¹ Mamo mengo Samwele gumsambile Sauli, Mlume gupilile nuushinye mauta, ube oolo lya batu bage Isilaeli; bino hano, hulicha liidi na binywa bya Mlume. ² Mlume wa bilume pambwa gwagana bino, Nibibiile mnda mtima gwanyi bihisho biya byine bigilile Amaleki yulu ya Isilaeli, byababahaninye uhita mndila, haya habachwile uhuma Misili. ³ Bino hano ugye ulwa na Baameleki, na ubigugicha abisa bitundu byose byine byabali nabyo, na mushibaleye; bibyo mubahage, balumyana na baachana, baana bukoka, ng'ombe na miyoo, na ngamia, na punda. ⁴ Haho Sauli gugitile batu, gubabalile uya Telemu, basolokoto benebabele huchina falasi uki sambi chibili, na batu ba Yuda uki umi. ⁵ Sauli gugihyile mbuga gya Ameleki, gugigongele wibetabeta yagyo. ⁶ Sauli gubasambile Bakeni, Bino! Ligilwe lwenyu, Giwe na mwalibagule na Baameleki, nashichwe umchimya benywe hamwechi nabo; yulu mubaitile baana na Isilaeli bya bisoga, habachile uhuma Misili. Bibyo babo Bakeni bagile, balibagule na Baameleki. ⁷ Sauli gubalwile Baameleki, utula Havila gilihugya Shuli, gilihulolana na Misili. ⁸ Haho gum'bwatile Agagi, oolo lya Baameleki, guli na mwego, gubahagile baya batu bose na ahilu. ⁹ Alakini Sauli nabatu bage bamshigile Agagi na mwego, na u miyoo gyagisoga, na ng'ombe, na binonyu, na baana ba miyoo, na yo yose yine ili isoga, na bashiundile ubichimya; bibyo yo yose yine ibele idogu na yina bugongole noo yabachiminye abisa. ¹⁰ Haho inywa ya Mlume imchwilile Samwele, ugana, ¹¹ Nanogeya mtima bululi nimshininye Sauli mauta gabe oolo; bululi gwagiwila u nyuma, gashindame nene, na gusaita byandimsambile. Samwele gumyowile, gumlilile Mlume busugu bose. ¹² Samwele guchuwile halwelo pee yulu gamonane ya Sauli; Samwele gusambilwe ugana Sauli gwahiya Kalmeli, na loola, gwaligimyila kengelecho, gugalwile, gwahita, gwasalila Gilgali. ¹³ Samwele gugile uli Sauli; nage Sauli gumsambile, Uhalilwe mihaa na Mlume, nawilicha alago a Mlume. ¹⁴ Samwele guganine, Noo ugana wi, bino, lino lilo lya miyoo m matu manyi, na gino noo myonona gya ng'ombe gyandi huhulicha? ¹⁵ Sauli guganine, Bachilusha uhuma u Baameleki; yulu batu bachishiga na mwego, miyoo na ng'ombe cha chisoga,yulu bchitangile lutangi wa Mlume, Abetcha obe, nabo chiya chyine chisigele tuchichiminya abisa. ¹⁶ Haho Samwele gumsambile Sauli, Hemba, nene niusambila inywa yagasambile Mlume buno busugu. Nage Sauli gumsambile, Dogomaga. ¹⁷ Bibyo Samwele guganine, Inangwa ubele alele u meeso mobe gogwe mine, wi wii! Ushiitilwe uba mswe gwa bibushi byose bya Isilaeli? Nage Mlume nuushinya mauta ube oolo lya Isilaeli. ¹⁸ Hanyuma Mlume guutumine ugye lwendo, guganine, Ugye ubachimya abisa baya Baameleki bene bali na buubi, ulwe nabo ndaa na byabichimiwa. ¹⁹ Yulu yai, bino, usanyemya liidi lya Mlume, wagulwila kole waita bya bisone u meeso ma Mlume? ²⁰ Sauli gumsambile Samwele, Chigilwe nene nanyemya liidi lya Mlume, nene namlusha Agagi, oolo lya Baameleki, iyaka nabachimya Baameleki abisa, ²¹ Alakini batu bawata kole, gya miyoo na ng'ombe cha chinonyu, u bibya bya bibagulwe, bululi bachitangile nyama wa Mlume, Abetcha obe, uya Gilgali. ²² Nage Samwele guganine, Wi wii! Mlume gusuunda lutangi lwa uchigya na lwa nyama lulingo lumwechi na unyemya liidi lya Mlume? Lingamina, unyemya m yusoga uhima lutangi lwa nyama, na uhulicha uhima mauta ma lunga lya mbuchi. ²³ Yulu ubenga uli nahi buubi bwa buti, na buhulihuli buli nahi gushi gwa mgibe kumbi na tuwe lugulu; Bululi waihanya inywa ya Mlume, Gee nage gwuhanya gogwe ushibe oolo. ²⁴ Bibyo Sauli gumsambile Samwele, nagilabuubi; yulu nahyatulanya alago a Mlume, iyaka na binywa byobe, ibalo nimonine baya batu booba, ninyeminye madi mabo. ²⁵ Bino hano, nihuusaba, undeelele buubi bwanyi; giwila hamwechi nanyi, naoshe umtambikila Mlume. ²⁶ Samwele guganine, Nishigiwila hamwechi nobe; bululi waihanya inywa ya Mlume, Mlume nage guuhanya gogwe, ushibe oolo lya Isilaeli. ²⁷ Nage Samwele heligaluwile, gagye lwage, Sauli guwatile pindo gya bichwalaganywa byage, nagyo giguliye. ²⁸ Haho Samwele gumsambile, Lino Mlume guugula buoolo bwa Isilaeli, nage gwamma m'binji nobe, mine guli na yano uuhima gogwe. ²⁹ Iyaka gee guli uomawa Isilaeli gushidogoma lulimi, na gushimona ulisusula; bululi gushi mtu, yulu glisusule. ³⁰ Sauli guganine, Naluba; alakini unyemye hano, nihuusaba u mbele wa bauluba batu banyi, na umbele wa Isilaeli, giwilahamwechi nanyi, namtambikile Mlume, Abetcha obe. ³¹ Bibyo Samwele gugiwile naulamana na Sauli; nage Sauli gumtambikile Mlume. ³² Haho Samwele guganine, Ndushiwe naho Agagi, oolo lya Baameleki. Haho Agagi gumgilile Samwele wa uhongahonga, nage Agagi, guganine, Hashi adugwa usuma wa luubi wahuma. ³³ Alakini Samwele gugaile, Nahi ahilu obe byaaitile baachana uwilwa na baana babo, byoka biya mnobe gwiwilwa hawingi ha baachana. Bibyo Samwele gugedile Agagi bihindi u mbele wa Mlume uya Gilgali. ³⁴ Na hanyuma ha haho Samwele gugile lwage uya Lama; nage Sauli guselile ugya u ndu gyage uya Gibea gya Sauli. ³⁵ Na Samwele gushigileiyaka umonana na Sauli ndaa na lusugu lwage lwa uuwa; alakini Samwele gubele humlilila Sauli; nage Mlume gulibediche wa ugana gumtele Sauli buusu gabe oolo hegulu ha Isilaeli,