¹ Aa gban kanunyaa nɔnkan. Aa Yaa masa ka ɲinfɛnw byɛ ɲinni kwosɛbɛ. Aa kɛ cerayaa ɲinnifɛn fɛ ka tɛnmɛn shɔw kan. ² Min kan kpɛɛ fwɔ, wo ti koma mŋɔw fɛ, wee koma Yaa masa ree fɛ, katgu mŋɔshi ti wo kɔɔ dɔn. Ee bundew fwɔ a dosokuun na. ³ Nŋaa min cerayaa kɛ, wee koma mŋɔw fɛ ka aa nafa, ka aa wanju, ani ka ka aa dosoo saaro. ⁴ Min kan kpɛɛ fwɔ, wo nafaa min a yɛɛ ree kan, ka sɔɔ min cerayaa kɛ,wo nafaa min eglisii kan. ⁵ Ne m'afɛ aa byɛ raa kan kpɛɛw fwɔ, Nŋa ne m'afɛ aa cerayaa kɛ ka tɛnmɛn wo kan. Shɛn na, min cerayaa kɛ, wo ka buun nin kan kpɛɛ fwɔ bga wee, fwɔ ni n a yɛɛkun wee wo kan kpɛɛ kɔɔ fwɔ, yaako eglisii ra wo nafaa sɔɔ. ⁶ Ayiwa baremanw, nin ne ka ta aa fɛ ɲin ka kan kpɛɛw fwɔ ka sɔɔ ne ma Yaa masa ka kwo yrataa jɔ fwɔ aa fɛ, waamaa dɔnniya kwo, waamaa ceraya, waamaa ka aa kran, ne na nafa jɔɔn lashe aa ma? ⁷ Fwɔrifɛnw ka pan fɛ, nafwɔ fle waamaa gbiin, Nin aa kaan ti dɔn ka bɔ nŋɔn na, aa miin fwɔ, wo na faanmun dii? ⁸ Nin bwuru fiɛn ta ti kan piɛnin bɔ, jon n'i labɛn kɛɛ kanma? ⁹ Wo tgoo ra aa ye byɛ nin aa ka komaa ma piɛ aa ka fwɔtaa na faanman tgo jɔɔn na? katgu amin nafwɔ aa min komara fyɛn fɛ. ¹⁰ Kan shaanman min diyan na, nŋaa kan shi ti ɲɨn nin kɔɔ ti miin na. ¹¹ Wo tgoo ra, kan kpɛɛ fwɔbga wee min fwɔ, nin ne ti wo mɛn, wo tgi na kɛ janmana kpɛɛ mŋɔ ye ne ɲan na ne byɛ na kɛ janmana kpɛɛ mŋɔ ye wo ɲan na ¹² Wee ra to, ka aa to Nin Senu ka ɲifɛnw ɲinni na, miin nun eglisii nafa, aa wuw shaanman ɲinni. ¹³ Wee kanma, min kan kpɛɛ fwɔ, wo raa Yaa masa daare yaako a raa she ka wo kan kpɛɛ kɔɔ fwɔ. ¹⁴ Nin nee Yaa masa daare kan kpɛɛ ra, nee daareri kɛ nin ne ɲin wee ye, nŋaa ne akrii sin t'ara. ¹⁵ Ne na mɔɔn kɛ sa? ne na Yaa masa daare n'in ɲin wee, Nn'a daare n'in ɲin byɛ ye. Ne na tanori dɔnŋrii da nin nɲin wee , ne na wo da n'in akrii byɛ ye. ¹⁶ N'i baakaa da Yaa masa ye nin e ɲin drɔnw ye, mŋɔ kpɛɛ miin nun sginin mun janmaa shɛma, wuw na amiina fwɔ e ka baakarii kɛniin kwɔ tgo dii? Ka sɔɔ e min fwɔɔ wuw ti wo dɔn. ¹⁷ Shɛn ro e ka baaka darii ɲan na kwosɛbɛ, nŋaa wuw ma nafa shi sɔɔ a ra. ¹⁸ Nee baaka da Yaa masa ye katgu nee kan kpɛɛw fwɔ ka tɛnmɛn aa byɛ kan. ¹⁹ Nŋaa eglisii kɔɔn na, a ka ji nee ka koma juuru nin ne akriwee yaako ka mŋɔ kpɛɛman nun kean, ka tɛnmɛn kan kpɛɛ wga tan fwɔnin kan ²⁰ Baremanw, aa kaa kɛ dɛɛnsɛn nun ye akrii ka pan fɛ. Dguyaa ka pan fɛ kpin, aa kɛ dɛɛnsɛnw ye, nŋaa akrii ka pan fɛ, aa kɛ mŋɔ ɲannatgɛninw ye. ²¹ A sɛbɛ nin mun sariya kitaabuu ra ko: Ne na koma mŋɔ ɲin nun fɛ kan kpɛɛ fwɔbgaw dara anin shia kpɛɛman mŋɔw dara.Ari wo, aa ti naa ne lamɛn, Mtgi ko tin ²² Wee kanma, kan kpɛɛ fwɔɔ ti tgɛnmashɛ ye dananbgaw ɲan na, nŋaa tgɛnmashɛ ro dananbiiw ɲan na. pan kpɛɛman fɛ, cerayaa ti tgɛnmashɛ ye dananbiiw ɲan na, nŋa tgɛnmashɛ ro dananbgaw ɲan na. ²³ Ayiwa nin eglisii janmaa byɛ k'aa lajɛn batori ra sgan miin na,ka sɔɔ mŋɔw byɛɛ kan kpɛɛw fwɔ, nin dananbga kpɛɛman waamaa dananbiiw jɔɔ ka dun aa shɛma, aa t'afwɔ ko aa akrii wrinin no wa? ²⁴ Nŋaa nin dananbga kpɛɛ waamaa dananbiiw jɔɔ ka dun aa shɛma, ka sɔɔ byɛ cerayaa kɛ, e min mɛn aa byɛ dara, wo n'a tgɔ fwɔ ka kitii tgɛ a kan. ²⁵ A ka myiiriya dgonninw na bɔ kɛɛn kan. wo sgaan na a byin k'i ɲaan bri dgunma ka Yaa masa bato ka fwɔ ko: Shɛn na, Yaa masa min aa shɛma. ²⁶ Baremanw, an mɔn kɛ? N'aaka fii r'aa lajɛn batorii ra sgan miin na, jɔ ta min tanori dɔŋri da ye, jɔ ta min kran, jɔ ta min yrari wee, jɔ ta min kan kpɛɛ fwɔ yee jɔ fran ta min wo kan kpɛɛw kɔɔ fwɔ wee. wo kɛtaw byɛ raa kɛɛ yaako a raa eglisii nafa. ²⁷ Nin jɔɔ kan kpɛɛw fwɔ, wuw k'a tɛnmɛn mŋɔ fla waamaa saba kan, aa r'a bɔ nŋɔn kɔɔ. Mŋɔ kpɛɛman byɛ r'a wo kan kpɛɛw kɔɔ fwɔ. ²⁸ Nin mŋɔ ti ɲin min kan kpɛɛ kɔɔ fwɔ, a r'i mapka eglisi kɔɔn na. A r'a koma ayɛɛ nin Yaa masa shɛ. ²⁹ Min nun cerayaa kɛ, wuw ra mŋɔ fla waamaa saba r'a koma, mŋɔ shɔw ren ŋa wo komaa sgɛsgɛ. ³⁰ Ni n Yaa masa ka kwoo jɔ yra mŋɔ sginin jɔ ra, gare wee k'i mapka . ³¹ A byɛ she ka cerayaa kɛ ken-ken yaako byɛ r'a kran ka jejarii sɔɔ. ³² Ceraw ɲinw koo nin min aa yɛɛkunw nee ye, ³³ Sabu Yaa masa ti kwo frekeninw ka Yaa masa ye fwɔ Hɛrɛ ta. E kɛ Yaa masa ka mŋɔ Senumanw ka eglisiw byɛ ra tgo miin na, ³⁴ Wo tgoo ra mosow k'a koma eglisiw kɔɔn na, katgu a dganin tɛ aa r'a koma. Aa ka kan ka koo nafwɔ Yaa masa ka sariyaa ra fwɔ tin miinshi. ³⁵ Nin aa m'afɛ ka kwoo jɔ faanmu, aa r'a aa yɛɛkunw cɛw ɲrika aa ka sho, katgu a ti bɛn moso r'a koma eglisi kɔɔn na. ³⁶ Yala Yaa masa komaa bɔra re aa fɛ ɲin? Waamaa a shera aaye drɔnw nee ma? ³⁷ Nin mŋɔɔ jɔ ka myiiri k'aye min cera ye, Ko Yaa masa ka ɲinfɛɛn jɔ m'afɛ, wo raa dɔn ko nee min sɛbɛɛ ka ce aa ma, wo min Mtgi ka ce fwɔnin nee. ³⁸ Nŋaa nin mŋɔɔ jɔ min kwo dɔnbii ye wo kwoo ra, wo tgi raa to wo kwo dɔn biiyaa ra. ³⁹ Wee ra to baremanw, aa kɛ ceraya kɛɛ fɛ, aa kaa mŋɔ banda ka kan kpɛɛw fwɔ fran. ⁴⁰ Nŋaa fɛn byɛ raa kɛ tgo bɛnnin na, a kwo ɲannabɔ kwoɲuman.