¹ Bibyo babo Bafilisti basumbiche basolokoto babo bose uya Afeki; nabo Baisilaeli babiile bushamo hoka ma msula guli guli Yezleeli. ² Nabo bashehe ba Bafilisti bahishile hambele, sambi wa sambi na uki wa uki; nage Daudi na batu bage bahitile ba isula hamwechi na Akishi. ³ Haho baulu ba Bafilisti baganine, Bano Baeblania bali hugila iihano? Nage Akishi gubasambile baulu ba Bafilisti, Wi wii! Guno gishi Daudi, guya mgichi gwa Sauli, oolo lya Isilaeli, mine gulihushama na nene mano masugu, ehe, gino myaa, ata nene nishihumona abachi weli, utulila haya helichwile wandi ndaa na lino? ⁴ Alakini baulu ba Bafilisti bachigiliwe yulu yage; nabu baulu ba Bafilisti bamsambile, Umgiwiche gugu, yulu gagiwile u bushamo bwage bolimsambile, na gashigye hamweci netu u bita, gashichweutugalwila uba amangu etu uya u bita; yulu yai guno mtu gushinahuchana na mlumyage wa ndila nai? Wi wii! ushi wa yulu ya miswe gya bano batu? ⁵ Wi wii! Gushi gugo Daudi, mine gwabagimbilene mwano gwage u maina, baganine, Sauli guhagile uki chage, Na Daudi maumi uki mage? ⁶ Haho Akishi gumgitile Daudi, gumsambile, Bili Mlume na mwego, gogwe uli mtu msoga, iyaka utobowa obe na ugingila obe hamwechi nanyi u basolokoto myusoga u meeso manyi; yulu nene nishimmone usona mnda mobe utula luya lusugu lolinjwilie ndaa na lino; alakini haya baulubshi huuswa nobe. ⁷ Bino hano ugiwile, ugye lobe wa talala, alakini ushichigililwe yulu y babo baulu ba Bafilisti. ⁸ Nage Daudi gumsambile Akishi, Alakini nene naita ii? Gogwe wamona ii wandi nene mcha gobe, mengo mose mene mandishamine u mnele obe ndaa na lino, nashigitabichiwe ugya na ulwa na tumangu twa mlumyanyi oolo? ⁹ Akishi gumgaile, gumsambile, Daudi nene nidigi ugana uli msoga u meeso manyi, nahi malaika ma Abetcha; alakini baya batu baulu ba Bafilisti bagana, Gugu gushigya hamwechi netu u bita. ¹⁰ Wa bibyo hano ubyuwe halwelo pee, gogwe na bacha ba mlumyobe bene bchwile hamwechi nobe; benywe hamwibyuwa halwelo pee, na hasili lwenge mwaligile lwenyu. ¹¹ Bibyo Daudi gubyuwile halwelo pee, gee na batu bage, bagile lwabo halwelo, ugigiwilila sii gya Bafilisti. Nabo Bafilisti baselile ugya Yezleeli.