¹ Bibyo, liya lindo lya Mlume libelemo mnda sii gya Bafilisti mengo ma mwechi njwii. ² Nabo Bafilisti babagitile bibuli na bagabo, baganine, Tluiite wii lindolwa Mlume? Mutumonye byatwiosha uligiwicha wihana yalyo. ³ Nabo bagaile, M'beligiwicha lilyo lindo lya Abetcha a Isilaeli, mushiligiwiche lishi na mmaso; alakini mushihulwe ulihila na lutangi lwa uluba; haho noo mwihona, iyaka mwiununilwa yulu yai uboo wage usahunyiwa wenyu. ⁴ Haho babadiche, na lulo lutangi lwa uluba lubi lwa bihi, luya lwatwimmilila? Nabo bagaile, na bibe bihute bya nolo bitano, na mbeba cha nolo chitano, ulamana na lubalo lwa mashehe ma Bafilisti; bululi isumi imwechi ibele yulu yenyu benywe bose na yulu ya mashehe menyu. ⁵ Wa bibyo mwiita mmishi gya bihuta byenyu, na mmishi gya mbeba gyenyu chine chili hugugicha sii; na benywe mwamginune guya Abetcha a Isilaeli; hange gwihungula bushito bwa uboo wage hegulu henyu, nanhegulu ha tubetcha twenyu, na hegulu ha sii gyenyu. ⁶ Yulu yai, bino, mwagumagacha mitima gyenyu, nahi biya baya Bamisili, na guya Falao, byabagumageche mitima gyabo? Ata na baya, haya habahwile ubasebulula, wii! Bashibasambile batu, nabo nuugya wabo? ⁷ Bino hano mulilongecha abilibili aahya, mwaguhe na ng'ombe chibili cha maota chyine chili hukokya, chine chishinahambwa mti gwa umaoshi, benywe mwachihambe chicho ng'ombe wabilibili, na uhunya baana bacho na ubabiya mliha; ⁸ hanyuma ligihwe liya lindo lya Mlume, na ulibiya hegulu ha abilibili; na biya bibya bya nolo, byamwimmilila uba lutangi lwa uluba, mwabibiya m linge lindo mibamba mwalyo; mwalihile lindo, lyage. ⁹ Hanyuma mwalingamine, byalibi hugya mndila gya u lugumba lwage lwa ugya Beth-shemeshi, bibyo, gee noo gutuitile usona umo ose wa wata; pande, bishi byo, haho noo hatwimana ugana ushi uboo wage wine watuhula; abele ahonasonga ene atupashile. ¹⁰ Haho babo batu baitile bibyo; baguhile ng'ombe chibili chine chili hukokya, bachihambile wabilibili, na baana bacho babahambile mliha; ¹¹ Hanyuma balibiilelindo lya Mlume hegulu ha abilibili, hamwechi na lindo lyine lilimo mbeba gya nolo na miishi gya bihute byacho. ¹² Na chicho ng'ombe chigile m gigyo ndila lumwechi wa lumwechi ugya Beth-shemeshi; chilamine ndila bya balabala, chigile chilihulila, alakini chishigalwile luubi lwa ulume ata lwa uachi; na mashehe ma Bafilisti bachilamine mnyuma ndaa na uluhyila lugumba lwa Beth-shemeshi. ¹³ Nabo batu ba Beth-shemeshi babele busola ngano wibetabeta; biginune meeso mabo, balimonine lindo, baseelele abisa wa ulimona. ¹⁴ Na aya abilibili agingile mlubala lwa Yoshua gwa Beth-shemeshi, na ugimana hoka haya, henehabele liwe lya lyata; bibyo banogile giya miti gya abilibili, bachihuminye chiya ng'ombe uba lutangi lwa uchigya wa Mlume. ¹⁵ Nabo Balawi balisachiche lindo lya Mlume, na liya lindo lyine libele hamwechi nalyo, lyine libele na bibya bya nolo; babibiile hegulu ha liya liwe lya lyata; nabo batu ba Beth-shemeshi batangile lutangi lwa uchigya, na ushinja nyama loka lulo lusugu yulu ya Mlume. ¹⁶ Na baya bashehe batano ba Bafilisti, habahwile umona bibyo, bagiwile Ekloni loka lulo lusugu. ¹⁷ Luno noo lubalo lwa biya bihute byine byabahile baya Bafilisti, byabe lutangi lwa uluba wa Mlume; wa Ashdodi imwechi, wa Gaza imwechi, wa Ashkeloni imwechi, wa Gathi imwechi, na wa Ekloni imwechi; ¹⁸ na mbeba cha nolo, ulamana nalubalo lose lwa mabuga mose ma Bafilisti, bihana byabo baya bashehe batano, mabuga mene mali ma migumbo na tusoi twa mabala nato. Nalyo liya liwe lya lyata, lyine lyababiile liya lindo lya Mlume, lili haya ndaa na lino mlubala lwa Yoshua gwa Beth-shemeshi. ¹⁹ Bibyo Mlume gubahulile bamwe batu ba Beth-shemeshi, wa ibalo balingamine mnda liya lindo lya Mlume, nahi batu maumi njwii, na batu uki maumi matano; nabo batu bagabile, bululi Mlume gubahulile batu na uhagana wa wata. ²⁰ Nabo batu ba Beth-shemeshi baganine, M nanyi gunaosha ugimna u mbele wa Mlume, guno Abetcha mmaha? Nage m nanyi gwiosha utuhuminya lindo uhuma uno wetu? ²¹ Nabo batumine batu bagye u bashami ba Kiliath-yealimu, ugana, Bafilisti baligiwicha lindo lya Mlume; bino salwe, muliguhe wenyu.