¹ Nambo mwabalitolelecha hamwechi nanyi uu buhugi bwanyi buucha! Ehe, mulitoleleche nanyi. ² Yulu nihummonena buwa, buwa bw'Abetcha yulu nimsindilele mlume gumwechi, bululi nammilile Kelesitu msiha guhaha. ³ Bino nihumona booba, nahi giya ndoa biagibidiche Eva wa lulimi lwage, gashichwe ubadokia malanga menyu, mulame ugolowa uhaha wa Kelesitu. ⁴ Nambo gumwe mtu gwahuchwa ulisamba gunge Yesu mine gwatushilisambile beswe, oo ugaa mtima gunge gwamushigaile ao mwano gunge guamushigitabiche mwagila bibenju wa ulitolelecha nange! ⁵ Nihulanga nene nishihunguilwe atu abali nao bahilwa baata. ⁶ Inangwa nene nishigidi udogoma, guno gushimshaminyi gwalwenyi lwanyi, wa inywa yoyose tumanyia wenyu. ⁷ Wiwii! nagila bubu wa ulisacha yulu benywe muginunwe, bululi nilisambile mwano gw'Abetcha ushi wa uhewa alambwe? ⁸ Nibasapile binge bihwilo bumona bwabo? Niguhile iliwa yanyi yulu namkilile nayo. ⁹ Nahandibele hamwechi neyu wa biandibele hubenja nishibele mchigo wa mtu. Bululi baya babusua bahumine Makedonia bapele biambele hubenja, na nene ubitu byose miliusile mtima gwanyi nashibe mchigo ata guchoo, iyaka niliusa. ¹⁰ Nahi byoka biya winene wa Kelesitu biauli mnda mwanyi, hashi mtu gupamba onywa yulu ya ulitona wanyi ubo, ung'umba chose cha Akaya. ¹¹ Yulu yai? Wiwii! Bululi nishihumnda benywe? Abetcha agidi. ¹² Bino, yandihugila, niigila, bululi nabachibile baya bene balihuenga ihana bashihuihewa ihana, bululi wa iya inywa yabalihulitonena bamoneye uba nahi beswe. ¹³ Monywe batu nahi babo ii bahilwa ba lulimi, balihugila mgilo gwa lulimi, balihuligalula babe nahi bahila ba Klisto. ¹⁴ Yulu bishibiugagilwa. Ata ihingili yoyine isuligalula wa mlingilisho gwa malaika gwa lwenge. ¹⁵ Iyaka ishi inywa yugagilwa ba kiine, isula yaba ibi bili mgilo gwabo. ¹⁶ Nihugana iyaka, mtu gashilange ugana nene nilimmugi, nambo mulihunangila bibyo, mum'bwasha nahi mmugi, bululi na nene nalitone ata hacho. ¹⁷ Yandihudogoma, nishihudogoma alago a mlume, mnahi wa buhugi, wa uosha ulitona biino. ¹⁸ Yulu beengi bali hulitonawa m'bili, na nene nilitona. ¹⁹ Na benywe yulu mwina lwenyi, mulitoleleche na bahugi wa saso. ²⁰ Bululi mwalitolelecha na mtu gulihum'bia bacha, nuumina, na um'buata, wa uliginuna hegulu, na ummula ubienyi. ²¹ Nihudogoma wa ulisacha bululi beswe tubele basumwa. Bibyo uba mtu guina uoma u bose (nihudogoma wa buhukia), na nene ninao uya uoma. ²² Boo ii baebulania, na nene gese. Boo ii baisilaeli? Na nene gese. Boo iyi bushi ya Ibulaimu? Na nene gese. ²³ Boo ii bakichi ba Klisto? (Nihudogoma nahi gwa miishi) nene iyubahima oo wa asusu ubahima boo abisa, wa uhambwa uhima boo abisa, wa bihulo ubahima boo abisa, wauhona lubu nyendo chingi. ²⁴ Wa Bayahudi nyendo chitano nihulilwe bibogo maumi maana uhunya imwechi. ²⁵ Nyendo chitatu nihulilwe tubundo lwendo lumwechi nitelwe mawe, niendo chitatu nibelelwe na bwato, busugu uya na busugu ugila nishamine m'benga. ²⁶ Wa ng'endo nyendo chingi, tususu twa mngudi, tususu twa ubasapi, asusu wa umoga gwanyi, asusu uginge mioga, tususu twa mmadila, tususu twa mlwanaganywa, tususu twa m'bahali, tususu u bashiwetu ba lulimi. ²⁷ Wa asusu na uhaba mtima, wa uyesha nyendo chingi wa ndala na yumu, wa uhamba nyendo chingi, wa peho na uba buchi. ²⁸ Wa uhulwa binge bibya bya hambuga, uli Brunhilda masugu mose, ii uenena bihwilo byose. ²⁹ Mnanyi msumwa, nene nishi msumwa? mnanyi gwandihiateche nene nanguuchikililwa? ³⁰ biahuba nalitona yulu ya isumi yanyi. ³¹ Abeca, sage gwa mlume Yesu, guya mgengeda ata milumbu, gugildi nishihudogoma lulimi. ³² Ubo Dameski mmosobu gwa olo Aleta gubele huusa bihwelo bya gya Badameski bululi bambuate. ³³ Nene basachiche mmitungu, ha hundu lya wibambacha, nihonine na maboo mage.