¹ Lemi kema ohuru? lemi kema Otomamai? lemi komena Yeso Owandji waso? nyu kema lotomu lami le Owandji? ² Naka le akina lemi kema Otomami, ndeko lenyu; nyaleko djembetelo ya lotomu lami le Owandji. ³ Keso kele ekombo kemi le wane washita. ⁴ Nyu kema la mamulaka wande ndo noo? ⁵ Nyu kema la mamulaka da tsho laso osekaseka lakoka ndjala wadeso, oko watshee Atomami akina, ndo analengo w'Owandji, ndo Sefa? ⁶ Kana dimena, onde lemi leme ndo Barnabasi sho kema la mamulaka da tumika poo? ⁷ Na oto latumika lotomu lakidjeshi lakuta wande ndame? ele osongo wa vinyo, ndo hale olowa wande? ele olami wa ngombe, ndo hano diwele da ngombe? ⁸ Aso akambo watami, waleko paka lale oloyi wato? olembe hateketa ndo lote waso akambo lokina? ⁹ Ne da akandikama lolembe wa Mose: we hahombe diha ngombe lo saa ke menande mbeku. Zambi ndjakitshaka lo soyi da ngombe, ¹⁰ Kana teketaka mala otoyi lote waso? mete, lote waso kekandandikama kanga lakamba pombaka kamba lekongamelo, ndo kanga lamena mbeku mena lekongelo da pata. ¹¹ Naka sho takone lasanyu dango da lo nyuma, onde dikambo da woke naka sho muna dango danyu letena. ¹² Naka akina tsheka one mamulaka lenyu, aha lokongo diko leso da kitshe? koko sho kema la mamulaka wako; lokongo, taleko lo sowa shotshee, kele aha tonga didjima lo lokumu lololo la Kristo. ¹³ Nyu hanyeye da wane wele la tomu ya lozambi ndeshamaka lo tepelo, wane wa lo pango pataka lo pango yako yangendangenda? ¹⁴ Popo lokina, Owandji akasha wane wa sambisha lokumu lololo da sena lo lokumu lololo. ¹⁵ Lemi, lemi hasungani la mamulaka wako, ndo aha kele da nomba lote wami kendikami okone; ne da lemi nangaka dimena davo tondo ke mena ne dikambo da lotombo. ¹⁶ Naka lambosambisha lokumu lololo, aha lote wami dikambo da lotombo, ne da dihombo dambombaheme, ndo mananu lemi naka hasambisha lokumu lololo! ¹⁷ Naka ndeko lotshe loetema wa dimena, ndeko la mdipo; koko naka ndeko lotshe la lolango lami, aleko wotsho keyaendjami. ¹⁸ Na madipo wami okone? da mbisha lo bure lokumu lololo lasambishami, aha lemi nomba mamulaka wami wa mubiri wa lokumu lololo. ¹⁹ Ne da, kanga welemi ohuru letondo koto tshee, lakayetshe okambi woto tshee, kele da pata leemba lefula. ²⁰ La ase Yuda, latshi oko ose Yuda, kele da pata ase Yuda; la wane wlee leese kolembe, oko leese kolembe ( kanga welemi kema leme leese kolembe), kele da pata wane wele leese kolembe; ²¹ La wane wele kema lolembe, oko kowolembe ( kanga wele lemi hahombe olembe wa Zambi, welemi leese kolembe wa Kristo), kele da pata wane wele kema lolembe. ²² Letshi ohodu lehodu, kele da pata ehodu. lakayakonya lotshee lewo votshe, kele da mbitsha lo yoho tshee amotshi. ²³ Ndeko lotshe lote wa lokumu lololo da ndjala leko. ²⁴ Nyu hanyeye da wane walawo lo seke ndawoka vo tshee, koko oto otoyi kokolekaka? nyolawo lo yoho ndeka. ²⁵ Wane tshee walo ndjaewolaka lo yoho tshee ya ndjakime, ndo vo tsheka da pata dembo da rushwa; koko sho, totshee lo dembo daha rushwa. ²⁶ Lemi okone, ndeko lo ndawo, aha oko kanga enginya; ndeko lo kokola, aha oko kanga lakomola lopepe. ²⁷ Koko ndeko sakee laa kudu demba dami ndo ndeko lodilama dimena, la woma da lemi leme sokola, kisha sambisha le akina.