¹ Bibele nahi hanyuma ha mwechi gumwechi, Nahashi, Mmamoni, gugile na ugimiya bushamo hegulu ya Yabesh-gileadi; na batu bose ba Yabeshi bamsambile Nahashi, Iita uhulichanye netu, na beswe twiugilila. ² Gugo Nahashi, Mmamoni, gubasambie, Wa godogodo gino nene nihulichana nenyu, mtu ge gese gabelwe liiso lyage lya ulume; na wa iyo ikoko nibaambila Baisilaeli bose nabo. ³ Bibyo baulu bose ba Yabeshi bamgaile, Tuhembe masugu njwii, yulu tuhile batu u ng'umbe chose cha Isilaeli; hanyuma nambo hashibi mine gwituhogonona, twichwa oli. ⁴ Bibyo bene batuminywe bahiile Gibea wa Sauli, badogomine bibyo binywa byose u matu ma batu; na batu bose baginune madi mabo balilile. ⁵ Na loola, Sauli guchwile ugya nalama ng'ombe uhuma u mabala; nage Sauli gubudiche, Bano batu bali nai, bahiye na ulila? Bamsambile binywa bya baya batu ba Yebushi. ⁶ Na luhuda lwa Abetcha lumchwilile Sauli wa uoma, haya helihuliche biya binywa, na sungu chage chilamine abisa. ⁷ Nage guguhile ng'ombe chibili, guchigedile-gedile bihindi bihindi, hanyuma gubihilile biya bihindi u ng'umba chose cha Isilaeli m maboo ma batu bene bahililwe, ugana, Ge gese mine gushigya hanyuma ha Sauli na Samwele, ng'ombe chage chigilwa byoka bibyo. Bibyo luteshi lwa Mlume lubagingile baya batu, bagimanine nahi mtu gumwechi. ⁸ Nage gubabalile uya Bezeki; Baisilaeli babele uki sambi chitatu, na Bayuda uki maumi matatu. ⁹ Nabo babasambile baya batu bene bachwile, Babasambile batu ba Yabesh-gileadi, Mmeshi, mengo ma chuba liomu, mwaimona uhogonowa. Bibyo baya bene batuminywe bagile, babahele mwano batu ba Yebush; nabo baseelele. ¹⁰ Wa bibyo batu ba Yebushi baganine, Mmeshi twimchwila, benywe mwitugilila byose byamwimona uba bisoga. ¹¹ Bibyo, mmeshi gwage, Sauli gubabiile batuuu mihamba gitatu; nabo bagingile mnda bushamo u mayaya ma halwelo, babalwile Maamoni ndaa na mengo ma chuba liomu; hanyuma baya bene bashigele basaliye, na bashishilwe babili babo uba hamwechi. ¹² Bibyo batu habamsambile Samwele, M nanyi guya mine guganine, Wi wii! Guya Sauli gwituhyilila? Balushiwe babo batu, yulu tubahage. ¹³ Alakini Sauli guganine, Hashi mtu mine gwihagwa lino, bululi lino Mlume gwaita uhogonowa mnda Isilaeli. ¹⁴ Hanyuma Samwele gubasambile batu, Bino! Na tugye ndaa na Gileadi, yulu tugimiye luhya buoolo uya lwendo lwa bubili. ¹⁵ Nabo batu bose bagile Gileadi; Bamtele buusu Sauli u mbele wa Mlume uya Gileadi; bashinjiche lutangi lw talala u mnele wa Mlume; na uya Sauli na batu bose ba Isilaeli baseelele abisa.