¹ Ne ti hɔrɔ, ye wa? Ne ti cedin ye wa? Ne ma Yesu an Matgi je wa? ne ka baara nɔn ti aa ye yɛɛku ye Matgi ra wa? ² A ri nin jɔɔ yɛɛkun ma ne jate cedin ya, aa ye kpin ka ɲin ka ne jate cedin ye, katgu aa min ne ka cedin yaa tgɛnmashɛ ye Matgi ra. ³ Ne n'in nsgɛ-sgɛbgaw labyi tgo miin na, wo min de ko: ⁴ Shɛn ti an fɛ ka dunniin kɛ ka myiniin kɛ wa? ⁵ Shɛn ti an fɛ ka baremanmosow jɔɔ fru ka ta n'aa ye an fɛ, e n'afwɔ cedin shɔw nin Matgi baremancɛw anin Piɛrɛ ra kɛ tgo min na wa? ⁶ Yara ne nin Barnabasi dɛnmɛɛn ka kan ka baara kɛ ka an yɛɛ baro wa? ⁷ Jon ta srodaashiya ra ka tra k'ika diin ta? Jon rezɛn nankwɔ sɛɛn n'ataa mwɔn dun? Jon byɛ biɛkan nŋɛn n'ataa ru nɔnnɔn jɔ myin? ⁸ Aa kaa myiiri ko ne n'inka komaa ju sgi Adamaadinw ka kɛtaw dɛnmɛɛn kan. Sariya byɛɛ wo kwo kenw fwɔ. ⁹ A sɛbɛnin mun Musa ka sariyaa ra ko: Mishi miin ɲɔn mŋimŋɔ, e kaa jɔ sri wo da ra. Yaa masa wo fwɔɔ mishiw hanmin wee kanma wa? ¹⁰ A ma wo fwɔ an dama kɔsɔ wa? an, wo sɛbɛ ra aan nee kɔsɔ. sɛɛnkɛra dgii sginin ka kan ka sɛɛn kɛ. ɲɔn kpishi bgaa byɛ ka kan ɲɔn kpishi, k'i dgi to wo jɔ sɔɔ kan. ¹¹ Nin an ka Yaa masa ka ɲinfɛn dan aa shɛman, nin an n'aa boofɛn jɔɔ shunman tgɛ, wo min kwoba ye wa? ¹² Nin shɛn min mŋɔ kpɛɛman nun fɛ ka fɛ sɔɔ aa boora, shɛn ti an ne fɛ ka fɛn sɔɔ aa fɛ ka tɛnmɛn wuw kan wa? Wo byɛ na ta, an ma wo shɛn yaara, nŋa an fɛnbyɛ munun yaako an kaa fwoyi kɛ ka Kista ka kibara junman bari ¹³ Aa maa dɔn ko miin nun baara kɛ Yaa masa batoshoba kɔɔn na, ko wuw r'aka baroo sɔɔ ka Yaamasa batoshoo kɔɔn na fɛw na wa? Aa maa dɔn ko miin nun saakaw lashe saaka bɔnan kan ko wuw r'a ɲin ja sɔɔ ka bɔ wo saakaw ra wa? ¹⁴ Wo tgoo ra kun, fɛn miin sɔɔ kibaro junman baara ra, Matgi ra latgɛɛ ko kibaro junman fwɔraw laa baro wo ra. ¹⁵ Nŋa ne man ngban wo fɛn shi nɔnkan. Ne ti sɛbɛ ɲin ce aa ma fran yaako wo kɛ nee. Mŋɔ ra ne ka yɛɛboɲa ɲin sababuu shɛn saya ka pisa ne ma nin wee! ¹⁶ Yɛɛboɲa sababu ti ne fɛ kibaro junman fɔɔ ra, katgu wo waajibiyanin no ne ma. Nin ne ma kibara junman fwɔ, bɔɔ min nee! ¹⁷ Nin ne tin na kɛ ne yɛɛkun sakoo ra, ne tin na barbji sɔɔ. Nŋaa nin wo baaraa karifara ne ma, wajibi ro ne raa wo kɛ. ¹⁸ Wo sgaan na ne mɔn wo ra? Wo ra yra ko ne raa kibaro junmaan fwɔ nin wri kwo tɛ, anin ne tiin she ka nafa min ɲinnin n yɛɛ fɛ kibarojunman fwɔɔra, ne raa wo to ɲin . ¹⁹ A ri nin ne min hɔron ye mŋɔw byɛ ka pan fɛ, ne n'in yɛɛ kɛɛ byɛ ka yɔn ye, yaako ne raa mŋɔ shaanman sɔɔ. ²⁰ Yahutuw fɛ, ne kɛra Yahutu ye, yaako ne raa Yahutuw sɔɔ. Miin nun min sariyaa kɔɔ, ne kɛra wuw fɛ nafwɔ ne min sariyaa kɔɔ, ari ka sɔɔ ne yɛɛ t'a kɔɔ yaako ne raa sariyaa kɔɔ mŋɔw sɔɔ. ²¹ Wo tgoo ra kun, sariya ti miin nun kun na, ne kɛra wuw fɛ nafwɔ sariya ti ne kun na, yaako sriya ti miin nun kun na, ne raa wuw sɔɔ. Wo byɛ nata, a ti nafwɔ Yaa masa ka sariya ti ne kun na katgu ne min Krista ka sriyaa kɔɔ. ²² Miin nun baakaa ka dgɔ dananyaa ra, ne kɛra wuw fɛ nafwɔ ne baakaa ka dgɔ, yaako ka baadgɔmanw sɔɔ. ne nin yɛɛ kɛ fɛn byɛ ye byɛ kanma, yaako tgo o tgo, ne raa wuw jɔɔ krishi. ²³ Nee fɛɛn byɛ kɛ kibarojunman kanma yaako ne ra ɲin ja sɔɔ a nafaa ra shɔw fɛ ²⁴ Aa ye yɛɛkun na dɔn ko miin nun bii nŋɔn an bii jaa ra, wuw byɛɛ bii, nŋaa kenpe ree saa sɔɔ. Aa bii yaako aa wo saa sɔɔ. ²⁵ Mŋɔ miin nun dun nŋɔn dan bii jaa ra, wuw byɛ raa yɛɛ tgan kwo shi shaanman ne ma. Aa wo kɛ yaako aa raa aa ka kunnajara tɛnmɛn fɛn sɔɔ. Nŋaa anne kpin nakɛ yaako an kunnajara shɛnbii sɔɔ. ²⁶ Wee ra to ne bii ka nɲateenni to nka bii dan jaa ma. nee kɛɛ kɛ nafwɔ bookru ra tonkɛ bga, a ti nafwɔ ne min fyɛn blɛ ra. ²⁷ Ne n'in yɛɛ piisgoo kpishi fwɔ k'a muŋu, katgu ne sran ko shɔw wanjuni kwɔ ne fɛ, ban kaa na kɛ ne yɛɛkuun na.