¹ Haho Daudi guhumine uya, gusinine u mmao gwa Adulamu; na bashiwabo na bato bose ba ilongo ya sage habahuliche gugo mwano, bagile uya welibele. ² Na mtu ge gese mine gubele mnda mshaminyi gwa manyongotela, na mtu ge gese mine gubele mgambe byangwa, na batu bose bene babele banyogu mnda mitima gyabo, basumbile weli; nage nuuba mmata gwa babo basolokoto, nabo bene babele hamwechi nage babele nahi batu sambi china. ³ Uhuma uya Daudi gugile Mispa gya Moabu; gumsambile oolo lya Moabu, Ibimbu ino, ugitabuwe tata namago bahume uya wabali, baashame wetu, ndaa nabyandimana Abetcha byeliita yulu yanyi. ⁴ Gubalushishe u mbele wa oolo lya Moabu, nabo bashamine hamwechi nage mengo mose Daudi melibele uya u mmao. ⁵ Hanyuma mbuwa Gadi gumsambile Daudi, Ushishame hano ha gono mmao; chuwa, ugye sii gya Yuda. Haho Daudi guchuwile, gugile lwage, gushamine mnda isowa ya Helethi. ⁶ Hanyuma Sauli guhuliche ugana Daudi gwamoneya, na baya batu bebele hamwechi nage. Bibyo Sauli gubele hushama Gibea, mshina butobe ha ihana ha iginyubu, nage gubele na sumo lyage mmuboo, na bagivhi bage bose bamchungulubu. ⁷ Nage Sauli gubasambile bagichi bage bene babele bamchunguluwe, Hulichiwe bino, benywe Babenyamini; wi wii! Gugu mwaana gwa Yese gwimma ge gese mabala, mabala ma mizabibu, gwimmita mube baata ba basolokoto uki, na baata ba batu sambi; ⁸ na benywe bose mwina konyu yulu yanyi, hashi mtu gwa gumbululila guno mwano mwananyi helihuita malagano na mwaana gwa Yese, na hashi mtu ata gumwechi gwenyu gulihundilila, na uusambila ugana mwananyi gwamgisha mgichi gwanyi galwe nanyi, gang'ongele nahi bino lino. ⁹ Haho Doegi Mmedomi gugaile, gubele mgimanyu hoka na bagichi ba Sauli, guganine, Nene nimmonine mwaanagwa Yese gulihugya Nobu, wa Ahimeleki, mwaana gwa Ahitubu. ¹⁰ Nage gulihusaba yulu yage, gummele biliwa, gummele na aya ahilu a Goliati, Mfilisti. ¹¹ Haho oolo tugumine btu ugya umgita Ahimeleki, ibuli, mwaana gwa Ahitubu, na ilongo yose ya sage, babo babibuli, bene babele uya Nobu; nabo bagile wa oolo bose hamwechi. ¹² Sauli guganine, Hulicha bino, gogwe mwana gwa Ahitubu, Nage gugitabuwile, Nene guno, mlumyanyi. ¹³ Sauli gum'budiche, Yulu yai mwakonywa nene, gogwe na mwaanagwa Yese? Bululi ummele mikati, na ahilu, gogwe um'budiche Abetcha yulu yage, yulu ganjwilile na ung'ongela nahi bino lino? ¹⁴ Bibyo Ahimeleki gumgaile oolo, guganine, Hawingi ha bagichi bobe bose m nanyi guli m'bwilile nahi Daudi, gulu mmwo gwa oolo, iyaka gwuubisa gobe, na gwina anyemu mnda ndu gyobe? ¹⁵ Wi wii! Nene natula lino ka um'bucha Abetcha wa yulu yage? Pande! Oolo gashinangile nene, mgichi gwage ino inywa, Na ata ilongo yose ya bamatata, bululi nenem mgichi gobe nishigidi bibyo byose, byine buhungwilwe na byine bilibiwe. ¹⁶ Nage oologuganine, Uwa wiiwa, Ahimeleki, gogwe na ilongo yose ya bamasobe. ¹⁷ Nage oolo gubasambila basolokoto balochi bene bagimanine hoka nage, Galuwe, mubahage ba bibuli byose bya Mlume, yulu uboo wabo uli hamwechi na Daudi, na wayulu bamanine ugana gwasina, bashisambile, alakini bagichi ba oolo bahaninye ugolola uboo na ubahaga ba bibuli bya Mlume. ¹⁸ Haho oolo gumsambie Doegi, Galuwa, gogwe ugye bahage babo babibuli. Bibyo Doegi, Mmedomi, gugaluwe, gubagwilile ba bibuli na ubahaga luya lusugu batu maumi inana na batabo bene bali bachwale ichibabo ya ahwaba u yaali (efoto) ya sufi. ¹⁹ Hanyuma gulwile Nobu, mbugagya bibuli, wabwigi bwa ahilu, balumyana na baachana ba baana bali hukoka, na ng'ombe napunda na miyoo. ²⁰ Nahawingi ha baana ba Ahimeleki, mwaana gwa Ahitubu, guhogonowemtu gumwechi ka, gubele hugiswa china lyage Abiathali, gumsinine uliDaudi. ²¹ Nage Abiathali gumsambile Daudi mwano ugana Sauli gwabahaga ba bibuli bya Mlume. ²² Daudi gumsambile Abiathali, Lusugu luya lwelibele Doegi, Mmedomi, nimanine chigilwe ugana gwimsambila Sauli; nene nibaha bato bose ba ilongo ya bamasobe luubu. ²³ Gogwe shama hamwechi nanyi, ushimonyi booba; yulu guya mine guli huenga luhuda lwanyi, noo gulihuenga naluhuda lobe; gogwe wishama wandi kolongecho.