¹ Okone, watende oko ekambi wa Kristo, ndo apaki wa ahindo wa Zambi. ² Kele ke tshikala, kene kelombawo le apaki, ele oto loto atanemo kokele. ³ Lemi, haleke ngenyangenyami da nomboshama oma lenyu, kana lo tuminadi toto. hayalombosha lemi leme, ⁴ Ne da hahando kanga lo dikambo otoyi; koko aha lote wako komohando. kanga lanombosha ele Owandji. ⁵ Dako dele aha nyu nombosha tondo ke wonya, polo edja koya Owandji, kenya osase kene koshami lo didjima, ndo lenya awonga wetema. okone oto loto akolongola oma le Zambi lotombo lone lokoka. ⁶ Lote wanyu, analengo, kekamatshe ane akambo dikoka lemi leme ndo le Apolo, kele nyeye oma leso da aha nyu tsho polo ndekana kene kakandikama, ndo aha omotshi lasanyu hayolongola lohende lote womotshi lote wokina. ⁷ Ne da akotshikitanya? eleye laa kekiye konongola? ndo naka okakilongola, lote wana ayatombolaye, oko kokilongola? ⁸ Kakiye nyamboshila la ndota, kakiye nyaya ase engonyu, aha sho nyambotate la tawala. ndo nyu koka tawala okone, kele ndo sho totawale lanyu! ⁹ Ne da Zambi, lambofonya, akatotshe, Atomami, ato wa mwisho, fungoma polo lo nyoyi lo yoho ya, lote tatshi lo lofunge la lo duniya, le wa andjelo ndo le ato. ¹⁰ Taleko aladi lote wa Kristo; koko nyu, nyaleko ase tomba le Kristo; taleko ehodu, koko nyaleko la kudu. nyaleko la kinemo, ndo taleko monyoma! ¹¹ Polo keso saa, taleko lo sowa la ndjala, la posa, lotakataka, taleko lo penyahenyala, sokolama lene la lene; ¹² Sho tambolemba la tumika lanya waso shwame; tengama, tambotshokola; soyama, tambovumidiya; ¹³ Tolama, taleko lo teketa la kenemo; taleko oko kombo ya lo duniya, ena koto tshee, polo kakiye. ¹⁴ Aha lote wa nyondja soni kendikami ane akambo; koko lambonyewola oko ana wami wa ngandji. ¹⁵ Ne da, lo saa konyoyala la midiyo dikumi ya mwadimu le Kristo, nyu kema koko la efula ke mbapa, lote wa lemi kekanyote le Yeso Kristo oma lokumu lololo. ¹⁶ Lambonyolomba okone, ,yoyale efonya wami. ¹⁷ Lote wako lakanyotome Timote, lele onami la ngandji ndo lokitanyiya le Owandji; akonyohola naa mboka yami le Kristo, naa yoho ya fundishami fashi tshee lo kanisa tshee. ¹⁸ Amotshi wakayaemba la lonene, oko lemi kokoka tsho tshalenyu. ¹⁹ Koko lakoya kakiye djalenyu, naka lolango la Owandji, ndo lakeya, aha eteketa, koko kudu ke wane wayaemba. ²⁰ Ne da Dolelo da Zambi hadiyala leteketa, koko lo kudu. ²¹ Alanganyu? ndje ndelenyu la danga, kana la ngandji ndo lo nyuma ke lokitshakitsha?