¹ Luno noo lwendo lwa butatu lwa nene uchua wenyu. Wa tunywa twa bamonine babili ao batatu binywa byose bii bia winene. ² Nitulile umsambila, nahi biya biendibele wenyu lwendo lwa bubili, bioka biya nisahubao, naamsambila hululu baya bagilile bubi utule haho, nabange bose, handichwa nishibamonena keene. ³ Bululi mulihuenga umona Klisto byeli hudogoma mnda mwanyi, ashi alema wamli, yulu guli na uosha mnda mwenyu. ⁴ Bululi gususulwe u bulema, gulihushamawa uoma w'Abetcha. yulu na beswe tuli na bulema yulu yage, tuishama hamwechi nage wa uosha w'Abetcha wamle nao. ⁵ Litonjwe benywe bene nambo mli mbuwasha, mulilole benywe bene, mushiligidi benywe bene, ugana Yesu Klisto guli mnda mwenyu? uba nambo mwahanyiwa. ⁶ Nihuudagile ugana mugidi beswe tushibahanyiwe. ⁷ Na beswe tulihumsaba Abetcha,mushigile ihisho yoyose ili ibi, ushi ugana beswe tumoneye tuagitabichiwa, ya ibenju benywe mugile iya ili isoga, bilihumonea beswe nahi bene bahanyiwa. ⁸ Yulu tushinagila inywa yoyose inyume ya winene, byose ii yulu ya winene. ⁹ Tuli nasaso inangwa tuli na bukokoo, benywe mwina uoma. Iyaka tulihusaba ino nayo benywe muwilile. ¹⁰ Wa bibyo, nagola bino nisahubaho, atanahubaho, nashimonye buhuchi wa uosha uya wandihelwe na Mlume, wa ugubaa ushi wa ubela. ¹¹ Wa isula,babusua, m'beshigala bisoga, m'builile, muhungiwe, mlangile umwechi, shamwe na talala, Abetcha a luundo na talala abi hamwechi nenyu. ¹² Salamwa wamli wa uumbatila uhaha. ¹³ Bahaha bose bagana salamwa. Keene cha Mlume Yesu Klisto, na luundo lw'Abetcha, na uba umwechi wa ntima guhaha gishame hamwechi nabenywe bose.