¹ Aa ne ladgen bgaw ye nafwɔ ne min Krista ladgenbga ye tin miinshi. ² Ne r'a fwo katgu aa r'aa akrii to ne ra fɛnbyɛ ra, ka ne ka lajiri komaw mra nafwɔ ne ra yraa aa r'a tin miinshi. ³ Wo byɛ n'anta, ne m'afɛ aa dɔn ko cɛw byɛ kutgii min krista ye, ko mosoo kutgii min a cɛ wee, ko Krista kuntgii min Yaa masa ree. ⁴ Wee r'ato cɛ o cɛ Yaa masa daare waamaa ka ceraya kɛ k'a kun datgunin to, wo ra kuntgii dgɔya re. ⁵ Nŋa moso o moso Yaa masa daara waamaa ka cerayaa kɛ ka sɔɔ akun ma datgu, wo r'a kutgii dgɔya. A min n'afwɔ a kun shinin no. ⁶ Nin mosa kun ma datgu, a r'a akunshee tgɛ. Nŋa nin kunshe tgɛ o waamaa kashii min muunɲa ye mosoo ma, a ka kan ka a kun datgu. ⁷ Nŋa cɛɛ man kan k'a kun datgu, katgu a min Yaamasa yaa nin a nɔɔrɔ wee ye. Mosoo kpin min cɛɛ nɔɔrɔ wee ye. ⁸ Nŋa shɛn na, cɛɛ dara sgan miin naɑ ma bɔ mosoo ra, nŋa mosoo bɔra cɛ wee ra ⁹ Cɛ wee ma da mosoo kanma Nŋa mosoo dara cɛ wee kanma. ¹⁰ Weerato tgɛnmashɛ r'a sɔɔ mosoo kun na mɛɛkɛw kanma ka yra ko a min fgan ree kɔɔ. ¹¹ Wo byɛnata, Matgi ra, nin cɛɛ tɛ, mosoo shi tɛ. Nin mosoo tɛ, cɛ shi tɛ. ¹² Katgu mosoo dɔra cɛ ra tgo miin na, cɛ wee woo moso ree fɛ. Fɛnbyɛɛ bɔ Yaa masa r'e ra. ¹³ Aa myiri a ra, yala a bɛnnin mun mosoo r'a Yaa masa daare batorijaa ka sɔɔ nin a kuun ma datgu wa? ¹⁴ Nin cɛɛ jɔ kunshee ka yan, a fwɔ, adamaadinyaa yɛɛkun t'aa kran ko wo min a dgɔya kwo ree wa? ¹⁵ Nŋa nin mosoo kunshee ka yan, wo m'a boɲa kwo ree, katgu kunshe yaan jira mosoo ma k'akɛ a kun datgu nan ye. ¹⁶ Nŋa nin mŋɔɔjɔ m'afɛ ka sɔsɔri kɛ, wo r'a dɔn ko landa kpɛɛman ti an fɛ wo kwoo ra, a ti Yaa masa ka eglisiw shi fɛ. ¹⁷ Ka ne to koma ɲin fwɔ ra, ne r'a lasɔnmin kwoo jɔ ra, ne ti she ka aa tannun wo ra fyew, wo min de ko: Aa ti aa lajɛn ɲari kanma, fwɔ shɛnri. ¹⁸ Wo kwo gare min de: A fwɔra ne fɛ ko n'a k'aa lajɛn eglisi kwow ra sgan miin na, paa kwow min aa shɛma. Paan jɔ fɛ, nee da wo ra. ¹⁹ Waajibi ro kanw n'a tran, yaako miin nun min dananbga sɛbɛw ye aa shɛma, wuw ren ŋa dɔn. ²⁰ N'aaye k'a lajɛn, wo ti Matgi ka tabarii kwo ye, ka ²¹ sɔɔ ka aa to dunniin na, byɛ ken-ken krɔtɔ ka a yɛɛ ka dunnin wee dun. kɔnŋɔɔ min jɔɔ ra, jɔkpɛɛman pannin min dɔɔ ra. ²² Show ti aa fɛ ka dunniin ka myinniin kɛ ɲin wa? Waamaa aa Yaa masa ka eglisi mafyɛnya ka boorakonw muun wa? Aa myiri ko ne ra mɔn fwɔ aa fɛ? Ne r'a aa tanun wo ra wa? Ne ti aa tanun wo ra dɛ! ²³ Ne r'a kran kwo miin nun na, nee wo sɔɔ Matgi fɛ ko: Matgi Yesu dun na boo ra shufɛ min na, e ree bwuruu ta ²⁴ ka baaka da Yaa masa ye,wo kwɔ, ka wo bwuruu kii-kii ka fwɔ ko: Ɲin min ne piisgo wee a jira aaye kanma. Aa ɲin kɛ k'a akri to ne ra. ²⁵ wo tgoo ra,dunniin kɛnin kwɔ,e ree jefyɛ ta, ka fwɔ ko: Jefyɛ nin min Yaa masa ka layru kla wee, wo layruu ta ra ne yuu ra. N'aaka myinniin kɛ sga o sgan, aa wo kɛ k'aa akri to ne ra. ²⁶ N'aaka bwuru ɲin dun ka myinniin kɛ jefyɛ ɲin na sgan o sgan, aa Matgi saya kwo wee fwɔ, fwɔɔ a na sgan. ²⁷ Wee r'a to, nin mŋɔɔ jɔ kaMatgi ka bwuru dun ka myinniin kɛ a ka a jefyɛ ra, ka sɔɔ a tgoo man ɲin, wo tgi na yaa ki Matgi piisgoo nin a yuu ka pan fɛ. ²⁸ wee kanma, mŋɔw byɛ ken-ken n'aa aa yɛɛ sgɛsgɛ, wo kwɔ, ka sii ka wo bwuru dun ka myinniin kɛ wo jefyɛ ra. ²⁹ Katgu nin min ka wo bwuru dun ka myinniin kɛ wo jefwɛ ra, ka sɔɔ a ma Matgi piisgoo dɔn ka bɔ nŋɔnna, wo m'a yaaki fɛn nee dun na ka wo myin. ³⁰ Wee ra to aa shaanman kɛra bannabgashɔw nin baakatanw ye, aa shaanman fran sa ra. ³¹ Nin an tiin kitii tgɛ ann yɛɛ kan, Yaa masa tin ti naa kiti kpɛɛman tgɛ an kan. ³² Nŋa Matgi kitii tgɛ an kan ka an koo, yaako kitii k'a na byin nin diyan kan ken ye. ³³ Wee kanma ne baremanw n'aka fii ra lajɛn ka dunniin kɛ Matgi ka tabari ra sgan miin na aa nŋɔn makɔɔn. ³⁴ Nin kɔŋɔɔ min mŋɔɔ jɔ ra, wo r'a dunniin kɛ a ka sho, yaako aa k'a aa lajɛn ka kitii byi aa yɛɛ kan. Kwo ka pan fɛ, nin ne ka she aa fɛ ɲin sgan miin na, ne na wuw ɲanabɔ.