¹ Bino Bafilisti babele baguhe lindo Abetcha, bagile nalyo uhuma Eben-ezeli ndaa na Ashdodi. ² Bafilisti baliguhile lindo lya Abetcha, balibiile mnda ndu gya Dagoni. ³ Na batu ba Ashdodi, hababyuwile halwelo pee lusugu lwa bubili, mndi! Dagoni gwagwa hasi lubulubulu, u mbele wa lindo lya Mlume. Baguhile Dagoni, bagigimiye ha ihana yage iyaka. ⁴ Na hababyuwile mmeshi gwage halwelo, mndi! Dagoni gubele mgube hasi lubulubulu, u mbele wa lindo lya Mlume; na mswe gwage na biganda ganda gyage bibili byuutubu, bili bilachu u m'bimbi gwa ndu; Dagoni ishigele itimbigili yage ka. ⁵ Wa bibyo bibuli bya Dagoni, na mtu guya mine gusugingila mnda ndu gya Dagoni, bashigyatile m'bimbi gwa ndu gya Dagoni uya Ashdodi, ndaa na lino. ⁶ Alakini uboo wa Mlume ubele unyemu yulu ya batu ba Ashdodi, gubagugiche, gubahulile na bihute, uya Ashdodi na u ng'umba chage. ⁷ Hanyuma baya batu ba Ashdodi, habamonine byabibele, baganine, Lilyo lindo lya Abetcha lishishama uno wetu; yulu uboo wage m'yunyemu yulu yetu, na yulu ya Dagoni, abetcha etu. ⁸ Haho hahile batu bagye ubaongola wabo ba shehe bose ba Bafilisti, baganine, Tuliitile ii lindo lya Abetcha a Isilaeli? Nabo bagaile, Lindo lya Abetcha a Isilaeli lubululwe ligye Gathi, Balibulule lindo lya Abetcha a Isilaeli. ⁹ Haya habahwile ulibulula, uboo wa Mlumeubelehegulu ha gigyo mbuga, wa ubadidibula abisa; gubahulile batu ba gigyo mbuga, tulela wa bahela, basuminywe na bihute. ¹⁰ Bibyo, balihilile lindo lya Abetcha ndaa na Ekloni. Haya, lindo lya Abetcha halihiile Ekloni, batu ba Ekloni bagodowe na mdodo, baganine, Balilushi liya lindo lya Abetcha a Isilaeli wetu, yulu ya utuhaga beswe na baana betu. ¹¹ Wa bibyo batumine batu bagye usumbicha ba mashehe bose ba Bafilisti, baganine, Lihunyiwe lilyo lindo lya Abetcha a Isilaeli, ligye iyaka wihana yalyo, yulu lishituhage beswe, ata na batu betu; yulu ubele na alugi eengi abisa mnda mbuga gyose; uboo wa Abetcha ubele unyemu abisa uya. ¹² Na baya bene bawile yulu basuminywe na bihute; na lilo lya giya mbuga lihiile ha gulu.