¹ Sauli gubele na myaa nahi maumi matatu helitulile uhyilila; na guhyilile Isilaeli myaa maumi mana. ² Nage Sauli gulisobolele batu uki chitatu cha Isilaeli; bibyo hawingi ha babo uki chibili babele hamwechi na Sauli uya Mikmashi, na u loono lwa Betheli ubele uki limwechi hamwechi na Yonathani uya Gibea gya Benyamini; nabo baya batu bene bashigele gubasambile bagye mtu ge gese u hema lyage. ³ Yonathani gulwile bita iya itunga ya Bafilisti, yine ibele haya Gibea, nabo Bafilisti bahuliche mwano, Nage Sauli gugilileasiba mnda sii gyose, gubele hugana, Baeblania bahuliche. ⁴ Baisilaeli bose bahuliche mwano gwaugana Sauli gwalwa bita biya bitunga bya Bafilisti, na ugana Baisilaeli basili bachunguluwe Bafilisti. Bibyo babo batu basumbile hamwechi umlama Sauli uya Gilgali. ⁵ Nabo Bafilisti balisumbiche yulu balwe bita na Baisilaeli, tubilibili uki maumi matatu, na bachinyi bafalasi uki mtuba, nabatu bengi nahi isii ya wibega ya bahali; baselile hegulu, babiile bushamo bwabo uya Makmashi, luubi lwa mlugulu mwa Beth-aveni. ⁶ Haho Baisilaeli habamonine ugana bali mnda ahunago, (yulu batu badidibuwile), bibyo babo batu batulile ubisama mnda myaao, na mnda tuhumbo, na mnda mahuo, na mnda bina, na mnda bishima bya maadi. ⁷ Na bamwe Baeblania badabuwile Yolodani, bagingile nda sii gya Dani na Gileadi; alakini Sauli gwilibele uya Gigali, nabo batu bose bamlamine bali hudanda. ⁸ Guhembile masugu njwii, wa mengo mene mabiilwe na Samwele alakini Samwele gushichwile Gilgali; na babo batu basaliye koo nage. ⁹ Sauli guganine, ndushiwe hano lutangi lwa uchigya na lutangi lwa talala. Gutangile lutangi lwa uchigya. ¹⁰ Haho helihwile utangila lutangi lwa uchigya, mndi! Samwele guhiile. Sauli guhumine na ugya umgaa na umtanya. ¹¹ Samwele guganine, Waita ii Sauli? Nage Sauli guganine, Wa ibalo namona batu basaliya pilipili mwa koo nanyi, na gogwe ushichwile maya masugu mene maganinywe; nabo Bifilisti balisumbiche hamwechi uya Makmashi; ¹² haho nimonine ugana Bafilisti bisalile hanohoka ndaa na Gilgali, hambele nishinasaba yano ya Mlume; wa bibyo, nimonine godogodo, natangile lutangi lwa uchigya. ¹³ Nage Samwele gumsambile Sauli, Waita bya buhugi; usausa alago a Mlume, Abetcha obe, eliusambile; bululi Mlume gwababuita uoolo bobe uba bugimanyu hegulu ha Isilaeli milumbu. ¹⁴ Alakini bino buoolo bobe bushisinga; Mlume gwliengela mtu mine guli huseelecha mtima gwage; nage Mlume gwam'biya gee uba mmata hegulu ha batu bage, wa ibalo gogwe usaiusa iya inywa ya Mlume yeliusambile. ¹⁵ Bibyo Samwele guchuwile, gugile uhuma Gilgali ndaa na Gibea gya Benyamini. Nage Sauli gubabalile batu hamwechi nage, nahi batu sambi mtuba. ¹⁶ Nage Sauli hamwechi namwanage Yonathani, na batu bene babele hamwechi nabo, bashamine uya Geba gya Benyamini; alakini Bafilisti bashamine haya Makmashi, ¹⁷ Nabo bwashi ba kole bahumine u bushamo bwa Bafilisti, mihamba gitatu; mmamba gumwechi gugalwile ndila gisugya Ofla, ndaa na sii gya Shuali; ¹⁸ na gunge mmamba gugalwile ndila gisugya Beth-holoni; na gunge mmamba gugalwile ndila gisugya ibetabeta ya Seboimu luube lwa mgala. ¹⁹ Bibyo hashimoneye mtumbi ge gese mnda sii gya Isilaeli;yulu Bafilisti baganine, Baeblania bashichwe ulisulila tuhilu na masumo; ²⁰ Alakini Baisilaeli bose basalile u Bafilisti, yulu mtu ge gese ganonye lwasu lwage, na idabu yage, na ahilu age na temo lyage, na pigi gyage; ²¹ alakini babele na kololelo gya unonenya pigi, na idabo, na kuwo, na matemo; na wa unonya tweele. ²² Bibyo bahele lusugu lwa bita, bishimoneye mmaboo ma batu bene babele hamwechi na Sauli na Yonathani ahilu, ata sumo; nambo Sauli ka na mwanage noo babele nabyo. ²³ Na basolokoto ba Bafilisti bahumine na uhitila ha mmenge gwa Makmashi.