¹ Heliwile Samwele, nayo Isilaeli yose basumbile, babiile malilo, bamchiile u ndu gyage uya Lama. Hanyuma Daudi gugile, guundumuwe ndaa na mgalagwa Maoni. ² Na uya Maoni unele na gumwe mtu, gubelena bitundu byage uya Kalmeli; nage guya mtu gubele mmosobu abisa,gwina myoo uki chitatu, na mabuchi uki, nage gubele hugeda myoo gyage maso uya Kalmeli. ³ Na china lya gugo mtu gugitilwe Nabali; na china lya mmachage gugitilwe Abigaeli. Na gugo mmachana gubele na lwenyi lusoga, hungwe gwa yenyi; alakini guya mlumyana gushibele na sumiya, iyaka bigilanywa byage bihugi; nage gubele gwa ilongo ya Kalebu. ⁴ Bibyo Daudi guhuliche mwano m'ya mgala ugana Nabali gubele hugeda myoo gyage maso. ⁵ Daudi gutumine bawalugaba umi, Daudi nage gubasambile baya bawalubaga, Seelwe, giwe Kalmeli, mugye uli gugo Nabali yulu mutaninye ge. ⁶ na bino noo byamwimsambile gugo mine gusushama kolongecho, Talala, nagibe oli, na talala uli bose bene boli nabo. ⁷ Nene bino nahulichaugana gogwe uli na batu bene balihugeda miyoo gyobe maso; bino! baushi bobe basili hoka nanyi, na tusabasusula, na bashihulilwe ibya yo yose mengo mababele uno Kalmeli. ⁸ Ubabuche bawalubaga bobe, nabo biusambile; bino bagitabichiwe bano bawalubaga u meeso mobe; yulu nuuchwila lusugu lwa luhanga lusoga; ubahe, nuutendelela, yo yose yine yoli nayo m muboo, ubahe bacha bobe na mwanobe Daudi. ⁹ Bibyo habahiile baya bawalubaga bage Daudi, bamsambile Nabali ulamana na binywa bibyo byose wa china lya Daudi, hanyuma bashamine pii. ¹⁰ Nage Nabali gubagaile baya bagichi ba Daudi, guganine, Gugo Daudi m nanyi? Na mwaana gwa Yese m nanyi? mano masugu hali bacha balihutolowa balume babo! ¹¹ Bino nene wi! Naguhe mkati gwabyi na maadi manyi, na byanyi byandashinja byandashinjicha babo batu banyi bene balihugeda miyoo gyanyi maso, na nabahe batu bene bandishigidi bahuma uhi? ¹² haho bawalubaga bage Daudi gagiwile na ugya lwabo; bagiwile nabo bahiile bamsambile ulamana na binywa bibyo byose. ¹³ Hanyuma Daudi gubasambile batu bage, Bino! lihambwe mtu ge gese na ahilu age. Nabo balihambile mtu ge gese ahilu age; Daudi nage gulihambile ahilu age; nabo bagile mnyuma mwage Daudi, nahi batu sambi china; na batu sambi chibili bashamine na bitundu byabo. ¹⁴ Alakini gumwe mmwalubaga gummele Abigaili mwano, mmachi gwa Nabali, ugana, Loola, Daudi guhilile batu uhuma m'ya mgala bachwe yulu ya umtanya mlumyetu, nage gubatuwile. ¹⁵ Alakini babo batu batuitile misa abisa, na tushibagwalwe mgwalo, na ata beswe tushichiminyiwe na yo yose, mengo mo mose hatubele nabo, hatubele u malisho. ¹⁶ babo batu babele nyimbo gyetu busugu na mchuba, mengo mose matubele huusa myoo. ¹⁷ Bino hano umane na uengelwche byoligila; wa yulu bilihulangilwa bigugichu yulu ya mlumyetu, na yulu ya ndu gyage gyose; yulu gee m mtu gushilingye abisa, ata na mtu gushingye udogoma nage. ¹⁸ haho Abigaili guitile abilo, guguhila mikati sambi chibili, na bibila bibili bya ibugu, na myoo gitano gyagihiwe lumima, na bitanga bitano bya isaa ya iange, na buluba sambi chibili bya nolo, na mikati mtama sambi chibili; gubihambile bibyo bitundu hegulu ha punda. ¹⁹ Gubasambile bawalubaga bage, Hano! Mubangwe hambele hanyi; lingaminywe, nene nilihumlama. Alakini gushimsambile mlumyage, Nabali. ²⁰ Bibele, helibele huchina punda gyage, na uundumuwa ha mmundumuo gwa loono, loola, Daudina batu bage babele huundumuwa na umshenena; nage gubabangile. ²¹ Bibyo Daudi gusibele gwahugana, Chigilwe m bunene byandibele huusa mgala byose byali nabyo gugu mtu, gashichiminyiwe na ibya yo yose ya bitundu byage byose; nage gwangiwidicha bisone hanyuma ha misa. ²² Abetcha nao abaitile bibyo tumangu twa Daudi, na ugililila, nambo nimshigila bo bose bene beli nabo utula mwaana gwa mlumyana hene habwiya busugu. ²³ Bibyo haho Abigaili helimmonine Daudi, guitile abilo usala hegulu ha punda gyage, gumgwilile Daudi m machwi, guginamine, ndaa na hasi. ²⁴ Gumgwilie u magulu mage, guganine, Yulu yanyi, mlumyanyi, hegulu hanyi nene na ube usona; ibumbu ino, mgichi gobe na galisambe u matu mobe, na gogweuhuliche binywa bya mgichi gobe. ²⁵ Nuhuutendelela, mlumyanyi, gogwe ushimlochi gugu mtu mine gushinhye, noo, Nabali, bululi nahi bili china lyage noo byeli gee, china lyage m Nabali, noo buhugi bweli nabo; alakini nene, mgichi gobe, nishibamonine babo bawalubaga ba mlumyanyi beme belitumine. ²⁶ Bino hano, mlumyanyi, bilihuhama Mlume, na ichuli-chuli yobe ya mwego ihame nayo, yulu Mlume guuchibila ushigeshi maashi, iyaka ushiligiwidiche buubi wa buubi na uboo obe gogwe mine, bino hano tumangu tobe, na baya bene balihumsimbila mlumyanyi bisone, babe naho Nabali. ²⁷ Na bino, mmaso guno, mgichi gobe gwagalushisha mlumyanyi, na bahewe bawalubaga bene balihulamana na mlumyanyi. ²⁸ Nuhuusaba uuleelele uluba wage mgichi gobe, bululi chigilwe Mlume gwimmitila mlumyanyi ndu gya gigimanyu, wa ibalo mlumyanyi guli hulwa bita bya Mlume; iyaka buubi bushimoneya mnda mobe masugu mobe mose. ²⁹ Na inangwa mtu gunaginyuwa guuhibe, na uienga ichuli-chuliyobe ya mwego, iyo ichuli-chuli ya mwego ya mlumyanyi yihambwa mnda binga lya mwego hamwechi na Mlume, Abetcha obe; na bichuli-chuli bya mwego bya tumangu tobe noo byalitela hambuga, nahi uhuma mnda mjeledi. ³⁰ Iyaka bibi, haya hene Mlume helibi gwahumgilila mlumyanyi ulamana na misa gyose gyelidogomine yulu yobe, na uuta busu hegulu ha Isilaeli. ³¹ ino ishibi yuhyatacha, na ata ya uchigilicha ya umtima gwa mlumyanyi, na ata yugana ugesile maashi bunene, na ata yugana mlumyanyi gwaligiwidicha buubi wa buubi gee mine; iyaka haya Mlume helimmitila mlumyanyi misa, haho wammengeleche mgichi gobe. ³² Nage Dudi gumsambile Abigaili, Na gatonyweMlume, Abetcha a Isilaeli, mine gulusha bino lino ungaa; ³³ nabuhalilwe mihaa bweenge bobe, nagogweuhalilwe mihaa, wanjibila hano lino nashigeshi maashi, na nangu uligiwidicha buubi wa buubi na oboo wanyi nene mine. ³⁴ Bululi m chigilwe, bilihuhama Mlume, Abetcha a Isilaeli, mine gwanjibila nashiususule, nambo usaba ita abilo uchwa ungaa, chigilwe gugo Nabaligusabashigilwa ata mwaana gumwechi gwa mlumyana, habwabaya halwelo. ³⁵ Bibyo Daudi gugaile na uboo wage bitundu biya byelimlushishe; Gumsambile, Bino! Ubegiwila na talala ugya u ndu gyobe; loola, nalihulicha liidi lyobe, nene naigitabicha yenyi yobe. ³⁶ Hanyuma Abigaili guhiile uli Nabali; na loola, gubele msumbiche biliwa bya lusugu lwa saso u nda gyage, nahi uya biliwa bya saso lya oolo; na mtimagwage gugo Nabali guseelele mnda mwage, yulu guolilwe abisa, wa yulu ya bibyo gushimsambile inywa, icho ao yata, ndaa na byabuyele. ³⁷ Hasibele halwelo, ibugu haimwile bolwa Nabali, mmachage, gumsambile biya bikoko, namtima gwage guwile mnda mwage, gubele nahi liwe. ³⁸ Iyaka bibele nahihanyuma ha masugu umi Mlume gummulile gugo Nabali, ndaa na nuuwa. ³⁹ Nage Daudi helihuliche ugana Nabali guwile, Daudi guganine, Mlume gatonywe, mine gwandogomena, lugambo lwa uambilwa wanyi m muboo wa Nabali, na uchibila mcha gwage gashigichi bisone; iyaka usona wage Nabali Mlume gwamgiwidicha hegulu ha mswe gwage gee mine. Hanyuma Daudi gutumine batu, gumgondile Abigaili yulu gabe mmachage. ⁴⁰ Ana babo bagichi ba Daudi habamchilile gugo Abigaili uya Kalmeli, bamsambile, baganine, Daui gwatutuma obe yulu tuuguhe ube mmachage. ⁴¹ Nage guginyuwile na uginama yenyi ndaa na hasi, guganinie, Loolwe, mgichi gobe m mcha gwa ugoga magulu ma bagichi ba mlumyanyi. ⁴² Abigaili guitile abilo, guginyuwile, guchinine punda na bagichi bage batano ba baachana babele hushama nage, gubalamine baya bahililwe na Daudi, gee nuuba mmachage. ⁴³ Iyaka Daudi gumgondile Ahinoamu gw Yezleeli; boo nuuba bose babili baachi bage. ⁴⁴ Alakini Sauli gubele gwahumma Palti, mwaana gwa Laishi, mine gubele mtu gwa Galimu, Mikali msiha gwage, mine gubebe mmachi gwa Daudi.