishinadogomwa, bishilingie mtu ubidogoma. ⁵ Wa miano gya gugo mtu nilitona, wa yulu ya mtima gwanyi nishilitona, ila wa yulu ya usumwa wanyi. ⁶ Nambo nababenja ulitona nishisuba mmugi, yulu nidogoma bya winene. Wa bibyo nene nalichibila, bululi mtu gashimbale uhima bielihumona wandi na ubihulicha. ⁷ Na yulu nishilitone uhima abisa wa ununilwa wingi ubo, nihelwe miigwa uu m'bili ganyi, mdogomi gwa ihingili yulu gapule, bululi nashilitone uhimaabisa. ⁸ Wa yulu ya gugo miigwa miimtongelele Mlume nyendo chitatu gamangulego. ⁹ Nage gusambile, keene chanyi chwilila, bibyo uosha wanyi wawilila hegulu ha bisumi. Bino nilitona yulu ya isumi yandinayo wa saso liingi, bilulu uosha wa Klisto ushame hegulu hanyi. ¹⁰ Wa bibyo nilihubenja bisumi, na buhuli-huli, uwilwa, utonga, unananywa, wa yulu ya Klisto. Bululi handi na isumi noo handi na uoma. ¹¹ Nibele mmugi, benywe mundazimisha yulu bilingie natonywe na benywe, bibyo nishibele gwa hasi ha bahilwa ba babaosobu wa yoyose, inangu nishi atu. ¹² Wiinene bisaga bya bahilwa bigilie hawingi henyu wa ulitolelecha ose, wa bisaga, biloya na tenene. ¹³ Iyii ya mwahunguilwa ulichinge munga, yulu nene nishim'beile mundeelele wa bubo bubi. ¹⁴ Lolwe, luno iiluendo lwa butatu lwandi huenga uchwa ubo wenyu nishim'bea, na nishihuenga bitundu wenyu, ila nihummenga benywe, yulu bishilingie mwaana ubiila sage akiba, shibaana noo gusumbiila mwanage. ¹⁵ Na nene wa saso liingi niisala byose na iyaka nitelwa telua yulu ya mitima gyenyu. Wiwii! wa biya bindihugililila um'benja abisa, nahunguilwa uunjwa? ¹⁶ Na biso bibyo, nene nishimsuiche mchigo, yulu ya uba na bwenge nibapashile ulihana. ¹⁷ Wiwii! ntu gegese guandihilile wenyu, uli gugo ntu nimlipishe ii? ¹⁸ Nimsambile Tito, nimmilile guya mbuswa hamwechi naage, wi! Tito gumlipishe ii? Wi! tushigile wa mtia goguya na wa mengo moka maya? ¹⁹ Mulihulanga ata mano mengo tualibagula nenyu! umbele w'Abetcha tulihudogoma wa Klisto. Na bibyo byose, baundua, ii yulu ya umgubaa benywe. ²⁰ Yulu nasinga, nashichue um'bunga nahi biandihubenja uum'banga, na umonea wenyi ushi nahi biya bianmulihubenja nashichwe ubanga hange bubaka, buwa, sungu, na biumano, na uchingana,na minuno, na ulitona na alugi. ²¹ Na nene handichwa iyaka, Abetcha anyi ashiche uusacha wenyu, na nene ubanunila beengi balubile utula ala, bashibalibeche bubi bwabu, namasei, na udogia wabagilile.