¹ A nin nee mɛɛkɛw kaan nin mŋɔw ka kaan fwɔ, ka sɔɔ kanuya ti ne kɔɔn na, ne komakaan na kɛ nafwɔ taan mŋaan kan waamaa tɛtɛniw. ² Ari ni nee she ka cerayaa kɛ, ka bundew byɛ nin fɛn byɛ dɔn, Ari ni dananyaa byɛ min ne fɛ fwɔ ka kruw bɔ aa nɔ na, ka sɔɔ kanuya ti ne kɔɔn na, ne ti fwoyi ye. ³ Ari nin ne ka ne boofɛnw byɛ tran-tran ka kɛ fgantanw ka dunni ye, k'a piisgoo ji k'ara giin, wo ti naa fwoyi ɲan nee nin kanuya ti ne kɔɔn na. ⁴ Munɲurii min kanunyaa ra, a panin mun ɲunmanyaa ra ceerenya t'ara. Kanunya t'i wanso kunshɛbaya t'ara. ⁵ Kanunya ti kwo bɛnbii kɛ, A t'aayɛɛ nafa ɲinni. A tijinmin jona a ti kwodgu myiiri. ⁶ A t'i yriraja teebiiya kwo ra a r'iyriraja shɛn wee ra. ⁷ Ee sabari fɛɛn byɛ ra, ee da fɛɛn byɛ ra, a dgii da nin mun fɛɛn byɛ kan,ee fɛɛn byɛ munɲun. ⁸ Kanuyaa ti ban abda. cerayaa kɛɛ na ban. Kan kpɛɛw fwɔ na dabla. dɔnniyaa na ban. An kpɛɛnnin drɔnw nee dɔn. ⁹ An kpɛɛnni drɔnw nee kɛ ceraya kwoo byɛ ra. ¹⁰ Nŋa nin kwo dapaninw ka na, kwo dapabiiw na ban. ¹¹ Ka ne to dɛɛnsɛnyaa ra, ne tiin koma nafwɔ dɛɛnsɛn, ne tiin myiiri nafwɔ dɛɛnsɛn ne tiin kwow jateemlan nafwɔ dɛɛnsɛn. Ka bɔ fwɔ ne ɲannantgɛra ka kɛ cɛ ye, ne ree dɛɛnsɛnya kwow dabla. ¹² Sisa a min nafwɔ an min fɛnw fɛɛra ya fɛɛnan ra, A piɛnin tɛ, Nŋaa wo sgaan na, an na jeriikɛ ɲanda nin ɲanda. Sisaa nee kpɛɛnnin drɔnw nee dɔn, Nŋa wo sgaan na, ne na kwo dɔn ka dapa, e nafwɔ Yaa masa ne dɔn tinmiinshi. ¹³ Ayiwa sisa fɛn saba ɲin nee tora, dananyaa nin dgiyaa nin kanunya o, nŋa a byɛ bonmŋaa min kanunya wee ye.