¹ Ayiwa baremanw ne tafɛ aa kɛ kwo dɔnbii ru ye Nin senun ka ɲinfɛnw ka pan fɛ. ² Aa r'a dɔn ko aa tin min Yaa masa dɔnbiiw ye sgan miin na, aa tin sanma jo bobo nɔnŋa, E nafwɔ aa tin ŋan mlan ra tin miinshi. ³ Wee kanma ne m'afɛ aa faanmun ko mŋɔ o mŋɔ koma Yaa masa ɲin baaka ra, wuw shi ti n'a fwɔ ko Yesu daŋanin mun. Mŋɔshi ti she ka fwɔ fran ko Yesu min Matgi ye, nin wo ma kɛ Nin senu baaka ra. ⁴ Ɲinnifɛw shii ka sha, nŋa aa bɔ Nin Senu kenpe re ra. ⁵ Baara shii ka sha, nŋa a byɛɛ kɛ Matgi ken nee. ⁶ Baara kɛ tgow ka sha, nŋa Yaa masa ken nee ra byɛ kɛ mŋɔw byɛ kɔɔn na. ⁷ Yaa masa ɲin wee yra nin ɲinnifɛn jɔ ji wee mŋɔw byɛ ken-ken ma mŋɔw byɛ ka nafa sɔɔ kanma. ⁸ Akritgiya komaa jira jɔɔ ma Nin senu fɛ. Wo ɲin ken wee dɔniya komaa jii jɔ kpɛɛman ma. ⁹ Wo ɲin ken wee dananyaa jii jɔ kpɛɛman ma. Bannabgashɔ kɛnnŋɛnyaa she jira jɔkpɛɛman ma wo ɲin kenho baaka ra. ¹⁰ Kabakwow kɛɛ she jira jɔ ma. Shee jira jɔ kpɛɛ ma ka cerayaa kɛ. Ɲin dɔn ka bɔ nŋɔn naa jira jɔ kpɛɛ ma. Kan kpɛɛw fwɔ shee jira jɔ ma. Kan kpɛɛw kɔɔ fwɔɔ shee jira jɔ kpɛɛ ma. ¹¹ Nin Senu kenpe r'e wo kwow byɛ kɛ,ka mŋɔw byɛ ken-ken ka ɲinnifɛn ji aa ma ka kanɲa ni a yɛɛ sako wee. ¹² Ayiwa,mŋɔ piisgoo jaw ka sha, nŋa piisgo ken no. Aa jaw nin aa shiyaw byɛ min piisgo ken ye tgomiin na,Krista byɛ min ti ne . ¹³ An ne kpin, Yahutuw nin shiya shɔw, yɔnw nin hɔrɔnw, an byɛ batisera ka kɛ piisgo ken ye ɲin ken nee ra. An min myin na yo ɲin ken wee ra kun. ¹⁴ Piisgo shi ti ja ken ye, nŋa a jaw ka sha. ¹⁵ Nin sin na fwɔ k'aye ti boo ye ko wo kanma k'aye ti piisgo ja jɔ ye, wee shaa kɛ a ti kɛ piisgoo jɔ ye wa? ¹⁶ Nin too byɛ ra fwɔ k'aye ti ɲan ye, ko wo kanma k'aye ti piisgoo jɔ ye wee ra to a ti piisgoo jɔ ye wa? ¹⁷ Nin piisgoo jaw byɛ tin min ɲan ye mŋɔ tin na mɛnni kɛ dii? Nin a byɛ tin min too ye, mŋɔw tin na fɛnw shɔɔn mɛn dii? ¹⁸ Nŋa shɛn na,Yaa masa piisgoo jaw byɛ ken-ken kɛɛ piisgoo ra ka kanɲan nin a yɛɛ sako ye. ¹⁹ Nin piisgoo byɛ lajɛnniin tin min ja ken ye, piisgoo tin na kɛ miin? ²⁰ Wee kanma piisgoo jaw ka sha, nŋa piisgo min kenpe ree. ²¹ Wo tgoo ra ɲan ti she ka fwɔ boo wee ko: Ne makwo t'i ra! kunkoo shi ti shaa fwɔ sinw ma ko: Ne makwo t'aa ra. ²² Nŋa shɛn na, piisgoo ja miin nun mun nafwɔ a baaka ka dgɔ, an makwoba min wuw ra. ²³ Piisgoo ja miin nun ti yate boɲanta ru ye, an n'an yrito wuw ra ka tɛnmɛn ja shɔw kan. An muun ja miin nun kwo ra, an nin wuw masri ka tɛnmɛn jɔɔ kan. ²⁴ An ti ja miin nun yate muunɲa jaru ye, wuw makwo ti wo ra. Boɲaa dɛsɛ ra ja miin nun na, Yaa masa piisgoo didaa ka boɲanba ji wuw ma, ²⁵ Yaa ko paa kaa kɛ piisgoo ra, Nŋa a jaw byɛ r'aa yrito nŋɔn na tgo ken na. ²⁶ Nin piisgoo ja ken ka tɔɔrɔ, wo nin piisgoo ja shɔw byɛ ren tɔɔrɔ nŋɔnfɛ . Nin ja ken ka boɲa sɔɔ, wo nin piisgoo ja shɔw byɛ ren yrirajaa kɛ nŋɔnfɛ. ²⁷ Aa min Krista piisgo ye, aa byɛ ken-ken m'a piisgoo jaw jɔɔ re ye. ²⁸ Wee ra, Yaa masa mŋɔw jɔɔ sgii eglisiw ra: Gare, cedinw, a flanan o ceraw, a sabanan o kaamŋɔw, wo kwɔ, kabakwow kɛ o, wo kwɔ bannabgashɔw kɛnnŋɛnyarii ɲinnifɛnw, anin janmabgaw nin ɲan mŋɔw nin kan kpɛɛ fwɔbgaw. ²⁹ Mŋɔw byɛ ti cedin ye. byɛ ti cera ye. byɛ ti kaamŋɔ ye. byɛ ti kabakwo kɛbga ye. ³⁰ Bannabgashɔw kɛnnŋɛnyarii shee ma ji byɛ ma. byɛ tishe ka kan kpɛɛw fwɔ. byɛ tishe ka kan kpɛɛw kɔɔ fwɔ. ³¹ Aa kɛ Yaa masa ka ɲinfɛn pisamanw fɛ kwosɛbɛ. Wo byɛ n'ata, sra min ka pisa nin wo byɛ ye, ne na wo yra aa ra sisa.