¹ Haho Daudi helidogomine mnda mtima gwage, Lumwe lusugu, bino, nene niiwa mnda uboo wa Sauli; hashi ya isoga wandi nene uhima usina ndaa na u Bafilisti; nage Sauli gwihunya maudagili yulu ya mwao gwanyi, gashikenge iyaka u ng'umba chose cha Isilaeli; bibyo nihogoowa mnda maboo mage. ² Haho Daudi gugimanie, gee na baya batu smbi mtuba bene belibele nabo, Gudabuwile uli Akishi, mwaana gwa Maoki, oolo lya Gathi. ³ Daudi gushamie uya Gathi hamwechi na Akishi, gee na batu bage, mtu ge gese na batu ba mndu mwage; Daudi nage gubele na baachi bage babili, Ahinoamu gwa Yezleeli,a Abigaili gwa Kalmeli, mine gubele mmachi gwa Nabali. ⁴ Nage Sauli gusambilwe ugana Daudi gwasinina ndaa na Gathi; na gushimmengile iyaka. ⁵ Daudi gumsambile Akishi, Bino nambo nahewa anyemu meeso mobe na nahewe ihana mnda gimwe mbuga u mabala, nashame uya; Yulu yai mcha gobe mnda mbuga gyumaolo hamwechi na gogwe? ⁶ Haho Akishi gummele Siklagi luya lusugu; yulu ya iyo ibalo gigyo mbuga gya Siklagi m yihana ya maolo ma Yuda ndaa na lino. ⁷ Na lubalo lwa masugu mose mene mashamine Daudi mnda sii gya Bafilisti gubele mwaa gumwechi na myechi gina. ⁸ Nage Daudi na batu bage babele hugya ubalwa Bageshuli, na Bagelizi, na Baamaleki bene babele bashami ba gigyo sii, utula Telemu, haya hasugya Shuli, ndaa na sii gya Misili. ⁹ Iyaka Daudi gugilwile gigyo sii, gushibashigile na mwego balumyana ata baachana, guwatilekole cha myoo na ng'ombe, na punda, na ngamia na bichwalaganywa; hanyuma gugiwile na ugya wa Akishi. ¹⁰ Nage Akishi gum'budiche, Wi wii! Mwalwa luubi nai lino? Daudi gugaile, Luubi lwa Negebu gya Yuda, au luubi lwa Negebu gya Bayelameeli, ao luubi lwa Negebu gya Bakeni. ¹¹ Iyaka Daudi gushimshigile na mwego mlumyana ao mmachana, yulu ya ubalusha Gathi yulu guganine, Bashilisambe, ugana, Noo byaliitile Daudi, iyaka noo bibele mishaminyi gyage mengo melibele hushama mnda sii gya Bafilisti. ¹² Bibyo Akishi gumgitabiche DAudi, guganine, Gwabaonywa abisa batu bage Isilaeli; wa bibyo gubi mgichi gwanyi ndaa na milumbu.