¹ Lumwe lusugu, ugana Yonathani, mwaana gwa Sauli, gumsambile guya mmwalubaga mine gubele humswalila tulume gela twage, Bino, tubadabwile Bafilisti uya u koono chabo cha chilahu, m'bwala bwa bubili. Alakini gushisambile sage. ² Nage Sauli gubele mshame luubi lwa isula ya Gibea, hasi ha butobe bwine bubele ulagala; na bao batu bene babele hamwechi nage babele nahi sambi mtuba. ³ na Ahiya, mwaanagwa Ahitubu mshiwabo na Ikabodi, mwaana gwa Finehasi, mwaana gwa Eli, ibuli ya Mlume uya Shilo, gubele mchwale kanjo lya ahwaba u yaali. Iyaka babo batu bashimanine ugana Yonathani gugile. ⁴ Na hawingi ha giya migenge, gyine giundile Yonathani uhitila yulu ya uhyila chiya koono cha chilahu cha Bafilisti, habele huo ha mmundumuo lulu luubi; china lya limwe ligisilwe Bosesi, na china lya bubili Sene. ⁵ Lilyo huo limwechi ligimanine luubi lwa uboo uachi, u mbele wa Makmashi, naliya lya bubili luubi lwa uboo uachi, u mbele wa Geba. ⁶ Bibyo, Yonathanigumsambile guya mmwalubaga gumswalila tulume gela twage, Bino! Tugye ubadabwila u mahuo ma malahu baya bashibabagibe kumbi; nigidi ugana Mlume gwitugilila mgilo; yulu hashiyumchibila Mlume gashihogonone, ugana m wa bwingi ao ugana mwa bucho. ⁷ Nage guya mswachi gwa tulume gela gumgaile, Ita byose byine bili mnda mtima gobe; lingamina, nene bino nili hamwechi nobe, mtima gwanyi guli nahi mtima gobe. ⁸ Haho Yonathni guganine, Loola, beswe twibadabwila nabo batu, na ulimonya wabali. ⁹ Nabo babetusambila ugana, Hembwe, na beswe tuli huchwa wamli; bibyo beswe twigimana hoka haya ha ihana yetu, tushigya wabali. ¹⁰ Alakini nambo babegana bino, Mndi! Benywe chuwe watuli beswe; haho noo hatwigya; yulu Mlume gwababya mnda maboo metu; na ino noo ibi isaga yetu. ¹¹ Bibyo, babo bose babili balimoninye u mbele wa lilyohuo lyalilahu lya Bafilisti, na baya Bafilisti baganine, Mndi! Baya Baeblania uhuma mnda bina byabalibisile. ¹² Nabo batu ba u mahuo ma malahu bamsambile Yonathani na guya mswachi gwa tulume gele twage, Bino, Benywe chuwe uno watuli, nabeswe twimmonya ikoko. Yonathani gumsambile guya gumswalila tulume gela, Bino! ndame hanyuma hanyi; bululi Mlume gwababiya mnda maboo ma Isilaeli. ¹³ haho Yonathani guselile na maboo na magulu mage, na mswachi gwa tulume gela hanyuma hage, na baya batu bagwile u mbele wa Yonathani; na guya mswachi gw tulume gela gubahaile u nyuma wage. ¹⁴ Na bubo buhaganyi bwa butangi wabaitile Yonathani na guya mswachi gwa tulume gela twage, Ubele nahi batu maumi mabili, nahi ihana ya lagala yine inalimwa m'bichi gwa lusugu lugima. ¹⁵ Hachwile ludando u buya bushamo, na u mabala, na hawingi ha batu bose; batu ba u mahuo ma malahu, na u bawashi ba kole, badandile nabo; ata na sii gidandile nagyo; bibyo habele ludando lwata abisa. ¹⁶ Nabo baya balochi ba Sauli uyaGibea gya Benyamini balingamine, na loola, sumbiloliya libele husaliya, na batu babele hugya uya na uya. ¹⁷ Haho Sauli gusambile batu bene babele hamwechi nage, Bino! Libalwe hano, mumone nambo m nanyi gwahulwa hawingihetu. Nabo habahwile ubala, loola, Yonathani na guya mswachi gwage gwa tulume gela twage noo bashiho. ¹⁸ Haho Sauli gumsambile Ahiya, Lilushe hano lindo lya Abetcha. Bululi lilyo lindo lya Abetcha mamo mengo libele hamwechi na baana ba Isilaeli. ¹⁹ Bibele Sauli gwili hudogomana ibuli, gugo mdodo mnda bushamo bwa Bafilisti gugililile na ugililila abisa; bibyo Sauli gusambile ibuli, Giwicha uboo obe. ²⁰ Nage Sauli na batu bose bene babele hamwechi nage basumbile, bagileu bita; na loola, uya ahili a mtu ge gese abile hegulu ha gunge nage, ubele alugi bee abisa. ²¹ Bibyo baya Baeblania bene babele hamwechi na Bafilisti utula aala, baya benebagile hamwechi nabo ndaa na ubushamo utula sii gya gichunguluwe; babo batu bagaluwile uba luubi lwa Baisilaeli bene babele hamwechi na Sauli na Yonathani. ²² Byoka biya batu ba Isilaeli bene babele babisamu mnda sii gya tubandagulu twa Eflaimu, habahuliche ugana Bafilisti basina, ata babo nabo babalamine abila na bita. ²³ Bibyo Mlume gubahogonone Isilaeli lulo lusugu, na bita bihitileu mbele wa hoka na Beth-aveni. Mamo mengo u mbele wa baana ba Isilaeli. ²⁴ Na batu ba Isilaeli badegile abisa lulo lusugu; alakini Sauli gubele hubalahya pa batu ugana, Na gaalogwe mtu ge gese mine gwila iliwa ya igolo, naoshe uligiwidicha buubi wa buubi yulu ya tumangu twanyi, Bibyo hashi mtu mmanga gwa batu mine gutondile iliwa. ²⁵ Nabo batu bose bagingile m'bisowa; na mmo mubele na bui belele hegulu ha bitete. ²⁶ Nahaya batu habahwili ugingila mmisowa, loola, bubo bui bubele hunowa; alakini hashibele mtu ata gumwechi mine gubiile uboo wage wanywa; bululi babo batu babele husina uya ulahiwa pa. ²⁷ Alakini Yonathani gushihuliche, haya sage helibele hulaga batu yulu ya uya ulaha pa; haho gee gugolole sungo gya lubango lwine lubele mmuboo wage, na uchunda wigala ya bui, hanyuma gubiile uboo wage waanywa; na meeso mage noo ubiwa lwenge. ²⁸ haho gumwe gwa baya batu gumgaile, guganine, Sobe gulagile batu abisa wa uhala pa, guganine, Na gaalogwe mtu guya mine gwiya iliwa lino. Na babo batu babele bahungwilwe na uoma. ²⁹ Haho Yonathani guganine, Tata gwadidibula sii, ibumbu ino, lingamina, bili meeso manyi byamabiwa lwenge, wa yulu natonda buno bui bucho. ³⁰ Wi wii! Bishi bisoga abisa, nambo batu babaya na ugyuta lino u chino kole cha tumangu twabo chabawata? Bululi busaba buhaganyi bwa bwata bino hawingi ha Bafilisti. ³¹ Nabo balwile na batu hawingi ha Bafilisti luya lusugu uhuma Makmashi ndaa na Ayaloni; na babo batu babele bahungwilwe abisa na uoma. ³² Bibyo batu baulwile chiya kole, baguhile miyoo, na ng'ombe, na baana ba ng'ombe, na uchishinja hoka haya hegulu ha bitete, nabo baya batu babele huchiya hamwechi na maashi. ³³ Haho bamsambile Sauli, baganine, Lingamina, babo batu baluba uli Mlume, wa biya byabaya hamwechi na maashi. Nage Sauli guganine, Benywe mwaita na anene; bingilishiwe wandi liwe lya lyata. ³⁴ Hanyuma Sauli guganine, Bino! Musaliye hawingi ha batu mubasambile, Mundushishe hano mtu ge gese ng'ombe gyage, na mtu ge gese mmoo gwage, muchishinje hano na uchiya; na mushilube uli Mlume, wa uya nyama hamwechi na maashi. Nabo batu balushishe mtu ge gese ng'ombe gyage hamwechi nage buya busugu, nabo bashinjiche haya. ³⁵ Nage Sauli gumgimyile Mlume butambikilo; bubo noo butambikilo bwa butangi bweligimiile yulu ya Mlume. ³⁶ Hanyuma Sauli guganine, Bino! Na tugye nabalama Bafilisti mano mengo ma busugu, na ubawata kole ndaa na byabwiya, na tushibashige ata gumwechi gwabo. Nabo bagaile, Ita byo byose byine byolihumona uba bisoga. Bibyo guya ibuli guganine, Tutange ugya uli Abetcha. ³⁷ Haho Sauli gusabile lango wa Abetcha, Wi wii! Nagye nabalaminina Bafilisti? Wi wii! Wibabiya mnda maboo ma Isilaeli? Alakini Mlume gushibagaile inywa yo yose lulo lusugu. ³⁸ Bibyo Sauli guganine, Shenywe hano, benywe miungu gyose gya batu; mmane na umona buubi buno bwa lino bwachwa yulu yai. ³⁹ Yulu, bili Mlume na mwego, mine gusuhogonona Isilaeli, inangwa buli yulu ya Yonathani, mwananyi, uwa gwiwa. Alakini hawingi ha batu bose hashi mine gumgaile. ⁴⁰ Haho gubasambile Baisilaeli bose, Benywe mubi luubi lumwechi, na nene na mwananyi Yonathani tubi lunge luubi lwa bubili. Bibyo bamsambile Sauli, Iita byawamona uba bisoga. ⁴¹ Wa bibyo Sauli gumsambile Mlume, Abetcha a Isilaeli, [Yulu yai ushihumgaa mgichi gobe lino? uba buubi buli mnda mwanyi, ao mnda mwage Yonathani mwananyi, Ee Mlume, Abetcha a Isilaeli, lusha Ulimu; (ehe) haho wagane bino, Buubi buli u btu bobe Isilaeli,] ulushe Thumimu (nangu). Bibyo Yonathani na Sauli baguhilwe, alakini batu bahonine. ⁴² Haho Sauli guganine, Bino hita hawingi hanyi na mwananyi Yonathani, [nage ge gese mine gweliguha, gwiiwa. Nabo batu bamsambile Sauli, Pande! Bishi bibyo; alakini Sauli gubaoshiche batu, Nabo bahitile hawingi hage na mwanage Yonathani,] nage Yonathani noo uguhwa. ⁴³ Haho Sauli gumsambile Yonathani, Sambile yoliitile. Haho Yonathani gumsambile, guganine, M winene, nene nitondile bui bucho u songo gya lubango luya lwine lubele mmuboo wanyi; na loola, nilingye uwa. ⁴⁴ Nage Sauli guganine, Abetcha angitile bino, na uhima; wa chigilwe wihagwa, Yonathani. ⁴⁵ Alakini batu bamsambile Sauli, Wi wii! Gwiwa Yonathani, mine gwiitile uya usona wata hawingi ha Isileli? Pande! Mlume byeli na mwego, lushigwa hasi ata luchulu lwage lumwechi; bululi gwagila mgilo hamwechi na Abetcha lino. Bibyo babo batu bammogonone Yonathani, gashiwe. ⁴⁶ Bibyo Sauli guleile ubalama Bafilisti; nabo Bafilisti bagile lwabo wabo. ⁴⁷ Haho Sauli helihwile uguha buoolo hegulu ha Isilaeli, gulwile na tumangu twage tose ngubi chose, yulu ya Moabu, na hegulu ha baana ba Amoni, na hegulu ha Edomu, na hegulu ha maoolo ma Soba, na hegulu ha Bafilisti; na ho hose hene heligaluwile, gubahimine. ⁴⁸ Nage gugilile wa bwilume pambwa, gulwile na Baameleki, na ubahogonona, Baisilaeli mnda maboo mabo babawatile kole. ⁴⁹ Bibyo, baana ba Sauli babele noo bano, Yonathani, na Ishvi, na Malkishua; na machina ma misiha gyage gibili mabele mano; china lyagegwa mtangi gugitilwe Melabu, na china lya gwa mnuna batu gugitilwe Mikali; ⁵⁰ na china lya mmachi gwa Sauli gugitilwe Ahinoamu, msiha gwa Ahimaasi, Iyaka, china lya ilume pambwa yage gugitilwe Abneli, mwaana gwa Neli, gubele sage mnuna gwa Sauli. ⁵¹ Na Kishi, sage na Sauli, na Neli, sage na Abneli, babele baana ba Abieli. ⁵² Iyaka, habele na bita bya byata abisa yulu ya Bafilisti masugu mose ma Sauli, nage Sauli helimmonine mtu ge gese gubele na uoma wingi, ao mtu ge gese mine gubele ilume pambwa, gubaguhile uba hamwechi nage.