¹ Bibyo babo Bazifi bamgilile Sauli uya Gibea, baganine, Wi wii! Guya Daudi gushibisamine u loono lwa Hakila, uhugulwila Yeshimoni? ² Haho Sauli gugile gisalile mgala gwa Zifu, nage gubele na batu uki chitatu, basobolwa ba Isilaeli, hamwechi nage, yulu ya ummenga Daudi mnda mgala gwa Zifu. ³ Nage Sauli gugimiya itulayage u loono lwa Hakila, lubele hulolana na Yeshimoni, u ndila; alakini Daudi gubele hushama mgala, gumonine ugana Sauli gulihumlama ndaa na mgala. ⁴ Haho Daudi gutumina badinji, gupashile mwano gwa chigilwe ugana Sauli gwahiya. ⁵ Daudi guginyuwile, guhiile ihana iya yine ibele hushama Sauli; Daudi guilolile ihana iya yine ibele hulala Sauli, ba Abneli, mwaana gwa Neli, ilume pambwa ya basolokoto bage; nage Sauli gubele hulala hawingi ha tubilibili, na baya batu bagimiile bitula byabo umchunguluwa. ⁶ Haho Daudi gugaile, gumsambile Ahimeleki, Mmiti, na Abishai, mwaana gwa Seluya, mshiwabo gwa Yoabu, guganine, M nanyi mine gwiundumua hamwechi nanyi ugya wa u bushamo bwa Suli? Abishai guganine,, Nene niundumua hamwechi nobe. ⁷ Bibyo Daudi na Abishai bagile u batu m busugu; na loola, Sauli gubele mlachu tulo hawingi ha tubilibili, na sumolyage libele ligimiwe m'bitete, hoka na mswe gwage; nage Abneli nabatu bage balalile na bali hugombola. ⁸ Haho Abishai gumsambile Daudi, Abetcha am'biya amangu obe mnda maboo mobe lino; bino, ndeye namte na lilyo sumo uhuluwanya na m'bitete utalwendo lumwechi ka, mishimta lwendo lwa bubili. ⁹ Alakini Daudi gumsambile Abishai, Ushimmage; bululi m nanyi gunaosha ugolola uboo wage hegulu ha mashinyiwa mauta gwa Mlume? nage nuuba gushi na abachi? ¹⁰ Daudi guganine, Bili Mlume na mwego, Mlume noo gwimmaga; ao lusugu lwage lwa uwa lwim'banga; gwisala ugya u bita na uchimina. ¹¹ Pande! Nashiugolole uboo wanyi hegulu ha mshinyiwa mauta gwa Mlume; alakini hano ibumbu ino uguhe sumo lili lyine lili ha mswe gwage, na ii ibila ya maadi, nabeswe tuligile lwetu. ¹² Haho Daudi guliguhile liya sumo, na iya ibila ya maadi, ha mse gwa Sauli; nabo baligilile lwabo, na hashi mtu mine guimonine iya ikoko na ata uimana, na ata ubyuwa; yulu bose babele balachu; bululi tolo twa tunyemu uhuma wa Mlume tubalemene. ¹³ Hanyuma Daudi gugile m'bwala bwa bubili, gugimanine hegulu ha loono, koo abisa; habele ihana iingi abisa hawingi habo; ¹⁴ nage Daudi gubatele mabila baya batu, na Abneli mwaana gwa Neli, gugaile, guganine, Uli nanyi gogwe ulihumlilila oolo? ¹⁵ Nage Daudi gumsambile Abneli, Gogwe ati uli ilume pambwa? Iyaka m nanyi guli naho gogwe mnda Isilaeli? Yulu yai, hano usaosha ummusa mlumyobe oolo? Bululi mto gumwechi gwagingila yulu ya ummaga oolo, mlumyobe? ¹⁶ Ino ikoko yawagila ishi isoga. Bili Mlume na mwego, mulingye uuwa, yulu musammusa mlumyenyu, mshinyiwamauta gwa Mlume. Bino mndi! Loolwe, lili uhi sumo lya oolo, na ibila yage ya maadi yine yaba ha mswe gwage? ¹⁷ Nage Sauli gulimanine liidi lya Daudi, guganine, Lino m liidi lyobe, Daudi, mwananyi? Daudi guganine, Ehe, noo liidi lyanyi, mlumyanyi, oolo. ¹⁸ Guganne, Mlumyanyi gupibile nene mgichi gwage yulu ya ibalo nai? Nene niitile ii? M yusona nai wandi nao mnda uboo wanyi? ¹⁹ Bino hano, nuhuutendelela, mlumyanyi, na gahuliche binywa bya mgichi gwage. Nambo m Mlume gusongamanya yulu yanyi, na gagitabiche lutangi; na nambo m batu, na baalogwe u mbele wa Mlume; wa ibalo banyinga lino, nashihambane na buhyana bwa Mlume, baganine, Ugye utugililatunge tubecha. ²⁰ Bino hano, mashisuwe maashi manyi hasi u mbele wa yenyi ya Mlume; bululi oolo lya Isilaeli gwachwa yulu ya uenga mwego gwanyi, nahi biya bisuhibwa kwali na mtu u loono. ²¹ Bibyo Sauli guganine, Naluuba, giwila Daudi, mwaananyi, yulu nishyususula iyaka, bululi mwego gwanyi gwaba gunyemu lino u meeso obe; lingamina, nagila bya buhugi, naluuba abisa. ²² Daudi gugaile, guganine, Lilole lino sumo, Ee oolo! Gomwe mmwalubaga gadabuwe uno, uchwa uliguha. ²³ Nage Mlume gwimma mtu ge gese ulamana na kiine gyage, na uwilila wage; yulu Mlume gwaba mmubiya mnda maboo mnyi lino, nene nahanya ugolola uboo wanyi hegulu ha mshinyiwa mauta gwa Mlume. ²⁴ Iyaka lingamina, nahi biya bili mwego gobe gunyemu u meeso manyi, byoka biya mwego gwanyi na gube gunyemu u meeso na Mlume, gwipogonona na tuhunago tose. ²⁵ Haho Sauli gumsambile Daudi, mwaananyi; wiita bikoko byata, iyaka chigilwe byobe wihima. Bibyo Daudi gugile lwage, na Sauli nage gugile wabo.