¹ Ayiwa, josɔnsgon kwo ra, an nadɔn ko dananyaa m'an byɛ fɛ. dɔnninya wee mŋɔ kɛ kuntgɛra ba ye, nŋaa kanunya wee jɔ bla mŋɔ kpɛɛw baakaa kan. ² nin mŋɔ jɔ ra myiiri k'i kwodɔn, a ma fwoyi bɔn ba e nafwɔ a ka kan ka kwo dɔn tin miinshi. ³ Nŋaa nin mŋɔ jɔɔ Yaa masa kanun, Yaa masa wo tgi dɔn. ⁴ Ayiwa, josɔnsgoo ɲinmin kwoo ra, an na dɔn ko joo ti fwoshi ye, ko Yaa masa kpɛɛman shi ti ɲin, Yaa masa ken kwɔ. ⁵ Ari nin sakoora fɛnw jɔɔ nin dgukoo kan fɛnw jɔɔ kri ko batofɛn nun, katgu batofɛn shaanman nin Matgi shaanman min ɲin, ⁶ wo byɛ na ta, an ne kpin fɛ, Yaa masa kenpe nee min ɲin wo min an fa ye. Yaa masa fɛn byɛ da, an min yan wee kanma. Matgi kenpe fran min ɲin, wo min Yesu Krista ye. fɛn byɛ min ɲin a ye baaka ra, an ne byɛ min ɲin a baaka ra. ⁷ Nŋaa mŋɔw byɛ ti wo dɔn. Mŋɔw jɔɔ tin dgen na jo kwoo ra, aribyi wuw wo sgo ɲinmin ka yate jo sɔn sgoo yɛɛkun wee. Aa dosokun baaka ka dgɔ, wo duniin na ru nŋɔn re. ⁸ Dunniin kpin ti an kwo ja Yaa masa ye. Nin an ma dunnin kɛ, wo ti fɛn bɔ an na. Nin an ka dunin wa wo fɛn bla an kan. ⁹ Wo byɛ na ta, aa yɛɛ kɔɔshi yaako aa ka Hɔnrɔya fgaan kaa kɛ baakatanw kunnashɛn sabaabu ye. ¹⁰ Shɛn na, dɔninyaa min ye miin fɛ, ninbareman baakatan jɔ ka ye je jo shoo jɔ kɔɔn na, wo dosokun ti naa gbrɛya fwɔ ka bla jo sɔn sgo ɲinmiin na wa? ¹¹ Wo tgoo ra, Krista sa ra wo bareman baaka tan miin kanma, wo hraki e ka dɔninyaa fɛ. ¹² Nin aa raa baremanw hakɛɛ ta tin, ka aa dosokun sinsinbiiw majinmin tin, aa min Krista ree hakɛɛ ta ra. ¹³ Wee ra to, nin sgo wee bareman kunna shɛn, ne ti naa sgo ɲinmin abada, waako ne ka kɛ ne baremaan kunnashɛn sababu ye.